Home Analisa Lei Limite Idade Prezidente Repúblika 2022-2027 Viola Konstituisaun RDTL

Lei Limite Idade Prezidente Repúblika 2022-2027 Viola Konstituisaun RDTL

1907
0
Moises Vicente Alumni Universidade da Paz-(UNPAZ), Faculdade de Direito no Ativista. [FotoL Dokumentu Privadu | 17.08.2020]

Reportajen Moisés Vicente

Lei Limite Idade Prezidente Repúblika 2022-2027 Viola Konstituisaun RDTL

Introdusaun

Timor-Leste infrenta hela moras pandemia global COVID-19, maibé sura deit loron, sura deit fulan tama ona tinan foun 2022 povu sira prepara-an atu ba festa eleisaun Prezidensial iha Timor-Leste. Kandidatu Prezidente Repúblika (PR) feto ho mane sei hahu komesa halo kampañia polítika ba nia povu iha tinan oin 2022 ne’ebé sei fó orariu kalendariu kampañia no orariu Eleisaun Prezidensial nia husi STAE no CNE. Repúblika Demokratika Timor-Leste (RDTL), ukun rasik-an tinan 19 liu ona depois komemorasaun Restaurasaun Independesia loron 20 Maiu 2002 liubá. Istória hatudu mai ita hotu katak, antes Organizasaun Nasoens Unidas (ONU/UN) atu entre poder ba estado Repúblika Demokratika Timor-Leste iha momentu ne’ebá. Eleisaun dahuluk hahu iha tinan 2001 hili Asembleia Kontituante ba Deputadu/a sira hamutuk na’in 88. No eleisaun ba Prezidente Repúblika iha loron 14 Abril 2002, povu hili kandidatu na’in rua iha momentu ne’ebá maka Sr. Francisco Xavier do Amaral vs José Alexandre Kay Rala Xanana Gusmão. No ikus mai povu nia hakarak ka povu nia eskuilha vota tuir ladan demokrasia maka Xanana Gusmão sai eleitu Prezidente Repúblika foun, momentu ne’ebá. Prezidente Repúblika (PR) maka José Alexandre Kay Rala Xanana Gusmão ba periodu 2002-2007 mandatu tinan 5.

Iha tinan 2007, Timor-Leste hala’o tan ninia eleisaun jeral, iha ne’ebé hahu ho eleisaun Prezidensial no remata ho eleisaun Parlamentar iha fulan-Juñu nia rohan. Eleisaun Prezidensial tenki hala’o dala rua, tamba iha primeira volta, ne’ebé hala’o iha loron 9 fulan-Abril, husi kandidatu konkorente sira hamutuk na’in ualu (inklui mos feto ida) la iha ida maka hetan votu maioria absoluta. Entaun, kandidatu konkorente sira na’in rua maks hetan votu barak liu Francisco Guterres (Lú-Olo) vs Dr. José Manuel Ramos Horta tenki hakat ba no konkore hikas iha segunda volta, tuir Lei Eleisaun Prezidensial nian haruka. Momentu ne’ebá povu hili PR tuir dalan demokrasia, maka PR eleitu, Dr. José Manuel Ramos Horta ba periodu 2007-2012 mandatu tinan 5. Kontinua povu hili tuir liu dalan demokrasia, eleisaun ba PR iha 2012-2017, maka povu vota ba Jeneral Taur Matan Ruak (TMR). No inklui atúal agora Prezidente Repúblika periodu 2017-2022, Dr. Francisco Guterres, ‘Lú-Olo’. Hakerek Na’in husu ho pergunta se los maka sei manan iha eleisaun foun Prezidente Repúblika ba periodu 2022-2027? Povu sei eskuilha kontinua hili mantein jerasaun tuan ka jerasaun foun?

