Home Notisia Angela ho Merita Sei Hela Iha Lona Okos, Oan Sira La Asesu...

Angela ho Merita Sei Hela Iha Lona Okos, Oan Sira La Asesu Programa Eskola Hosi Uma

842
0
hela fatin Angela ho Merita iha sentru evakuasaun Maslidun. [Foto: Francisco JDA | 02.06.2021]

Reportajen Francisco JDA

Hela iha lona okos tanba afeta hosi inundasaun, oan sira labele asesu programa eskola hosi uma tanba laiha telefone no televisaun.

Akontesimentu dezastre natural iha loron 4 Abril, hamosu inundasaun boot, rezulta komunidade barak iha Dili hetan afeta, tanba konsege akontese rai monu, halakon ema nia vida, lakon uma no sasan.

Neon Metin hakbesik-an ba sentru evakuasaun iha Tasi Tolu Maslidun hodi hare besik situasaun komunidade afetadu ne’ebe to’ohin loron sei hela iha lona okos, tanba sira labele fila uma, tanba uma hetan estragus makaas.

Situasaun iha Maslidun fo impaktu boot ba labarik sira ne’ebe sei hela iha lona, tanba sira labele partisipa eskola online ka eskola husi uma, hodi asesu hosi programa edukasaun ne’ebé Ministériu Edukasaun Juventude no Desportu (MEJD) implementa.

Impaktu hosi inundasaun no surtu COVID-19 fo duni impaktu ba estudante sira hodi partisipa iha prosesu aprendizajen, sira laiha telefone no laiha televisaun iha sentru evakuasaun.  

Tuir dadus ne’ebé Neon Metin asesu hosi komunidade sira katak família hamutuk 66 resin mak dadaun ne’e nafatin hela iha lona okos iha Tasi Tolu, Aldeia 12 Novembro

Neon Metin dada lia ho komunidade afetadu hosi inundasaun, nu’udar mós vendedór ambulante  Angela Colo hato’o katak,  ho situasaun serka sanitaria no konfinamentu obrigatóriu, fo impaktu hodi buka moris mós, dalan mós taka oinsá bele buka osan hodi sustenta oan sira?

” Ha’u sente triste tebes ita nia oan sira eskola buka moris mós la di’ak, uma bee sa’e hela agora ami  iha lona okos. Lona mós naklees hotu ona, ami presiza liu bee mós, ba tein, han tanba bee mós iha ne’e susar liu, kuandu bee mós la mai, ami tein ho bee  masin,” hatene Angela Colo iha Tasi Tolu, 27/05

Ho situasaun hosi vendedora ambulante, Angela Colo ne’ebé to’o ohin loron sei iha hela sentru evakuasaun, nia rekomenda ba governu ajuda lona tanba, tanba nia preokupa hela kleur oituan tanba uma bee nakonu hela.

Iha Fatin hanesan, afetadu hosi inundasaun, Merita Andrade ne’ebé iha oan na’in haat, hela hamutuk iha lona okos, ba Neon Metin nia dehan nia oan sira labele partisipa iha prosesu aprendizajen liu hosi eskola online ka eskola hosi uma, tanba laiha telefone no televizaun iha sentru evakuasaun

“Ha’u nia oan na’in haat mak eskola maibé daudaun ne’e sira la tuir eskola online, tanba telefone la iha eskola online presiza pulsa, osan de’it mós ami buka susar ona, oinsá mak bele sosa tan pulsa atu oan sira bele eskola online, ida ne’e mak preokupasaun ne’ebé boot mai ami husu mós ba governu atu apoiu hahán, no bee mós mai ami,” konfesa Merita Andrade Iha Tasi Tolu, 27/05

Print Friendly, PDF & Email

LEAVE A REPLY

Please enter your comment!
Please enter your name here