Reportajen Adroaldo “Saretukau”
Departamentu Fisioterapia, Centro Nacional de Rehabilitação (CNR), Becora, Díli, sei menus fatin atendimentu terapia ba ema ho defisiénsia, nune’e labele akumula ema ho kuantidade barak, no sei menus tékniku terapia hodi atende pasiente difisiénsia sira.
Xefe Departamentu Fisioterapia, Auria da Piedade Pinto, iha nia knaar fatin Becora, informa, sira iha difikuldade ho fatin atendimentu ne’ebé ki’ik, nia dehan fatin halo terapia ba ema ho defisiénsia ki’ik, entaun tékniku na’in ida de’it mak atende pasiente sira.
“Ezemplu hanesan labarik ki’ik ida ami halo terapi, balu tuur balu hamriik no ami hanorin família atu fila ba uma karik kontinua halo saída mak ami halo ba pasiente ne’e. Família iha kestaun uma laran, nune’e ema ida mak hein ema na’in 2-3 ne’e sente labele, terapia ne’e labele ema ida mesak mak halo maibé ami husu família nia koperasaun bele kontinua terapia iha uma, ami terapia maluk difisiénsia sira ne’e oras ida de’it, entaun oras barak nee tenki hamutuk ho família sira,” dehan Xefe Departamentu Auria.
Tuir sira nia observasaun no avaliasaun katak terapia labarik, nia kondisaun sei di’ak fila-fali, maibé kestaun mak semana ida sira atende terapia dala rua ho rasio oras rua kada semana, nune’e oras barak pasiente hamutuk ho nia família, tanba ne’e nia husu atu família kontinua terapia iha uma hodi prevene pasiente nia moras atu labele ba grave liu.
“Konabá tempu ne’e rasio de atendimentu, atende ema ida kada oras ida nia laran, dala ruma ema mai tuir terapia kada loron kuaze ema na’in 30-34, maibé ami iha tékniku na’in 9, rasio de atendimento tékniku menus, kompara ho pasiente, atendimentu barak entaun ami tenki atende ema ne’ebé mak adulto ho tempu ne’ebé oras 1 ou 2 tanba ema balun mai ho oras ne’ebé la hanesan entaun pasiente antrian barak,” informa Auria.
No iha terapia ne’e depende ba ema ida-idak nia kondisaun fíziku, balu tohar ou fraktu, uza ai-tonka, balu ho kazu neurolojia ne’ebé ligadu estragus kakutak ho saraf ne’e iha sira nia moris tomak tenki iha terapia. Balu ho stroke kaman terapia fulan ida ka rua bele di’ak ona, maibé ida ne’ebé ba ho grave tenki terapia rutina, dehan Auria.
Xefe Departamentu ne’e nia lia-menon ba família difisiente sira katak atu halo nafatin terapia ba família sira ne’ebé ho difisiénsia, atu halo edukasaun terapia nune’e bele hakman sira nia saúde sai di’ak liu atu labele ba grave. Xefe Departamentu ne’e husu atu antes lori mai tenki ba konrola ka konsulta iha sentru saúde hodi hatene nia kondisaun moras.
