Reportajen David da Costa Gusmao
Militante no simpatizantes Brigada Assanami husi Partidu Demokratiku (PD) ne’ebe apoiu kandidatu Prezidente Republika Mariano Assanami Sabino iha elisaun prezidensial primeira volta, ndeklara katak, sira sei fó votu ba Kandidatu Prezidente Repúblika, Dr.Francisco Guterres Lú Olo ho numeru soretiu 2, iha segunda volta.
Porta Voz Birgada Assanami, Paulo Januario Correia dehan antes ne’e Partidu Demokratiku (PD) nian desizaun fó apoiu votu ba Kandidatu Prezidente Repúblika ho númeru sorteiu 1, José Ramos Horta iha elisaun segunda volta.
“Maibé ami nu’udar Movimentu Polítiku hanesan Brigada Assanami hosi PD, sei retira husi desizaun partidu nian no sei la fó votus ba kandidatu Prezidente Repúblika Jose Ramos Horta maibe ami sei fó votus ba kandidatu Lu Olo iha segunda volta ne’ebe maka sei hala’o iha 19 abril,” dehan Prota Voz, paulo hosi Brigada Assanami PD nian, liuhosi Komferensia Imprensa iha Eis Merkadu Comoro, Sabadu 16/04.
Nia haktuir razaun militante no simpatizante Partidu Demokratiku (PD) ne’ebé mak halibur aan iha Brigada Assanami sei la fó votus ba kandidatu Prezidente Repúblika Jose Ramos Horta iha eleisaun segunda volta, tanba militante lakohi kontribui ba dissolve Parlamentu Nasionál no hari’i tan governu da-sia hodi halo terus no halo kolen povu maubere ida ne’e.
“Nune’e mos ami sente triste no lamenta tebes ba Ramos Horta nian deklarasaun iha debate kandidatura Prezidensial ne’ebé mak dezakretida Rekursu Humanu sira ne’ebé mak produz husi UNTL, tanba ami maioria nu’udar povu kbiit laek ne’ebé la hetan oportunidade atu halao estudu iha Üniversidade Internasionál ne’ebé mak uluk Dotor José Ramos Horta estuda ba,” nia la menta.
Brigada Assanami sente la menta no triste tebes ba tim susesu balun husi Ramos Horta ne’ebé mak insulta ho liafuan “Fukit Manu Fulun no TBO” ba maluk timor oan sira ne’ebé buka moris iha ema nian rain.
“Ho razaun sira ne’e mak ami Brigada Assanami husi Partidu Demokratiku (PD) hakarak deklara katak ami nian votus sei fó ba Kandidatu Prezidente Repúblika ho númeru sorteiu 2 maka Francisco Guterres Lú Olo iha segunda volta,” nia afirma.
Nia konklui kandidatu Prezidente Republika Lu Olo sempre respeita ema hotu, garante paz no estabilidade, promove justisa sosiál ba ema hotu, defende organizasaun arte marsiais no rituais nu’udar organizasaun desportu iha Timor Leste nomós sai Prezidente ne’ebé kontra korrupsaun iha Timor Leste.
