Reportazen David da Costa Gusmao
Relasiona ho numeru efatdu COVID-19 ne’ebe kontinua sae, liu hosi konferensia imprensa Koordenadora Jeral COVID-19, Odete da Silva Viegas informa katak governu husu ba publiku, autoridade lokal, atu kontrola makaas movimemto sidadaun ne’ebe hakat mai iha fronteira ilegalmente.
Odete Veigas dehan relasiona ho númeru kazu pozitivu ne’ebé kontinua regista iha ita nia rain, atu bele kontrola nafatin movimentasaun sidadaun hirak nebe mak hakat-ba mai iha fronteira ilegalmente, hodi nune’e labele monu ba risku no hada’et COVID-19 tutan iha mai rai laran ka transmite lokal.
Nia mos husu ba komunidade, liu-liu ba joven sira atu nafatin kolabora no kumpri ho disiplina regra distansiamentu sosiál koletivu, uza nafatin maskra wainhira sirkula iha fatin públiku no fatin ne’ebé iha ema barak, hanesan fatin selebrasaun relijioza, loja, serbisu fatin, basar no seluk tan.
Ministeriu Saude mos husu ba publiku tomak atu abetua ho fase liman bebeik ho sabaun, evita hatama liman ba ibun, inus no matan. Bainhira sente iha sintomas COVID-19 bele kontaktu direita ba ekipa vizilansia saude nian, hodi nune’e bele halo konsulta.
Tuir dadus global ne’ebe publika hosi Organizasaun Mundial Saude (OMS) hatudu katak dadus ba loron 13 Janeiru nian numeru ema ne’ebe konfirmadu COVID-19 iha mundu tomak total 90,054,813, total ema ne’ebe mate hamutuk 1,945,610.
