Reportajen Silvino Freitas
Relasiona eleisaun prezidensiál ne’ebé liu daudaun, Komisaun Anti Korrupsaun (KAK) identifika ona funsionáriu no kargu xefia balun ne’ebé uza patrimóniu estadu ba interese partidaria iha ámbitu kampaíña eleisaun prezidensiál primeira no segunda volta.
Tuir Komisariu KAK Sergio Hornai hateten relatorio ba observasaun KAK nia ba kampaiña seidauk remata tamba kampaiña foin remata, bainhira halo hotu relatorio ekipa sei halo aprezentasaun hodi halo investigasaun.
“Ami identifika iha duni uzu patrimonio estadu ba atividade kampaiña ba interese partidaria nian tantu iha nivel nasional no munisipiu sira ka fatin fatin sira ne’ebé kandidatu sira nia reprezentante ba partisipa komísiu politiku sira uza patrimonio estadu nian” dehan Komisariu Sergio Hornai iha KAK Farol,(22/04).
Nia dehan identifikasaun ne’e hotu balun iha ona prosesu julgamentu, tamba iha kazu sumariu tenke atende kedas hosi orgaun polisia kriminal sira bainbain no parte seluk parte ne’ebé iha natureza krimi pekulatu nian investigasaun sira sei halo nunee bele husu responsabilidade ba ema sira ne’ebé uza duni patrimonio estadu nian ba atividade partidaria sira ne’e.
“Bainhira iha notisia krime sira mosu ita tenke halo identifikasaun atu bele hatene nia verasidade, serake informasaun sira ne’ebé espalla los ka lae iha duni infrasaun, iha duni intensaun no ho kulpa sira nian hakarak atu lori sasan sira ne’e ba tuir atividade partidaria ne’e” nia dehan.
Nia dehan infrasaun hirak ne’e akontese duni iha ministriu balun no iha ona faze investigation ne’ebé lao ona atu bele deskobre investigation ne’e halo ba notisia ne’ebé viral la viral no balun ne’ebé KAK observa no identifika rasik.