Reportajen Joselina dos Santos
Sosiedade Sivíl liu husi Fundasaun Mahein (FM), liuhusi konferénsia imprensa hodi hato’o konaba kriasaun Lei Organizasaun Investigasaun Kriminál, ne’ebé la solusiona polémika no rivalidade entre Polisia Nasionál Timor-Leste (PNTL), ho Polisia Sientífika Investigasaun Kriminál (PCIC), tanba ne’e lei refere kontinua fó implikasaun ba povu Timor-Leste.
Liuhusi konferénsia imprensa, Porta Voz Fundasaun Mahein (FM), Abel Amaral hateten ho prezensa lei ida ne’e, FM hato’o apresiasaun ba membru Parlamentu sira, tanba konsege iha Lei investigasaun kriminál, maibe FM la aumenta ho konteúdu husi lei refere, tanba tuir lei ida ne’e fó sai ba públiku maibe polítiku na’in sira la utiliza ka la halo estudu ruma kona-ba lei ida ne’e, ninia implikasaun sira tantu implikasaun polítika, tékniku finanseiru no sosiál bainhira lei ne’e vigor.
“Polítiku na’in sira halo lei nunka konsidera ka atu halo peskiza ruma kona-ba realidade Timor-Leste nian, tantu aspetu sosiál no lala’ok natureza seguransa nasionál iha Timor-Leste kultura, tanba lei ne’e copy tutan husi nasaun seluk, ne’ebé ko’alia ho lian Portugés”, dehan, Porta Voz FM Abel Amaral iha komunikadu Imprensa, iha Salaun Enkontru FM, Bairo Central Dili, 25/07.
Nia hatutan Lei ida ne’e sira konsidera frajilidade ba instituisaun sira ne’ebe mak durante ne’e hala’o nia kna’ar hanesan investigasaun kriminál, liu-liu PNTL, se lei ne’e mak fó podér boot liu ba PCIC signifika ema hotu hatene katak PCIC nia númeru ne’e sei limitadu.
PCIC seidauk kobre territóriu tomak ho lei ida ne’e, saida mak PCIC sei halo tanba sá mak lider no órgaun soberania sira kria lei ida ne’e, “oinsa atu halo tarefa servisu entre PNTL ho PCIC, nune’e instituisaun rua ne’e hala’o serbisu hamutuk, koordena no kompleta malu, la’os ita halo lei ida ne’e copy fali fali Portugal nian, ne’e ita atu halo konflitu entre instituisaun estadu”.
“Ita la hatene saida mak iha desizaun ne’e nia kotuk tanba sa mak lider sira la aprende husi ita nia konflitu sira ,ne’ebe dahluk lider sira la kuidadu sira rasik mak kontinua kria impase instituisaun entre instituisaun estadu iha Timor-Leste”, nia tenik.
Lider sira tenke hatene investimentu hira mak investe ba instituisaun PNTL iha tinan 20 nia laran, tanba prezensa lei ne’e ita apresia ba servisu ne’ebe instituisaun sira hala’o durante ne’e diak, “ita hatene katak PNTL kordena hamutuk ho F-FDTL servisu ho di’ak ho prezensa lei ida ne’e bele ka lae PCIC foti medida sira ne’ebe durante PNTL halo ona”.