Reportajen Santina Lucia da Costa
Lian Eleitóres sira ba Prezidente Republika foun ba periodu 2022-2027, ho esperansa katak, Prezidente Republika foun tenki kria Paz Estabilidade ita nia rai, hadi’a povu nia moris, tau matan ba povu kbiit-la’ek sira, hadia ekonomia rai rai laran, kria kampu serbisu ba joven sira.
Tuir Eleitór, Quito Belo, idade 53, serbisu iha Ministeriu Turizmu Komersiu no Industria (MTCI), ho esperansa katak, Hanesan povu baibain nia hakarak, tenki estabilidade iha, hodi nune’e povu bele buka moris ho di’ak, no hadia ekonomia ne’ebé durante ne’e monu teb-tebes, ba krize ne’ebé naruk.
“Ohin hau ezerse ona hau nia direitu nu’udar sidadaun Timor-Leste hodi hili Prezidente Republika, ho ida ne’e, hili Prezidente Republika ida ne’ebé bele hatene povu nia susar no terus, Prezidente ida ne’ebé ba povu hotu no hala’o knár tuir Konstituisaun.” Hateten, Eleitór Quito Belo iha sentru votasaun Eskola SD Farol, Dili, 19/4.
Quito Belo, Sujere ba Prezidente Republika ne’ebé eleitu tenki hadia povu nia moris no serbisu hamutuk ho Governu oinsa atinji dezenvolvimentu iha rai ne’e nia laran, liuliu ba povu sira ne’ebé mukit no ki’ak no bele kore sira husi terus no susar ne’ebé durante ne’e sira infrenta.
Iha Fatin hanesan, Eleitór, Pascoela da Silva Ferreira, idade 53,, ho esperansa katak, Sé de’it mak eleitu tenki haree mós ba joven sira ne’ebé eskola hotu laiha fatin serbisu, Sai Prezidente tenki koalia ho governu hodi kria kampu serbisu ba joven sira.
“Hau senti kontenti mai ezerse hau nia direitu, hau nia votus ne’e importante, maibé hanesan povu simples, ami nia hakarak ida ne’ebé atu sa’e ba Prezidente Republika mak, buat hotu-hotu tenki la’o di’ak, iha paz estabilidade nia laran, ami lakohi kria tan problema, ami povu hakarak tur hakmatek hodi nune’e ami bele buka moris hodi hadi’ak uma laran.” Esperansa, Eleitór, Pascoela da Silva Ferreira.
Nia Subliña, No lider sira tenki fó ezemplu di’ak ba jerasaun foun sira hodi nune’e mai oin jerasaun foun sira bele banati tuir.
Entretantu, Estudante Universidade ba Paz, (UNPAZ), Lizia Bahkita de Araujo, idade 27 foti Fakuldade Ekonomia, Departamentu Jestaun Bankaria, ho espektativa ba Prezidente Republika foun, kria paz estabilidade no dezenvolve ita nia rai ho di’ak, atu nune’e labele mosu krize ekonomia, hadia edukasaun no saude.
Hau nia aspirasaun ba Prezidente Republika foun mak, tenki hamutuk ho lider sira seluk hakuak malu no fó liman ba malu hodi hadi’a ita nia nasaun, labele husik ami povu sira terus nafatin, hanesan iha tinan hirak liu ba ne’e mosu impase politika, impaktu covid-19, entaun ne’e sai afetadu tebes ba povu sira liuliu ba ami nia inan-aman agrikultór sira, tanba durante ne’e sira hetan rendimentu husi sira nia produtu lokál.” Hateten, Estudante Lizia Bahkita de Araujo.
Joven ne’e, realsa tan katak, Prezidente Republika tenki koopera ho Governu hodi hadi’a situasaun hanesan estudante nian, tanba impaktu husi Covid-19 ne’e, estudante sira difisil tebes tanba labele hala’o estudu ho di’ak, kuazé feriadu mak barak, estudu iha online ladun di’ak tanba internet rede ladun la’o, entaun nu’udar estudante lakon materia barak, ikus mai kualidade estudante ladun di’ak.
“Sé de’it mak bele sai Prezidente Republika, hau nia hakarak nia bele iha hanoin koalia ho governu kria kampu serbisu ba joven sira, tanba dadaun ne’e joven sira barak mak sai dezempregu, no barak mak ba serbisu iha rai liur, entaun hanesan Prezidente koalia ho Governu kriza kampu serbisu ba joven sira, hodi labele haruka hela joven sira ba rai liur pelu menus serbisu iha ita nia rai hodi nune’e osan sira ne’e serkula de’it iha ita nia rai laran, la’os ema estranjeiru sira mai serbisu ita nia rai, hanesan joven sai bainaka ba ita nia rai, hau husu ida ne’e labele akontese tan.” Aspirasaun, Joven Lizia.