Reportajen Filomena da Conceição
Presidente Republika, Dr. Josè Ramos Horta’ husu ba governu presiza halo alterasaun ba lei saláriu mínimu ba profesores no seguransa sivil sira tanba tinan barak ona sira moris ho salariu $115 ida ne’e hatudu laiha politika iha kada tinan.
“Governu tenke halo alterasaun ba lei saláriu mínimu no tenke atualiza saláriu, inklui mós sira ne’ebé servisu iha funsaun públiku ho nivél karik ne’ebé manán mínimu liu. Iha nivél leten, sira ne’ebé manán $500 ba leten la presiza”, dehan Presidente ba Republica Josè Ramos Horta ba jornalista sira iha Palasiu Prezidensiál, kinta 20/06
“Ha’u hanoin saláriu mínimu $115 ne’e kleur ona, no ema barak tinan 10 ona simu vensimentu ho saláriu mínimu, ha’u koñese elementu balun hanesan professor, seguransa sivil ne’ebé manán $115 dollar tinan 15. Ha’u ba iha HNGV iha semana rua liu ba bee ha’u hasoru pesoal seguransa ida ne’ebé ha’u husu ba nia servisu tinan 10 liu ona maibé kontinua manán $115, no ida ne’e hatudu laiha polítika ne’ebé kada tinan haree atualizasaun vensimentu konforme inflasaun”, Nia esplika.
Nia haktuir, Família barak ne’ebé dala ruma loron ida han dala ida ka rua de’it tanba vensimentu la to’o no ida ne’e loos duni no han dala ida, dala rua no han saida, purtantu ida ne’e mak ha’u hatete tenke fó insentivu no aumenta subsidiu ba empreza sira.
“Ba ha’u nia hanoin saláriu mínimu bele sa’e ba $150, maibé ne’e tenke governu hare mós paralelu hamutuk ho insentivu sira ba setór privadu ne’ebé emprega ka fó servisu ba ema, atu nune’e iha porporsaun no ida ne’e mak governu tenke hare ho matenek no kreatividade hodi aumenta saláriu mínimu” Nia salienta
Nia hatutan problema mak ida ne’e krize ekonómiku mundiál ne’e impkatu mós ba kompañia sira tanba kustu transporte, materiál, hahán husi li’ur mai karun liu tan, tanba kustu ba kontentór sira aumenta no bainhira ita karega saláriu mínimu ne’e mós iha impkatu ba emprezári
Tanba ne’e kona-ba aumenta saláriu mínimu, ekonomista sira iha governu ho Banku Centrál mak bele halo estudu ida klean oinsá aumenta saláriu mínimu, governu mós bele tau insentivu ba empreza sira atu sira bele moris hodi kontinua sira nia atividade. Tanba bainhira ita ezijé hasa’e saláriu mínimu empreza sira bele redus sira nia traballadór no hamosu dezempregu no buat sira ne’e mak governu presiza tau atensaun
