Reportajen Santina Lucia da Costa
Relasiona ho deklarasaun ne’ebé halo husi Paulo Januario Correia iha loron, 16 Abril 2022 deklara katak lori Brigada Assanami fo apoiu ba Kandidatu Lú Olo, tuir estrutura Brigada Assanami Diresaun Sentral (DS) konsidera ne’e la los, la iha rekoñesimentu husi Diresaun Nasional, no nia la hola parte iha iha estrutura Brigada Assanami. Ho nune’e sei hetan sansaun husi Brigada Assanami husi Partidu Demokrátiku (PD) nian.
Liuhusi Konferénsia Imprensa, Porta-Voz, Brigada Assanami, José Ramos, hateten, deklarasaun ne’ebé halo husi Paulo Januario Correia iha loron, 16 Abril 2022 deklara katak lori Brigada Assanami ba apoiu Kandidatu Lú Olo, Ne’e lalos no la Representa Estrutura BRIGADA ASSANAMI no membru Brigada Assanami.
“Ami estrutura Brigada Assanami Diresaun Sentral deklara katak, deklarasaun pesoál Paulo Januario Correia ne’e la Representa Estrutura Brigada Assanami, tanba nia la hola parte iha estrutura Brigada Assanami.” Deklara, Porta-Voz Brigada Assanami, José Ramos, lihusi konferensia imprensa, iha Sede Nasional PD, Kolmera, Dili, Domingo, 17/4.
Brigada Assanami estabelese iha loron, 30 Fulan Marsu 2020 ho estrutura mak hanesan, Coordenador Jera, Apolo J. Franca da Silva, Mentor : Fortunato Hornai, no Porta Voz, José Ramos. Estrutura Brigada Assanami foin estabelese iha Diresaun Sentral seidauk Loke ba to’o iha baze.
Porta-Voz, José Ramos, hateten, deklarasaun ne’ebé halo husi Paulo Januario Correia ne’e deklarasaun pesoal no sei la muda desizaun sentral Brigada Assanami ne’ebé submete totalmente ba desizaun Partidu Democratiku (PD) tuir desizaun Konsellu Superior Partidu (CSP) iha loron 31 Marsu 2022 ne’ebé deside fó apoiu tomak ba kandidatu Prezidente da Republika Dr. Jose Ramos Horta iha segundu volta eleisaun prezidensial, 19 Abríl 2022.
“Lamentavel tebes no kondena aktus pesoais ne’ebé deklara Apoiu ba kandidatu seluk hodi Brigada Assanami Nia naran no uja atributu PD, hanesan Bandeira PD Sem koñesimentu husi lideransa sentral.” dehan, José Ramos.
Iha fatin hanesan, Prezidente Brigada Assanami, Apolo J. Franҫa da Silva, Reforsa tan katak, Desizaun koletivu ne’ebé Partidu Demokratiku (PD) foti ona ba apoiu kandidatu Prezidente Republika numeru 1, Dr. José Ramos Horta, tanba ne’e PD deside sei mantein nafatin desizaun ne’ebé iha ona.
“Sansaun ne’ebé ami sei foti mak, ami sei haree ninia partisipasaun husi Brigada Assanami nian, tanba ne’e ami na’in hira ne’e sei foti sansaun hasai nia (Paulo Januario Correia) husi Estrutura, maske seidauk tama iha lista estrutura Brigada Assanami nian.” Hateten, Prezidente Brigada Assanami.
Apolo J. Franҫa da Silva, dehan, Atribuitu sira ne’ebé uza ne’e tanba agora situasaun hanesan ne’e, ema uza maneira hotu-hotu bele produz rasik atribuitu ne’e, no balun foti husi kompaneiru balun nian.
“Ami hatete tan ba kompaneiru hotu-hotu katak, matan moris neon nain, ita nia desizaun mak fó apoiu Ramos Horta, sira ne’ebé mak apoiu kandidatu Lú Olo ne’e laiha rekoñesimentu husi Diresaun Nasional, tanba ne’e ami hakfodak maluk ne’e koalia katak, lori bandeira Partidu Demokratiku nian hodi apoiu fali Lú Olo.” Informa, Prezidente Brigada Assanami.
