Reportajen Joanina Casmiro
Relasiona ho asaun pasifiku ne’ebé Aliansa Maubere Nasionál (AMN), juventude no uversitariu sira halo ne’e atu asegura povu Timor-Leste nia osan husi grupu elite sira nia interese. Ho ida ne’e Movimentu Tane RDTL, knsidera Parlamentu Nasional (PN) laiha pensamentu nasional hodi realiza komprimisiu nasional libertasaun povu.
Portavos Movimentu Tane RDTL, Bento Alberto Carlos, hateten, relasiona ho asaun pasifiku ne’ebé organiza husi AMN, joventude no uversitario sira hotu durante loron hirak nia laran, ho objetivu atu asegura povu Timor-Leste nia osan husi grupu elite sira nia interese. PN laiha pensamentu rasional hodi realiza komprimisiu nasional ba libertasaun do povu, nune’e bele atinji objetivu do estado mak preve iha Konstituisaun RDTL artigo 6.
“Ho asaun pasifiku ne’e, Movimentu Tane RDTL haree katak reprezentante povu iha uma fukun PN laiha ona seridade, tanba ita hatene, PN hanesan orgaun fiskalizadór maibé to’o agora PN la hala’o fiskalizasaun. Ikus mai mosu problema hanesan, prosesu edukasaun iha VIII Governu grave tebe-tebes, tanba Ministeriu Edukasaun Armindo Maia nomea fali funsionario kontratadu ba Kordenadór no Direktór da Eskola. Pior liu kontratadu sira maka halo avaliasaun dezempenho ba professór permanente ho level 5, PN rasik lahatene,” Dehan Portavos Bento ba Jornalista sira iha Salaun Konferensia HAK, kuarta 16/11.
Nune’e mós, povu iha Suku Manelobas ne’ebé hanesan mate restu husi Posto Administrativo Maubisse, Munisipiu Ainaro ba luta libertasaun da patria, durante ne’e halerik hela ba ahi no estrada, Deputadu sira lahalo fiskalizasaun maibé sira diskuti maka pazero halo povu suco Manelobas lakon esperansa iha nia rain rasik.
“Parlamentu Nasional tenke konsentra ba diskuti politika dezenvovimentu nasional, laos koalia fali maka luta no terus tamba estadu rekoinese ona. Hau jerasaun luta nain kebetulan deit hau moris ikus, maibé hau iha vontade ba luta libertasaun povu, tanba luta ne’e mai husi hau nia vontade, hau iha vontade tanba responsabilidade hanesan sidadaun,” tenik nia.
Ho ida ne’e, Movimentu Tane RDTL husu ba PN Halakon Lei Pensaun Vitalisia, Hapara tradisaun sosa kareta no laptop no konsentra ba iha diskusaun politika ba dezenvalvimentu nasionál.