Home Notisia Disintendementu JU,S ho Tribunal Oecusse Kona Ba Asesu Notifikasaun Adia Julgamentu Richard...

Disintendementu JU,S ho Tribunal Oecusse Kona Ba Asesu Notifikasaun Adia Julgamentu Richard Daschbach

494
0
Tribunal Oecusse (Foto: Timor Post)

Akontese disintendementu iha Tribunal Oecusse, ohin (26/05) bainhira advogado hosi JU,S atu tama ba resintu Tribunal nian. JU,S konsidera Juiz Administrador Oecusse Dr. Hugo Pui viola nia dever atu respeitu knar advogado nian. Maibe Ofisial Justisa Tribunal Oecusse informa katak advogado JU,S la tuir regra karantena.

Informasaun hosi JU,S hato’o ba Neon Metin haktuir katak ohin dader, mais-ou-menus 10:30 Ekipa advogadu JU,S desloka ba Tribunal Oecusse, ho autorizasaun no akompañamentu hosi ekipa saúde RAEOA. Deslokasaun refere nesesáriu atu asegura advogadu nia asesu ba notifikasaun adiamentu julgamentu ne’ebé Tribunál fó-sai iha loron-24 Maiu relasiona ho kazu eis-padre ne’ebé akuzadu abuzu seksuál dala 14, violénsia doméstika no pornografia labarik.

“Bainhira advogadu to’o iha Tribunal nia oin, Juiz Administrador Dr. Hugo Pui, fó orden orál ba ofisiál justisa atu la autoriza advogadu sira tama iha resintu tribunal,” JU,S esplika via WhatsApp ba Neon Metin.

“Ekipa JU,S kestiona instrusaun ne’e, haree katak deslokasaun kumpre ho protokolu saúde tuir kompeténsia RAEOA nian,” JU,S hatutan.

JU,S nia informasaun mos haktuir katak liu minute 10 prezensa advogado sira nian, Komandante PNTL mai iha Tribunál akompañadu ho membru na’in 6 ka 8 no depois Komandante tama ba tribunál laran, sai mai liur no informa ba advogadu hosi JU,S katak “Juiz Administradór la autoriza ita-boot sira tama ba tribunal.”

“JU,S komprende katak Juiz Tribunál la iha kompeténsia atu intervein diretamente ba jestaun sanitária RAEOA nian. Juiz hotuhotu iha mós devér atu respeitu profisaun advogadu. Juiz hatudu ho klaru viola devér ida-ne’e hosi membru setór judisiáriu,” JU,S lamenta.

JU,S hato’o katak sei sei hato’o keixa formál ba CSMJ kona-ba violasaun grave ida ne’e.

Bainhira Neon Metin konfirma disintendementu ne’e ho Ofisial Tribunal Oecusse, Julio Nunes informa katak los duni mosu disintendementu entre advogado JU,S nian ho Tribunal Oecusse.

“Los duni iha disintendementu ida ne’e. Tanba tuir regras karantena ne’e 14 dias. Advogado JU,S nian fo halo karatena 10 dias deit. Ami nia Juiz mos mai halo karantena 14 dias mak sai,” Julio esplika via telefone.

Kona ba prezensa polisia nian, Julio hatete katak, “Ami koko halo mediasaun maibe la simu malu tan ne’e husu polisia mai. Maibe la akontese buat ruma”.

Neon Metin mos konfirma informasaun nebe relasiona ho karatena advogado JU,S nian ho Vice Komisaun COVID nian, Manuel da Costa via telefone.

“Tuir loloos ne’e sira tenke karantena 14 dias maibe tanba sira ezizi dehan servisu importante ne’e mak halo akompanamentu ba Tribunal. Loloos ne’e ami sama sekali la fo,” Manuel da Costa esplika.

Tribunál adia prosesu julgamentu dala 3 tiha ona no tuir JU’S adia julgamentu ne’e bazeia ba pedidu no inasaun hosi defeza.

Iha komunikadu imprensa JU,S nian horiseik (25/05), JU,S deklara ninia insatisfasaun ba desizaun husi Tribunál, ne’ebé la hatudu respeitu ba vítima nia pozisaun no la hatudu seriedade atu konklui prosesu ne’ebé rejistu ba dala ikus besik iha tinan 3 liubá. JU,S hakfodak ho desizaun Tribunal no konsidera katak desizaun ne’e sei impaktu ba konfiansa ne’ebe fo ona ba Tribunal hodi hare kazu Topu Honis nian.

JU,S Jurídico Social, nu’udar empreza sosiál ne’ebé ninia advogado reprezenta vítima 15 hosi abuzu seksuál hasoru eis-Padre, la satisfeitu ho desizaun hosi Tribunál atu adia julgamentu.

Kazu Topu Honis mak nudar kazu pedofilia ne’ebe mosu ba publik dahuluk iha Timor-Leste. Kazu ne’e involve eis-Padre Richard Dascbach hosi kongregasaun SDV nian. Ho rezultadu investigasaun Kongregasaun Dutrina ba Fe nian iha Vatikanu, Amo Papa Francisco hasai tiha ona Richard Dascbach nudar padre iha tinan 2018. Eis-Padre ne’e agora dadaun tuir hela prosesu justisa ho kondenasaun kazu pedofilia, pornografia labarik no violensia domestika.

Print Friendly, PDF & Email

LEAVE A REPLY

Please enter your comment!
Please enter your name here