Reportajen Filomena da Conceição
Udan boot ne’ebé maka akontese hahú iha loron Domingu to’o Tersa ne’e estraga totál inan Faluk Juliana nia haree ne’ebé maka nia koilleta iha suku iha aldeia Saraida, Suku Baguia, postu Administrativu Quelicai, Munisipiu Baucau.
Liuhusi telefone Inan faluk Juliana Freitas, hateten ba Neon Metin, hato’o sentimentu triste, tanba natureza nia siak estraga totál natar ne’ebé halo iha fulan hira nia laran, koleta ona balun maibé udan iha loron tolu ho intensidade boot, entaun labele salva hotu.
“Udan ne’e mai hahú iha loron Domingo no foin para oituan iha hodikalan ne’e, udan bo’ot ne’e tama hotu iha hare laran ne’ebé maka ami ko’a tau ona bai ha biti leten, ha’u mesak salva labele tanba udan ho intensidade boot,” dehan inan faluk Juliana ba Neon Metin, liuhusi telefone, Kuarta 5/07.
Nia haktuir tan, durante halo natar ne’e, selu ema maka halo, loron ida selu $ 6 dolar, maibé haree hare ne’ebé durante fulan naruk to’o ikus hatudu fali rezultadu moruk fali, tanba husi halo natar ida ne’e maka sustenta ba moris loron-loron no ba beoan sira hotu.
“Ha’u nu’udar faluk ida, sente laran susar loos, tanba hare ne’ebé durante ne’e ha’u garantia udan mai estrga totál no hatudu fali rezultadu moruk, no la hatene atu fó han saida ba bei-oan nain 5 ne’e, tanba durante halo natar ida ne’e, ha’u forsa laiha atu halo mesak, tanba ne’e ha’u selu ema ho loron ida 6 mak ema foin ajuda halo natar ida ne’e maibé rezultadu ikus udan estraga hotu,” nia espresa.
Nune’e nia husu ba ukun na’in sira atu tau matan neteik ba sofrementu ne’e maka agora hasoru hela ne’e, tanba laiha forsa atu la’o dook hudi buka hahan no hato’o sofrimentu ne’ebé dadaun hasoru hela iha area rual ne’e,
“Ha’u la husu buat barak ba governu, maibé ha’u husu ba bo’ot favór tun direita hodi hare’e netik ami nia terus sira ne’e, tanba ha’u mós ferik ona no ha’u laiha forsa atu la’o dook, karik bo’ot sira rona hela ami nia lian karik favor tau matan netik mai ami, tanba dadun ne’e foos mós folin karun no ami laiha kbiit atu sosa,” nia husu.
Entretantu, impaktu husi udan bo’ot ne’ebé akontese komesa iha loron domingu to’o tersa kalan ne’e, rezulta inan faluk juliana nia hare hetan estragus total, inklui mos komunidade sira ne’ebé hela iha aldeia saraida, tanba hare ne’ebé nia koilleta dadaun ne’e bee tama no hare moris hotu, Aleinde ne’e vitima refere seidauk hetan ajuda ruma husi parte relevante sira.
