Home Uncategorized FOKUPERS Atualiza Misaun Durante 25 Anos ba Prezidente Republika

FOKUPERS Atualiza Misaun Durante 25 Anos ba Prezidente Republika

64
0

Reportajen Santina Lucia da Costa

Ekipa FOKUPERS hala’o enkontru ho Prezidente Republika, Dr. José Manuel Ramos Horta, hodi atualiza misaun FOKUPERS nian durante 25 anos no konvida mós Prezidente hodi partisipa iha selebrasaun tinan FOKUPERS ba dala-25, no sei halo marsa iha loron 8 Jullu 2022.

Hafoin enkontru Diretóra Ezekutiva FOKUPERS, Maria Fátima Pereira Guterres hateten, objetivu mai hasoru Prezidente Republika Dr. José Manuel Ramos Horta tanba FOKUPERS ninia ezistensia ba 25 anos ona. Tanba ne’e  mai atualiza informasaun kona-ba serbisu misaun FOKUPERS nian durante 25 anos.

 Diretóra Ezekutiva FOKUPERS, hatutan objetivu seluk mak, lei kontra violensia domestika ninia implementasaun atu tama ona ba 12 anos, entaun FOKUPERS atu halo inisiativa ida oinsa bele marsa hodi hasa’e ema nia konsiensia kona-ba hapara Violensia Domestika (VD).

“Ita mós konvida Prezidente Republika, tanba momentu lei kontra VD, Prezidente Republika ninia tempu anterior Xefi Estadu mak promulga, entaun hakarak konvida fali Prezidente Republika atu bele hamutuk ho Organizasaun Sosiedade Sivil hotu no mós organizasaun sira hotu ne’ebé serbisu ba asuntu Violensia Bazeia ba Jeneru (VBJ) no mós kontra VBJ, atu bele halo marsa ida, hodi hasa’e ema nia konsiensia atu bele fó mensajen ba komunidade katak, violensia ne’e la’os kultura Timor nian.” Dehan, Diretóra Ezekutiva FOKUPERS, Maria Fátima Pereira Guterres iha Palasiu Prezidensial, Nicolau Lobato, Bairu-Pite, 28/6.

FOKUPERS mós fahe tan informasaun liga ho Prezidensia Republika nia programa hanesan, Empoderamentu ba Ekonomia, Edukasaun, oinsa bele suporta mós organizasaun sosiedade sivil sira ne’ebé serbisu mós iha area relevante sira inklui FOKUPERS.

Iha sorumutuk ne’e, Prezidente Republika, Ramos Horta iha disponibilidade, hodi partisipa iha selebrasaun Ezistensia FOKUPERS ba dala-25 sei halo atividade Marsa hahú husi Jardin 5 de Maiu to’o Palasiu Prezidensial, Nicolau Lobato.

“Marsa ne’e lolos ba kontra violensia domestika iha loron 7 fulan Jullu maibé loron 7 jullu ne’e monu iha kinta-feira, entaun prefere ba bai ha Sesta-Feira para Marcha hotu tiha ita taka iha Palasiu Prezidente nian.” Realsa, Diretóra Ezekutiva FOKUPERS.

No Prezidente Republika nia rekomendasaun ba organizasaun ne’ebé serbisu iha asuntu hapara Violensia Bazeia ba Jeneru (VBJ), tantu iha prevensaun, protesaun no mós asesu ba justisa nian bele nafatin kontinua FOKUPERS nia misaun, serbisu ne’e hotu di’ak.

Entretantu, kona-ba Feto maluk traballadór na’in hitu iha Dubai, Maria Fátima Pereira Guterres, hateten, kazu ida ne’e iha ona prosesu, ita nafatin respeita desizaun Justisa nian ne’ebé la’o. Fokupers la’os halo atendimentu direita ba asuntu traballu ninia, maibé iha organizasaun sira seluk ne’ebé halo atendimentu ba ida ne’e, entaun sé karik maluk feto sira presija asistensia ruma, ba iha uma mahon ita nafatin kria kolaborasaun iha ne’eba.

Iha Enkontru refere partisipa husi Diretóra Ezekutiva FOKUPERS, Maria Fátima Pereira Guterres, Vise-Diretóra FOKUPERS, Domingas Amaral, Cancio Xavier hanesan Membru Konsellu FOKUPERS no Silveiro Pinto hanesan Membru FOKUPERS.

Print Friendly, PDF & Email

LEAVE A REPLY

Please enter your comment!
Please enter your name here