Reportajen Adroaldo ‘Saretukau’
Konsumidor 1459 hahú uza ona kontador pre-pagu ba eletrisidade iha Postu administrative Laclubar, Munisípiu Manatutu husi loron 9 Dezembru, 2021.
Jerente Eletrisidade Timor-Leste (EDTL) postu administrativu Laclubar, José do Rosário hatete postu transformador 16 hosi total 17 iha postu Laclubar instala ona pre-pagu, sei falta de’it mak suku Funar tanba kondisaun estrada ne’ebé ladi’ak difikulta sira iha prosesu instalasaun nian.
“Postu transformador 1 to’o 17 iha 1459 konsumu, só suku Funar mak sei la tama tanba kondisaun estrada, motor lori prepagu ba ladi’ak, tanba ne’e sei he’in asesu estrada lai mak foin ba,” hatete Jerente EDTL Postu Laclubar José iha nia rezidénsia, 06/01.
Jerente ne’e hatete pre-peragu ne’ebé instala sei remata iha semana daruak fulan Janeiru 2022 nian iha postu administrativu Laclubar, tanba hela konsumidór oi-tuan de’it mak seidauk, tanba ne’e sira iha tarjetu loron tolu hodi bele finaliza.
Jerente ne’e hatutan katak, difikuldade oi-tuan ne’ebé sira hasoru iha Suku Manelima konabá ema no fatin ne’ebé atu fa’an pre-pagu, maibé konfirma ona ho kompañia no sira prepara ona laptop ida ho printer, para semena oin nia bele stand by ona hodi atende konsumidor sira iha Suku Manelima.
Jerente ne’e hato’o, iha postu administrative Laclubar so úniku Suku Fatumaquec mak ahi seidauk tama, tanba kondisaun estrada ne’ebé aat, tanba ne’e hein tinan ida ne’e, hosi empreza nasional bele prosesa iha tempu bai-loro nia laran atu sira mos bele asesu ona. Iha parte seluk iha Suku Batara nia aldeia We-ulun mak seidauk asesu tanba dook hosi suku, nune’e mos seidauk asesu ba estrada. Iha suku Manelima kuaze komunidade hotu asesu ona eletrisdade hela uma-kain balun de’it mak seidauk.
José konklui fundu ne’ebé kompañia hatama hamutuk $5000 ba pre-pregu hodi atende konsumidor iha postu Laclubar hotu iha loron 3 Janeiru, tanba ne’e kompañia nafatin hatama tan 5000 dolares hodi atende konsumidór sira.
