Reportajen Zevonia Vieira
Prezidente Repúblika no kandidatu Prezidente Repúblika, Dr.Francisco Guterres Lú Olo hato’o nia kompromisu kombate pedofilia iha Timor-Leste.
Liuhusi komunikadu imprensa ne’ebe Neon Metin asesu Dr. Francisco Guterres Lu Olo hato’o nia kompromisu katak lakohi pedofilia akontese iha Timor-Leste
“Foin daudauk ita rona padre ida iha Oe-cusse, pedofilia, halo sala ba ita-nia oan sira, agora tama hela iha kadeia Becora. Lú Olo lakohi pedofilia iha Timor-Leste. Bainhira akontese, presiza koopera ho justisa. Tribunal sira atu buka julga ema ne’ebé halo pedofilia hasoru ita-nia oan sira. Buat at ne’e hasai karakter ita-nia oan sira, sei trauma ate boot, to’o katuas no ferik sei trauma hela nafatin tanba hahalok at ida ne’e,” Lú Olo hateten iha ninia komísiu iha Liquiça, 12/04
Kandidatu ne’e hato’o katak durante tempu portugés no iha tempu rezisténsia nia laran nunka rona kazu pedofilia ruma. Foin mak rona kazu pedofilia akontese hafoin Timor-Leste hetan nia ukun rasik-an. Tanba ne’e Lú Olo nia kompromisu polítiku mak defende feto no labarik sira. Sei koopera ho orgaun estadu hotu-hotu iha luta ba kombate pedofilia.
“Nunka rona ida ne’e, rona ne’e hafoin Timor-Leste hetan nia ukun rasik an.” Dehan Lu Olo
Estadu tenke garante protesaun ba labarik. Kandidatu enkoraja ba inan no aman atu labele nonok bainhira akontese kazu pedofilia. Iha organizasaun barakbarak mak tau matan ba proteje labarik, iha PNTL atu hato’o keixa. Pedofilia sira ne’e ema katuas sira tinan 70 resin mak halo no hamoe ita-nia rain no povu.
“Lú Olo nia kompromisu mak atu defende labarik sira. Se mak halo ida ne’e nia ba tama kadeia. Liuhusi Tribunal nia tama kadeia. Atu hanorin nian, hanorin sira seluk atu labele tuir nia ain-fatin.” Lu Olo Konklui