Reportazen Francisco JDA
Relasiona ho deklarsaun hosi Diretor Centro Integradu Gestaun Krize (CIJK), Brigadeiru Jeneral, Joao Miranda ‘Aluc Descartes’ bainhira hasoru malu ho Primeiru Ministru, Taur Matan Ruak hodi koalia konaba posibilidade governu sei extende tan Estadu Emerjesia ba dalima, tanba hare ba nasaun vinzinhu ne’ebe virus Corona kontinua sae.
Ba asuntu ida ne’e Neon Metin halo entrevista ho Akademista Julio Aparicio.MHG nia observasaun katak, nasaun hotu infrenta COVID-19 maibe tenki hare entermos de implementasaun presiza adabta ho kondisaun estadu ida-ida nian no husu atu kontinua kontrola fronteira maritima no kontinua desinfektan atu moras Covid-19 ne’e labele daet ba ema.
“Ba ha’u estadu emerjensia ita aplika, mak kontrola didiak fronteira Suai, Maliana no Oe-cusse, ho mos alfandega sira, maibe se lae ita koalia estadu emergencia maibe ninia implementasaun la dun lao ne’e, orsida fo impaktu ba povu ema hare hanesan teatru ne’e labele, tamba ne’e mak labele koalia deit mas tenki implementa pelumenus hatudu buat ruma, atu povu dehan los duni ida ne’e mak estadu emerjensia, se ita koalia estadu emergencia mas ninia implementasaun la lao, ne’e problema oituan”, hatete akademista Julio Aparicio iha nia knaar Fatin Kampus Merah Kaikoli ,25/08
Akademista ne’e mos hateten durante estadu emerjensia iha fulan tolu nia laran pelemenus hare netik atividade ruma hosi estadu emergencia ne’e, maibe ba faze dahat ne’e observasaun hosi akademista katak ninia frekuensia ne’e kiik liu no la dun hatudu iha publiku.
“Ha’u labele dehan intensaun politika maibe governu tenki iha konsiente katak halo buat ida, tenki justu no labele hamosu konfuzaun ba povu nia opiniun, tanba ita Timor ne’e orsida deskonfia malu buat oin-oin deit, tanba ne’e mak governu tenki hanorin povu ho maneira ne’ebe justu no transparan para ema bele dehan katak sira halo ne’e los”, hateten Julio Aparicio
Nia mos dehan lakohi estadu emerjensia ne’e hanesan intensaun politika deit, maibe governu presisz foti desizaun transparante, iha programa no planu ne’ebe nakloke atu povu mos hatene.