Perguntas iha leten, atu resposta agora dadaun famozu los iha media sosial sira hanesan iha facebook, media imprimi sira, jornal diaria sira, media online sira. Informa katak jerasaun tuan sira mos hakarak kontinua kandidata-an nafatin ba kargu Prezidente Repúblika hanesan, Tenente Jeneral, Lere Anan Timur (Partidu FRETILIN ou Independente) seidauk hatene, Dr. José Manuel Ramos Horta (Independente). Ba jerasaun foun sira maka, Virgílio da Silva Guterres (Membru RENETIL), Joaquim Vonseca (Membru RENETIL), Nivio Magalhães (Partidu Democrático-PD), Agio Pereira (Partidu CNRT), Dionísio Babo Soares (Partidu CNRT), Avelino Coelho (Partidu PST). Ba kandidatu Prezidente Repúblika feto sira, hanesan mana Maria Domingos Fernandes Alves ‘MIKATO’ (Independente), Fernanda Borges (Partidu Unidade Nasional-PUN), Milena Pires (Independente) no sira seluk-seluk tan. Tuir hakerek na’in nia observasaun iha tinan 20 ba kotuk katak, kandidatu Prezidente Repúblika se los maka iha kandidatu PR nia kotuk. Exemplu hanesan maun Xanana Gusmão hatudu kandidatu PR refere, parese nia kandidatu PR refere sei manan metin iha eleisaun Prezidente Repúblika tuir mai ne’e tinan 2022. Hakerek Na’in nia hare’e, povu Timor-Leste nia la hare kandidatu PR nia programa tinan lima atu halo saida?. Maibé hare fali figura Lider Nasional, exemplu iha tinan 2007, Xanana tula liman ba Dr. José Manuel Ramos Horta (Independente) nia manan duni. Iha tinan 2012, Xanana tula liman ba maun Jeneral Taur Matan Ruak (Independente) nia manan duni. No iha tinan 2017,  Xanana tula liman ba Dr. Francisco Guterres ‘Lú-Olo’ (Partidu FRETILIN) nia manan duni. Realiadade hatudu duni mai ita hotu katak maun Xanana Gusmão sei moris susar uaituan kandidatu PR seluk bele manan murni. Hakerek nain fiar metin katak tinan 2022-2027 maun Xanana tula liman ba kandidatu PR ida ne’ebé mos parese nia kandidatu PR refere sei manan metin iha eleisaun Prezidensial tuir mai.      

Iha parte seluk, hakerek nain nia observasaun katak Parlamentu Nasional (PN) atu halo “Lei Limite Idade Kandidatu Prezidente Repúblika (PR) Depende ba Parlamentu Nasional”. (Fontes foti iha Jornal Diariu Timor-Post, loron Sesta-feira, 7 Maio 2021). Sei ida ne’e maka Parlamentu Nasional aprova duni sai hanesan Lei hodi regula kandidatu Prezidente Republika nia idade. Ida ne’e hatudu katak Parlamentu Nasional rasik maka viola ona Lei Inan Konsitiuisaun Repúblika Demokratika Timor-Leste. Diak liu lalika halo lei limite idade kadidatu PR nian ida ne’e.   

Baze legal, la’o tuir konstituisaun da RDTL maka obriga ita hotu katak iha ne’ebé Artigu 74 hatete nune’e 1. Prezidente-Repúblika maka Xefe-Estadu, símbulu no garantia independénsia nasionál no unidade Estadu nian, no instituisaun demokrátika sira-nia funsionamentu regulár. 2. Prezidente-Repúblika maka Komandante A’as liu Forsas Armadas nian. (1. O Presidente da República é o Chefe do Estado, símbolo e garante da independência nacional, da unidade do Estado e do regular funcionamento das instituições democráticas. 2. O Presidente da República é o Comandante Supremo das Forças Armadas). Iha Konstituisaun da RDTL Artigu 75hatete katak 1. Bele tuir kandidatura ba Prezidente Repúblika sidadaun timoroan sira-ne’ebé, iha ilas hotu tuir mai ne’e: a) Sidadaun nanis; b) Iha tinan mínimu 35; c) Ho kapasidade di’ak; d) Ne’ebé hetan proposta husi sidadaun hili-na’in mínimu nain rihun lima. 2. Prezidente-Repúblika kaer mandatu to’o tinan lima nia laran no ninia knaar remata wainhira Prezidente foun simu pose. 3. Prezidente-Repúblika nia mandatu bele hetan renovasaun dala-ida de’it. (1. Podem ser candidatos a Presidente da República os cidadãos timorenses que cumulativamente: a) Tenham cidadania originária; b) Possuam idade mínima de 35 anos; c) Estejam no pleno uso das suas capacidades; d) Tenham sido propostos por um mínimo de cinco mil cidadãos eleitores. 2. O Presidente da República tem um mandato com a duração de cinco anos e cessa as suas funções com a posse do novo Presidente eleito. 3. O mandato do Presidente da República pode ser renovado uma única vez).

