Reportajen Adroaldo “Saretukau”
Organizasaun Rezisténsia RENETIL (Resitência Nacional dos Estudantes de Timor-Leste) selebra ninia aniversáriu ba dala-36 ne’ebé monu iha loron 20 fulan juñu (20 juñu 1988) ho selebrasaun misa iha Igreja Balide no kari ai-funan iha jardin dos Herois Metinaru.
Selebrasaun da-36 ne’e, Sekretáriu Jeral RENETIL, Joaquim da Fonseca “Russuo” ba Neon Metin iha Sede RENETIL Farol (06/20), hatete, ohin loron ida espesial ba RENETIL hodi selebra nia loron moris, nune’e, “haree ita-nia situasaun rai nian, loron ne’e ita uza atu halo reflesaun oi-tuan ba saída mak halo ona hanesan individu, hanesan sidadaun, hanesan kombatente, membru sira ne’e, saída mak ita halo tiha ona durante ne’e, saída mak ita sei kontinua, presiza halo atu rai ne’e bele sai di’ak liutan.”
“Buat barak mak halo povu en jeral ne’e dada iis, ita foka ona kestaun saúde nian, justisa, kestaun governasaun en jeral, nomeasaun sira ne’e, aspeitu oi-oin hosi governasaun ninian, kestaun fronteira ho rai ketan, ho ita nia viziñu Indonézia. Hirak ne’e hotu kontinua sai asuntu sira ne’ebé ke halo RENETIL preokupadu.” Nia dehan.
Hensan membru, hanesan individu, hanesan kombatente, ita tenki halo reflesaun hodi haree saída tan mak ita sei bele halo, atu halo situasaun ne’e di’ak liutan, nia akresenta.
Nia hatutan, problema ne’ebé da-dauk ne’e mosu iha failansu iha asaun, iha polítika, tanba iha ema ne’ebé aloka, la halo nia knaar ho loloos, tanba laiha jestaun ne’ebé di’ak. Nia fo ezemplu hanesan iha área saúde nian, tanba sá ai-moruk menus, pesoal saúde sei la to’o hodi halo atendimentu ba ema moras, ida ne’e la’os pesoal saúde no osan laiha, maibé fila-fali ba polítika governu nian.
“Membru RENETIL atu Diretor ka funsioáriu simples ida, iha kualker instituisaun governu ida, nia tenki hatene nia knaar ne’e, ita halo reflesaun ba ita nia knaar ne’e, tanba ema RENETIL ne’e hatete ba nia aan revolusionáriu, ne’e haree problema rezolve to’o ninia abut, la’os iha nia kulit de’it, ida-idak halo nia servisu, ida-idak halo nia funsaun.”
“Fo omenajen ba sira, hanoin hikas sira nia dedikasaun, sira nia sakrifísiu, sira nia luta, sira nia espíritu hodi mos motiva fila-fali, renova ita nia moris, espíritu ba kontinua halo buat ne’ebé di’ak ba ita nia rai.”
Ikus nia mensajen, “ba membru hotu-hotu, ida-idak iha nia fatin, iha nia servisu fatin, iha nia knaar fatin, ita kolia ativu ka signifika tenki mai iha sede, importante mak kontinua hala’o ida-idak nia servisu, tuir espíritu RENETIL nian, tuir espíritu ukun-rasik-aan ninian, kontinua halo ba, lalika ta’uk.”
SeJer Russuo hatete, iha aniversáriu ne’e la halo aktividade barak, tanba sei halo iha tempu besik mai. “Ita la halo aktividade barak tanba iha loron besik ne’e sei halo buat balun, diskusaun, reuniaun sira balu, iha interasaun ho ema sira ne’ebé iha pozisaun atu hola desizaun ba ita nia rai.”
Nia dehan, ba aniversáriu ne’e ho aktividade misa, no kari ai-funan ba saudozu Fundador RENETIL na’in 4 ho nia membru seluk, nomos eroi, komandante sira seluk mak mate ona no haloot iha jardin dos Herois Metinaru.
