Reportajen Santy Lucia da Costa
Prezidente Partidu Demokrátiku (PD), Mariano Assanami Sabino apela ba povu tomak nafatin hakmatek ho vontade no seriedade, tuir votasaun ne’ebé mak monu iha loron Tersa-Feira, 19 Abril 2022, hodi determina ita hotu nia futuru tanba votu mak determina mudansa ba rai ne’e.
Liuhusi konferensia Imprensa, Prezidente Partidu Demokratiku (PD), Mariano Assanami Sabino, informa, Husu ba Inan-aman sira hotu atu nafatin hakmatek, nafatin ho vontade, seriedade. Hotu-hotu aban ba tuir votasaun tanba ita nia votus maka determina ita nia futuru.
“Husu ba Inan-aman sira hotu atu nafatin hakmatek, nafatin ho vontade, seriedade. Hotu-hotu aban ba tuir votasaun tanba ita nia votus maka determina ita nia futuru, no ita nia votus mak determina mudansa ne’ebe maka ita atu halo ba rai ida ne’e. Ita hotu-hotu kontribui liuhusi votasaun para muda ita nia rai.” Apela, Prezidente PD, Mariano Assanami Sabino, iha Sede Nasional PD, Kolmera, Dili, 18/4.
Assanami, dehan, rumoris ne’ebé maka mosu dehan iha kilat ilegal, iha buat oioin, ameasa ne’ebé mak iha, ne’e inimigo ba demokrasia. Atu hakmatek hotu-hotu vota ho konsiensia, labele tauk ho ameasa sira no promesa falsu sira ne’ebé mosu.
“Hau hanoin kilat sira ne’e kontroladu, ami tenta buka informasaun lubuk ida iha media sosial mosu, ne’e letratu antigu, ne’ebé ema hamosu para ema hanoin katak, iha rumoris ida ne’e. Intimidasaun teror Timor-Leste, uluk militar halo ba ita, laiha efeitu buat ida, tanba ne’e brani ho imi nia kbiit ho imi nia responsabilidade, tanba ba vota ne’e ema ida la tuir ba iha ne’eba.” Hateten, Assanami.
Prezidente PD, Husu ba jerasaun foun hotu atu labele uza media sosial para tolok, trata, ba mal-edukasaun ne’ebé mak mosu iha ne’eba. Hanesan jerasaun kontinuadór husu para nafatin siviku, demokratiku la’o ba oin.
Assanami akresenta nu’udar PD responsabilidade atu hato’o katak, lala’ok ne’ebé mak ameasa sosa povu nia votus, intimida oioin ne’e lala’ok anti-demokratiku, ita nia rai proklama nu’udar Republika Demokratika Timor-Leste (RDTL), ita hotu iha responsabilidade atu kontribui ba prosesu demokratizasaun di’ak iha ita nia rai.
Nia Husu mós ba joven sira hotu, atu fila ba ida-idak nia fatin kontribui paz no estabilidade no inklui iha responsabilidade para vota, ita nia vota ne’e ba futuru ita nian, la’os de’it votus ba tinan lima, maibé prosesu kontrusaun ne’ebé ba oin ne’e importante tebes.
Nu’udar Eis-Kandidatu Prezidente Republika mós apresia no agradese ba hotu-hotu ne’ebé durante ne’e fó konfiansa ba Kandidatu numeru 16, Mariano Assanami Sabino, ho ida ne’e desizaun PD, hotu-hotu fó fali konfiansa ba kandidatu numeru 1, Dr. Jose Ramos Horta para atu sai Prezidente Republika ba periodu 2022-2027.
“Ita hotu-hotu iha responsabilidade para kontribui, integridade partidu, membru hotu-hotu tenki asumi responsabilidade para kumpri desizaun ne’ebe Partidu Demokratiku fó.” dehan, Assanami