Iha sorin seluk, Eis Prezidente Repúblika (PR), Dr. José Manuel Ramos Horta afirma, alterasaun ba lei Eleisaun Prezidensial (EP) labele kontra letra espíritu Konstituisaun Repúblika Demokrátika Timor-Leste (RDTL). Maske Governu halo ona alterasaun ba lei EP, maibé Horta dehan to’o agora nia seidauk hare alterasaun refere maibé husu alterasaun ne’e labele viola espiritu konstituisaun RDTL. ”Hau seidauk hare alterasaun ne’e, hau hatete deit maka ne’e alterasaun ga la alterasaun tenki tuir espiritu konstituisaun se alterasaun ruma ho motivasaun politika ne’e la tuir espiritu konstituisaun bele hetan problema bo’ot iha nivel nasional no nivel internasional” Eis PR, Ramos Horta informa ba jornalista sira Tersa, (01/06/2021) hafoin remata enkontru ho Primeiru Ministru, Taur Matan Ruak, iha Rezidensia Farol, Dili. Eis Primeiru-Ministru ne’e dehan, Lei Eleisaun Prezidensial 2022 tenki reflete tuir esperiénsia Timor-Leste nian durante tinan 20 ne’e. “Lei ne’e tenki reflete ita-nia esperiénsia tinan 20 nia laran, reflete ita-nia konstituisaun, ne’e de’it mak ha’u preukupa, agora alterasaun par hadia liután prosesu eleitoral par la’o di’ak liután rejístu fasíl liu ne’e normal,” tenik nia. Alem de ne’e, Ramos-Horta mós konkorda, bainhira iha lei refere mak introdús kada kandidatu tenki aprezenta asinatura votus 10.000 ou 20.000, nune’e ema labele kandidatu arbiru. “Atu ejizénsia kandidatu prezidesial em ves de asinatura uluk 5.000 sira hateten, tenki aprezenta 20.000 ne’e mós ha’u ladún, ha’u hatete ha’u bele simu par labele kandidatu arbiru, se o la konsege asinatura 10.000 ga 20.000 ba o nia kandidatura di’ak liu lalika lakon tempu, tanba o sei la hetan duni nein 5.000 votus,” dehan nia. Maibé, eis Xefe Diplomata ne’e hatutan, bainhira lei eleisaun prezidensial ne’e mak limita idade ba kandiatura sira, maka viola ona espíritu konstiuisaun RDTL, tanba ne’e atu buka taka dalan ba ema balun hodi labele kandidata. (Fontes: Media Dili-Post, Loron Tersa-feira, 01 Juñu 2021).

Analiza Idade Prezidente Repúblika (PR) Internasional

Ita halo komparasaun ho idade Prezidente Repúblika Internasional sira, hanesan atúal Prezidente Repúblika Estadus Unidos Amerika, Sr. Joe Biden (moris iha tinan 1942), ninia idade agora tinan 79 ba leten. Atúal Prezidente Repúblika Indonesia, Sr. Joko Widodo (JOKOWI) (moris iha Surakarta, Jawa Tengah, 21 Juni 1961) idade agora atu tama ba tinan 60. Atúal Prezidente Repúblika Portugal, Sr. Marcelo Nuno Duarte Rebelo de Sousa (moris iha Lisboa, Portugal, 12 Dezembro 1948), agora atu tama ona tinan 73.  Atual Prezidente Repúblika Brazil, Sr. Jair Messias Bolsonaro, (moris iha loron 21 Marsu 1955), agora halo tinan  66. Hare ba referensia sira iha leten ho Prezidente Repúblika Internasional nia idade hotu-hotu mesak idade 50-79 ba leten, signifika katak nasaun Timor-Leste mos kuaze idade hanesan ho Prezidente Repúblika Internasional sira seluk iha mundu ne’e. Kandidatu PR Timor-Leste nia idade ki’ik liu ka minimu maka tinan 35, maibé labele tinan ki’ik liu tinan 34 ida ne’e maka viola Lei Inan Konstituisaun RDTL. Signifika katak kandidatu PR TL nia idade 35 ba leten ne’e avontade ka livre, ba kandidatu Prezidente Repúblika refere. Timor oan ne’ebé to’o idade tinan 35 ba leten, se maka bem preparadu bele halo kandidatura ba PR iha tinan 2022-2027. Importante nia Timor-oan duni, kapasidade diak, psikologia saúde mental diak, proposta husi sidadaun hili-na’in mínimu nain rihun lima.

