Reportajen Filomena da Conceição
Kandidatu Nuno Florindo husi Suku Maluro, Postu Administrativu Quelicai, Munisipiu Baucau, sai manan na’in ba Elisaun Suku iha Primeira volta ho votus 298 husi kandidatu na’in lima no kontinua hakat ba segunda volta hamutuk ho kandidatu Jerónimo de Carvalho ho votus 174.
Kandidatu Nuno Florindo, nu’udar estudante finalista iha Fakuldade Direitu, Universidade de Díli (UNDIL), deside kandidatu aan ba Xefe Suku Maluro tanba hetan apoiu maka’as husi komunidade Suku Maluro.
“Ha’u rasik deside kontribui ba Suku Maluro tanba hetan apoiu no suporta maka’as husi komunidade sira iha aldeia Luilobu-Uagua, Namanei, Samafano, Uaroro no bazeia ba prinsípiu tuir lei Nu.9/2016, katak ha’u prienxe duni rekezitus sira ho ida ne’e mak ha’u hakarak kandidatu aan ba xefe Suku”, dehan kandidatu Xefe Suku Maluro, Nuno Florindo ba Jornalista Neon Metin, iha Sede Suku Maluro, 31/10.
Nia salienta, hanesan kandidatu ida sempre mai ho misaun no vizaun hodi lori dezenvolvimentu ida di’ak ba komunidade sira iha Suku Maluro ho lema “ema hotu nia haksolok ba ita nia esprensa”.
“Ha’u iha vizaun no misaun mak atu tane aas prinsípiu transparente, akontabilidade, defende lia loos, neutro no próspero” dehan Nuno.
Nia esplika, programa prioridade ne’ebé Nia iha hodi lori ba segunda volta mak hanesan, promove no tane aas relijiaun, kultura, lisan no organizasaun sira, atu akumula intelektual no veteranu sira, mobilizasaun joventude, mobilizasaun ba dezenvolvimentu suku hodi kaer metin transparánsia no akontabilidade, planu dezenvolvimentu ba rekursus umanus, kontribui sede kada aldeia, mobilizasaun produtu agríkola no setor ortikultura.
“Ha’u nia mensajen ba komunidade sira iha Suku Maluro mak, ha’u iha duni kapasidade ne’ebé natoon hodi kontribui ba dezenvolvimento iha suku ida ne’e, ha’u hakarak husu sira nia apoiu liu husi sira nia votus hodi bele konfiansa mai ha’u hodi dezenvolvimentu ba suku Maluro,” nia husu.
Entre tantu, Suku Maluro kompostu husi Aldeia haat (4) hanesan, Luilobu-Uagua, Namanei, Samafano, Uaroro. Kandidatu Xefe suku Maluro ba primeira volta hamutuk na’in lima ho kada votus mak Elvino Belo Gusmão ho 28 votus, Jerónimo de Carvalho ho 174 votus, João da Conceição ho votus 81, João Jerónimo Soares total votus 122 no Nuno Florindo ho total 298 votus.
