Home EduTek Mariano Sabino: Portugues Importante Maibe Tenki Sai Lingua Populista

Mariano Sabino: Portugues Importante Maibe Tenki Sai Lingua Populista

387
0
Presidente PD, Mariano 'Asanami' Sabino (Foto: CIJTL)

Adroaldo ‘Saretukau’ de Almeida

Presidente Partido Demokratiku (PD) husu Governo VIII atu tau promove lían Portugal nian sai lian populista. Nia mos husu atu tau matan ba mestre kontratadu sira. Governo presija dignifika sira no mos fo kapasitasaun.

Iha debate loron ikus kona ba apresiasaun Parlementu Nasional ba Programa Governo VIII nian, Presidente PD, Mariano ‘Asanami’ Sabino koalia kona ba importância hosi lían oficial.

“Língua ofisiál Portugés ne’e importante maibé tenki sai língua populista, tanba língua ne’e nia funsaun ba komunikasaun, ema hotu-hotu tenki hatene, la’os grupu ida mak hatene pois dehan língua ne’e ofisiál. Ho ida ne’e nia husu atu tau prioridade kursu gratuita ba komunidade sira, atu nune’e ema sira tuur iha dalan mós bele hatene Portugés, ema sira fa’an sasan mós bele hatene Portugés, ne’e mak bolu língua ofisiál, língua ne’e povu nian. Se lae grupu ida mak hatene dehan língua ne’e povu nian. Tan ne’e konsisténsia ba espasu tomak ba ita hotu atu bele uza língua ne’e sai ofisiál sai ema hotu nian ne’e importante’, Mariano hato’o lia hirak ne’e iha Parlementu Nasional, (27/07), iha debate apresiasaun ba Programa Governo VIII nian.

Iha fatin hanesan, Presidente PD nian ne’e mos husu atu governo diignifika mestre sira mak sei kontratadu hela. Nia mos husu atu mestre sira ba hetan ona salariu permanente ona presija kapasita liutan sira nia.   

Membru bankada CNRT, Deputada Maria Barreto husu mos ba governo atu kontinua dezenvolve sistema dezenvolvimentu sedu otas ki’ik no halo ida ne’e liu hosi koordenasaun entre ministériu relevante hodi prepara futuru nasaun ne’ebé mak kualidade, tanba Timor-Leste nia futuru depende ba labarik sira. Iha mós rekomendasaun hosi bankada refere ba Governu ida ne’e atu kontinua promove labarik sira nia direitu uza lian inan. Tan lian inan sai fonte atu tulun labarik sira aprende di’ak liu iha siénsia. Tanba labarik sira ne’ebé lor-loron moris ho lian inan, no sira hetan afeta tebes iha prosesu aprendizajen.

Iha sorin seluk, membro Bankada PUDD, Deputadu Antonio de Sá Benevides kestiona liu kona ba ensinu tékniku vokasional ne’ebé transforma hosi ensinu sekundáriu Jeral. Nia hatete katak transformasaun ne’e la iha estudu ne’ebé kle’an, ba fasilidade iha ka lae, mestre sira kualifikadu ka lae, no kursu saída mak sei oferese. No depois de remata hosi ensinu tékniku vokasional, sei prepara kontinua ba ensinu superior ka ba direita iha kampu de traballu.

Debate kona ba apresiasaun Programa Governo nian ne’e hakotu iha Sexta kalan (27/07), hodi halo votasaun ba mosaun rejeisaun ne’ebe prepara hosi Bankada Fretilin. Ba votasaun ida ne’e votus afavor 25, abstain 4, no vota kontra 36. Programa Governo VIII passa ona, tuir mai sei halo fali debate orsamentu estadu.

 

 

LEAVE A REPLY

Please enter your comment!
Please enter your name here