Rekomendasaun

Atu halo rekomendasaun ba Parlamentu Nacional (PN) mesmo que PN baixa proposta alterasaun lei eleitoral PR ba (Komisaun A-PN). Diak liu lalika halo diskuti lei kona-bá limete idade Prezidente Repúblika ba periodu 2022-2027. Tanba Lei Inan Konstituisaun da RDTL garante tiha ona sai hanesan baze legál ka sai hanesan matadalan ba ema Timor-oan hotu-hotu atu la’o tuir. Importante maka kandidatu PR refere tenke sidadaun Timor-oan duni, iha kuiñesimentu barak ou iha kapasidade diak iha area Polítika, Justisa, Economia, Cultura, Defeza e Seguransa no Negosiu Estranjeiru, proposta husi sidadaun hili-na’in mínimu nain rihun lima, no ninia psikologia saúde mental diak. Rekomenda mos ba VIII Governo Konstitusional liu husi Primeiru Ministru (PM), Jeneral Taur Matan Ruak no Ministru Prezidente Konsellu Ministru, Dr. Fidelis M. L. Magalhães, iha Ministru relevante balu halo proposta lei limite idade kandidatu PR refere diak liu hapara tiha. No agora dadaun PN baixa proposta alterasaun lei eleitoral PR ba (Komisaun A-PN). Rekomenda ba atúal Prezidente Repúblika “Lú-Olo”, se Parlamentu Nacional aprova duni Lei limite idade kandidatu PR refere, diak liu PR lalika aprova. No ikus liu maka se kandidatu Prezidente Repúblika, atu avansa eleisaun prezidensial kandidatu PR hotu-hotu ba halo registu iha Tribunál Rekursu (TR), hodi bele hetan nia legalidade. Nune’e kandidatu PR refere bele halo kampañia polítika ba povu Timor-Leste. (**)   

Referensia

  1. Elisaun Presidensial 2017: Maturidade Politika Haforsa Seguransa Nasional. Disponivel iha ne’e;http://www.fundasaunmahein.org/2017/03/22/elisaun-presidensial-2017-maturidade-politika-haforsa-seguransa-nasional/
  2. Governu Tenke Buka Mekanizmu Realiza Eleisaun Prezidénsia 2022. Disponivel iha ne’e;https://tempotimor.com/politika/6294-governu-tenke-buka-mekanizmu-realiza-eleisaun-prezidensia-2022?fbclid=IwAR22D2wM-vXfPDuz2OjbhOaRGhOg0nclecvNV2KVvBp57q5FIFzIUSEqcYk
  3. José Ramos Horta: Parlamentu Nasional Viola K-RDTL Karik kria Rekizitus Limita Idade Kandidatura Prezidente Repúblika 2022, II TOPIKU ATUAL [BREAKING NEWS ] II Loron 16 Março 2021. Disponivel iha ne’e; https://www.facebook.com/watch/live/?v=3771799939577208&ref=watch_permalink
  4. Konstituisaun RDTL Obrigada Kada Tinan Lima Tenke Hili Prezidente Republika foun. Disponivel iha ne’e;http://www.tatoli.tl/2021/05/12/konstituisaun-rdtl-obriga-kada-tinan-lima-tenke-hili-prezidente-republika-foun/
  5. Kandidatu ba Prezidente Repúblika Mikato ho Fernanda Borges Feto Potensial. Disponivel iha Diariu Timor-Post, Kuarta-feira, 19 Maio 2021.
  6. Lei Elpar Labele Kontra Konstituisaun RDTL. Disponivel iha ne’e;https://dili-post.com/alterasaun-lei-elpar-labele-kontra-konstituisaun-rdtl/?fbclid=IwAR3vB6NyttEVjxi5ZIrMYyo6MHkNglJ_XXOubhes7fq5mnrqa7Su6relnvo  
  7. PNUD Ho IDEA Asina Akordu Apoiu Órgaun Administrasaun Eleitorál Ba Eleisaun Reziliente. Disponivel iha ne’e;https://neonmetin.info/buletin/2021/06/02/pnud-ho-idea-asina-akordu-apoiu-orgaun-administrasaun-eleitoral-ba-eleisaun-reziliente/?fbclid=IwAR1CjH-ET8RwP2p7ojmCJmN6CbwGhafBEhaFzLtO21C9H-5J6bTcgAYnRvc
  8. PN Baixa Proposta Alterasaun Lei Eleitoral PR ba Komisaun A. Disponivelel iha ne’e;http://www.tatoli.tl/2021/05/31/pn-baixa-proposta-alterasaun-lei-eleitroral-pr-ba-komisaun-a/
  9. Xanana Gusmão foi o primeiro presidente da República Democrática de Timor-Leste. Disponivel iha ne’e; https://pt.wikinews.org/wiki/Xanana_Gusm%C3%A3o_foi_o_primeiro_presidente_da_Rep%C3%BAblica_Democr%C3%A1tica_do_Timor_Leste

*Hakerek na’in: Alumni Universidade da Paz-(UNPAZ), Faculdade de Direito & Estudar Instituto Superior Cristal (ISC), Departemento Sociologia no Ativista. Artigo ida ne’e larepresenta institusaun ne’ebé hakerek na’in haknar ba, maibé idea no argumentu sira ne’ebé lekar iha artigu ne’e nudar opinião pesoál. Iha sujestaun ruma bele haruka iha e-mail: moisesvicente59@yahoo.com 

Print Friendly, PDF & Email

LEAVE A REPLY

Please enter your comment!
Please enter your name here