Home Notisia Konsellu Imprensa Anúnsia Ba Públiku Prémiu Max Stahl Ba Kategoria Direitus Umanus

Konsellu Imprensa Anúnsia Ba Públiku Prémiu Max Stahl Ba Kategoria Direitus Umanus

231
0
Konsellu Imprensa halo konferensia imprensa. [Foto: Adroaldo | 21.06.2022]

Reportajen Adroaldo “Saretukau”

Konsellu Imprensa Timor-Leste (KITL), liu hosi konferénsia imprensa ne’ebé hala’o iha edifísiu CI, Kintal Boot (21/06), ofisiálmente anúnsiu ba públiku prémiu jornalizmu foun ho naran “Prémiu Max Stahl” ho kategoria dokumentáriu ba audiovisual di’ak liu ba asuntu direitu umanu ba kanal média, jornalista no asosiasaun jornalista sira ne’ebé iha interese ba prodúz obra refere.

Prezidente KI, Virgílio da Silva Guterres “Lamukan” hatete, objetivu hosi konferénsia imprensa ida mak halo espesífiku oi-tuan, tanba ko’alia konabá prémiu ba jornalizmu nian. Konferénsia imprensa ida ne’e, CI hakarak anúnsiu ba públiku tanba liu hosi plenária KI, deside hamosu tan prémiu jornalizmu ida ho naran Max Stahl.

“Prémiu Max Stahl ne’e atu onra jornalista Max Stalh ne’ebé mos sai hanesan figura nasional, eroi ba povu Timor. Ba prémiu jornalizmu Max Stahl ne’e, nia kategoria ba dokumentáriu ne’ebé ke jornalista ou ka kaza produsaun ou organizasaun sira ne’ebé prodúz, nia konteúdu konabá Direitus Umanus, konabá asuntu sira ne’ebé ke eleva dignidade ema ni-nian ne’ebé publika ona iha órgaun meiu komunikasaun sosial iha Televizaun ou ka iha Rádiu,” dehan Prezidente KI, Virgílio ba jornalista sira iha konferénsia imprensa, iha edifísiu KI, Kintal Boot, Tersa-feira, 21/06.

Prezidente CI hatutan, prémiu Max Stahl ne’e mai hamutuk tan ho prémiu seluk ne’ebé CI fo sai ona hanesan prémiu Adelino Gomes, ba obra jornalístika ho lian Portugés di’ak liu, prémiu jornalizmu Francisco Borja da Costa, ba asuntu sosiais ba imprensa eskrita, prémiu Greg Shackleton, prémiu ba rádiu no televizaun ba asuntu sosiais mos, prémiu Bernardino Guterres, ba foto jornalizmu ni-nian, inklui prémiu Konsellu Imprensa nian.

“Desizaun ida hanesan bai-bain, Konsellu Imprensa aprova i depois, agora hakarak lansa publikamente ba públiku, atu nune’e jornalista sira, órgaun komunikasaun sosial sira, ne’ebé ke hakarak aplika, bele hetan informasaun,” dehan Prezidente Virgílio.

Nia akresenta, konferénsia imprensa ida ne’e konvida mos Prezidente Komite 12 Novembru no reprezentante hosi Kaza Audiovisual Max Stahl nian, “atu nune’e fo hanesan nuansa ida ne’ebé ke maka’as liu tan Max Stahl,” tenik nia.

Iha fatin hanesan, Diretor Ezekutivu KI, Rigoberto Monteiro hato’o, prémiu ne’e sei publika hahú aban (22/06) ba oin, atu jornalista ka grupu média sira bele aplika i prémiu ida ne’e sei atribui hamutuk ho prémiu sira seluk ba manan na’in sira iha Balibo, iha 16 Outubru 2022 ba lansamentu dahuluk loron nasional ba liberdade imprensa nian iha Timor-Leste.

Dokumentáriu ida ne’e audiovisual, entaun presiza iha nia audio no imajen ne’ebé di’ak, no oinsá nia impaktu ba sosiedade ne’e iha ka lae, atu oinsá forma opiniaun ba públiku, atu koñese Max Stalh nia servisu ba iha ita nia luta libertasaun nasional, ida ne’e mak kondisaun ne’ebé CI tau, dehan Expedito Dias Ximenes.

KI liu hosi plenária foin da-dauk hala’o ona iha loron 6 Maiu, halo ona deliberasaun ho númeru 07/2022, hodi halo prémiu foun ho naran “Prémiu Max Stahl” ho kategoria Direitus Umanus.

Print Friendly, PDF & Email

LEAVE A REPLY

Please enter your comment!
Please enter your name here