Reportajen: Filomena da Conceiçăo
Labarik ki’ik na’in 16 ne’ebé uluk militar Indonézia uza forsadamente, hodi haketak sira husi-nia familia, ohin hasoru malu ho Prezidente da Republika (PR),Dr. José Ramos Horta iha Palasiu Prezidensiál.
Diretòr Centro Nacional Chega (CNC), Hugo Fernandes, hateten, labarik na’in 16 ne’ebe lakon iha 1975 ate 1999 ne’ebé ho forzadamente lori husi militar Indonesia ohin loron pela primeira vez balun fila fali mai iha Timor-Leste hodi hasoru malu ho sira-nia familia.
“Reunifikasaun ba ita-nia Maun alin sira ne’ebe mak uluk sira sei ki’ik Millitar Indonésia lori ba Indonésia Forsadamente sira tinan nia naruk nia laran liu tinan-30 balun husi tinan-40 haketak malu ho sira-nia familia Inan-Aman, Maun Alin sira i ohin pela primeira vez sira fila fali mai hasoru malu ho sira-nia familia balun uluk ba sei ki’ik agora fila mai katuas hotu ona”, dehan Hugo ba jornalista sira iha Palàsiu Presidensial, Kuarta, 30/11.
Nia haktuir, iha tinan ida ne’e, ita ema na’in 16 mak mai, sira ne’e Mane hotu.”Se imi akompanha desde 2018, 2019 iha kahur feto no mane maibé iha 2020, 2021 ita la bele halo programa ne tamba Covid-19 i agora 2022 ne’e ita lori fila fali mai sira-16.
Nia salienta, programa reunifikasaun la’os programa Re-Patriasaun katak sira fila mai atu hasoru malu de’it ho sira-nia familia sira nia Inan-Aman. Foin dadauk hasoru ona ho Presidente no presidente hato’o mensajen ba sira katak Timor-Leste mòs sira nia uma, sira mak deside se sira hakarak hela ne’e sira-nia uma no sira hakarak fila fali mòs sira iha familia Indonésia.
Nune’e mós Presidente da Republika hato’o mòs agradese ba servisu ekipa sira ne’ebè halo ona esforsu maka’as atu buka tuir Timor oan sira ne’ebè mak lakon iha konflitu nia laran.
“Presidente Agradese ba Servisu Equipa Traballu nian ne’ebé mak halo esforsu para depois bele kontinua buka ita nia maluk sira ne’ebé mak fahe malu iha konflitu nia laran i Presidente ohin mòs hato’o katak ida ne’e mak resultadu husi konflitu balun lakon, lakon de’it to’o agora, balun mate lakonsegue halibur fali hanesan Presidente rasik konta kona ba nia alin nain- tolu ne’ebé mak mate iha konflitu ida ne’e, ida konsegue hetan lori ba hakohi nain- rua lakonsegue entaun PR husu ba sira atu iha korajem atu hare ba oin, liu-liu bainhira hare rekonsiliasaun entre Timor ho Indonésia entre ema ho ema ho mòs Gorvernu ho Governu la’o di’ak i sira tenke mòs partisipa iha prosesu nee importante liu mak PR labele haluha sa mak akontese iha passadu maibé mòs tenki hanoin mòs ba oin” nia Esplika
Entertantu iha enkontru grupo traballu reunifikasaun ne’e kompostu husi AJAR Timor – Leste, Yayasan Hak, Fokupers no Cruz vermelha de Timor – Leste, Presidente da Republika rasik nomós CNC, Ministerio Solidariedade Social Inkluzaun (MSSI) husi Timor hamutuk mòs ho parseiru sira iha Indonesia AJAR Internasional, AJAR Indonésia KONTRAS, INKOHI iha mòs Republik Indonésia nian hanesan KOMNASAN no mòs Misnisterio Negosio Estranjeiru Indonésia nian.
