Home Justisa Francisca: Reis Kadalak Problema ho Ema Seluk, Nia Baku Fali Hau

Francisca: Reis Kadalak Problema ho Ema Seluk, Nia Baku Fali Hau

8586
0
Francisa de Jesus, vitima agresaun fiziku hosi Reis Kadalak. [Foto: Zevonia Vieira | 02.03.2020]

Akontese agresaun fiziku ne’ebe mak halo veteranu Reis Kadalak nia rentos ran, jornalista Neon Metin konsege halo entrevista ho Francisca de Jesus, ne’ebe mak hetan mos agresaun fiziku hosi Reis Kadalak.

Francisca nudar negosiante kiik ne’ebe loron-loron faan modo iha jardim Bairo pitte ba Neon Metin konfesa katak iha dadersan oras tuku 9.00 dader, nia lao tun ba jardim, nia [Reis Kadalak] sibuk ho feto maluk ida ne’ebe faan modo iha nia uma kotuk ne’e, nia istoria malu ho feto maluk ne’e.

“Momentu ne’e hau lao ba besik nia, atu hakat ba jardim laran, nia hakilar dehan imi ses hotu, pois nia liman rua hisik ba kotuk mak basa hau. Hau lao hau nian iha estrada ninin ne’e, tun ba Kapela oin ne’e, nia hisik liman rua ba kotuk mak basa hau. Hau nia ibun komesa ran, entaun komunidade sira hobur hau, pois komunidade sira dehan ba deit polisia. Momentu basa tiha hau la koalia ida, hau nonook deit, pois mak ema sira hamrik besik dehan o ba deit polisia”, tenik Francisca ba Neon Metin iha nia uma, iha perumnas Bairo pitte, 02/03.

 Francisca hatutan momentu ne’e lao ho oan feto, “bainhira ema ne’e basa hau, pois nia halai mai hateten nia maun, depois hau nia oan mane ba hasoru hau, maka tuku Reis Kadalak, pois nia monu ba baleta kuak mak nia raan suli”.

Ho situasuan ida ne’ebe Francisca oan nain haat, feto rua, mane rua ba Neon Metin nia hateten, la sente tauk no la sente halo salah, tanba nia lao ninian ba jardim, hodi faan modo.

“Hau la tauk tanba hau la sente halo salah, tanba hau lao hau nian, nia problema ho ema seluk no nia hateten dalan ne’e hau mak manda. Hau nonok deit depois mak nia baku fali hau ne’e. Hau ema rakyat babain, hau lao hau nian, hau laiha problema ho ema veteranu ida”, tenik Francisca

Francisca kontinua nia moris hanesan negosiante kiik ne’ebe hikis kosar faan modo, hodi sustenta nia uma laran, bainhira ba prezensa nia an iha polisia, sedauk konsege ba ospital hodi kurat nia ibun ne’ebe hetan kanek.

Neon Metin mos halo konfirmasaun ho Francisca nia oan mane ho naran Ameta, laos naran loloos, hodi esplika akontesementu ne’ebe akontese ba nia inan. Ba Neon Metin Ameta laos naran loloos esplika lalaok akontesementu.

“Iha tuku 9.00 ne’e hau foin hader, depois alin feto sae mai ho tanis deit dehan ema baku ama, pois dehan ama ibun ran hotu. Hau tun ba ema hatudu dehan katuas mak ne’eba. Intinya hau sedauk iha problema ho veteranus ka ema seluk. Naran vetarnu ne’e hau hakruk no respeita los. Hau to’o hau sei husu, pae nusa mak baku fali hau nia ama, nia sei koalia manggame hela, pois hau langsung tuku dala ida deit, pois nia langsung monu kedas, hau la hare nia ran ka lae, pois hau mos fila ona. Pois media balun hateten dehan grupu deskonnesidu ataka fali pae nee nia uma, ne’e la los”, esplika Ameta iha nia hela fatin, Perumnas Bairo pitte.

 Ameta konfesa katak nia la hatene Reis Kadalak nudar veteran ou lae, maibe tanba deit nia inan hetan baku, no hakarak proteje nia inan , ho razaun ida ne’e Ameta hakarak defende nia inan.

“Hau mos la hatene pae ne’e veteranu, maibe tan deit hau nia inan ran ona ne’e mak hau mos sente la puas no tuku nia. Hau rasik mak ba duni polisia, no hau hatete ba polisia, hau la hatene pae ne’e veteranu ka lae. Hau laos halo problema ho veteranu, lia fuan veteranu ne’e hau respeita, maibe tenke hare mos ami atan sira, laos dehan tenke hare deit veteranu sira”, hateten Ameta.

Ameta joven ida ho idade 28 ne’ebe mak pasa nia tempu hanesan toka dor ba Neon Metin hateten nunka mete ka la involve iha grupu ne’ebe mak gosta halo konflitu ka violensia.

Iha fatin hanesan sasin hosi akontesementu ne’e mos hatoo saida mak nia hare, ba Neon Metin, Joana idade 20,  laos naran lolos hateten, iha dadersan Joana lao ho Francisca ba Jardim, hodi faan modo, no derepente Veteranu Reis Kadalak basa Francisca.

Joana nudar oan feto hosi Francisca ne’ebe mak hamaluk nia inan hodi faan modo iha Jardim. Ba Neon Metin nia hateten lalaok akontesementu ne’e.

“Hau ho ama lao tun ba faan, ama lao uluk, hau lao iha ama nia kotuk. Hau hare tiu ne’e istoria malu ho ferik ida, ama lao hela iha nia kotuk, pois tiu ne’e koalia baku fali ama nia ibun, ran suli tun mak bubu tiha. Pois nia tuku tiha, nia lao tama tiha ba nia uma laran, entaun hau mos konsege tanis no hau halai ba bolu hau nia maun. Ami la hatene katuas ne’e veteranus ka lae, ami respeitu veteranu. Depois momentu ne’e ama lori tiha kantor polisia, hau nia maun ba husu se mak baku ferik, pois komunidade sira hare hatudu ba katuas ne’e,  maun husu tiu ne’e, pois tiu ne’e dehan hau la baku ida, entaun hau nia maun nervozu baku nia.  La kleur hau mos husu, tiu tansa mak baku hau nia ama, depois nia hader mai dehan hau la baku ida, entaun nia oan feto nain rua mai la husu tan, langsung tebe hau nia keleng, nia oan feto duni hau to kapela oin mak sira fila”, esplika Joana ba Neon Metin.

LEAVE A REPLY

Please enter your comment!
Please enter your name here