Home Notisia Atendimentu Pasaporte tinan 2019 Hamutuk 25.475, Osan Ba Kaixa Estadu $1.516.275

Atendimentu Pasaporte tinan 2019 Hamutuk 25.475, Osan Ba Kaixa Estadu $1.516.275

912
0
Diretor Nasional Identidiade Civil e Registo Criminal, Victor da Costa Neto. [Foto: Santina Lucia da Costa | 15.01.2020]

Reportazen Santina Lucia da Costa

Prosesu ba tratamentu pasaporte iha tinan 2019 hamutuk ema 25.475, liu hosi total ema ne’ebe mak prosesa pasaporte, Ministeriu Jusitsa konsege hatama osan ba kaixa estadu hamutuk $1.516.275.

Diretor Nasional Identidiade Civil e Registo Criminal, Victor da Costa Neto hateten, atendimentu pasaporte halo iha fatin tolu, alkau central Dili, valkau munisipiu Bobonaro no valkau Oecussse, maibé fatin ida ne’ebé lolos atu produz emiti no asina pasaporte ne’e sentralizadu iha diresaun jeral do serbisu notariadu iha ministeriu da justisa nia okos.

“Iha tinan 2019 ami konsege estende tan valkaun atendimentu iha munisipiu haat ne’ebé seidauk funsiona, tanba seidauk iha lisensa atu halo atendimentu iha munisipiu Manatutu, Lautem, Viqueque no Baucau, to’o agora seidauk loke ba publiku, tanba buat balun ne’ebé ami sei kompleta liu, depois tempu besik ami tau tan ida iha munisipiu Ermera, sasan ka ekipamentu iha hotu on”, katak Diretor Victor da Costa Neto, ba jornalista Neon Metin iha nia knar fatin, 13/01/2020.

Tuir dadus tinan 2019, kona-ba sidadaun sira ne’ebé mak halo pasaporte komun iha valkaun Dili de’it 21.853 pesoas, orsamentu $ 1.355.975, atende iha valkaun Oecusse 807 pesoas, orsamentu $ 18.575, valkaun Bobonaro, 1.427 pesoas, orsamentu $ 35.400.

Ba sidadaun ne’ebé halo pasaporte serbisu nian ba Diretore sira nian, hodi halo serbisu iha rai liur, valkaun Dili hamutuk 1.154 pesoas, ho orsamentu $ 86.525. Ba fali halo pasaporte diplomatiku ba embaixador, konsuladu sira, funsionariu ministeriu negosiu estranjeiru ninian ne’ebé halo viajen ba rai liur, valkaun Dili hamutuk 234 pesoas no orsamentu hamutuk $ 19.800. Hosi total ne’e ba pesoal sira ne’ebe prosesa pasaporte tinan 2019 hamutuk, 25.475, ho total orsamentu $1.516.275.

Victor da Costa Neto mos informa katak, pasaporte serbisu ho pasaporte diplomatiku labele halo iha munisipiu Bobonaro, Oecusse, tanba halo pasaporte refere tenki halo pedidu husi serbisu fatin, labele fó arbiru, no hetan kontrolu husi Ministeriu Justisa, tanba pasaporte diplomatiku ne’e kompetensia husi Ministeriu Negosiu Estrangeirus.

“Ami la determina total Loron ida ami tenki atende ema na’in hira, ida ne’e depende ba aplikante sidadaun sira ne’ebé maka loron mai atu trata, portantu loron ida, sira mai 200 pesoal ka 300 pesoas”, hateten Diretor Nasional Identidade civil e Registo Criminal.

 

Tuir Victor katak fasilidade sira sufisienta ona, depois harii sistema halo pasaporte ho sistema eletroniku, maibé kestaun maka konaba manutensaun tanba iha difikuldade ba iha rekursu umanu no rekursu finanseiru.

LEAVE A REPLY

Please enter your comment!
Please enter your name here