Home Notisia KI Anúnsia Prémiu Foun Hanaran Max Stahl, Gregorio: Orgullu Boot Ba Ita...

KI Anúnsia Prémiu Foun Hanaran Max Stahl, Gregorio: Orgullu Boot Ba Ita Hotu

131
0
Konsellu Imprensa halo konferensia imprensa. [Foto: Adroaldo | 21.06.2022]

Reportajen Adroaldo “Saretukau”

Liu hosi deliberasaun Konsellu Imprensa (KI), númeru 07/2022, iha loron 6 Maiu ba prémiu foun hanaran “Prémiu Max Stahl” ho kategoria Direitus Umanus, Prezidente Komite 12 Novembru, Gregorio Saldanha ‘Mouris” agradese ba KI no Prezidente Repúblika nia atribuisaun prémiu refere hodi Max Stahl nia naran, nune’e ita hotu tenki orgullu ho kontribuisaun mak nia halo ona ba Timor.

Prezidente Komite 12 Novembru, Gregorio Saldanha ‘Mouris’ hatete iha konferénsia imprensa ne’ebé hala’o iha edifísiu KI katak, se Timoroan mak luta to’o mate ba ita nia rai ne’e bai-bain de’it, maibé se ema estranjeiru ruma mak luta hanesan ita, sá tan to’o nia mate ne’e luar biasa.

“Tanba ne’e mak hodi Komite nia naran hakarak agradese ba inisiativa onselho de Imprensa i ita nia Prezidente da Repúblika, hodi estadu nia naran konkorda atribui prémiu ne’e ba ita nia saudozu, ita nia maun Max Stahl” dehan Gregorio iha konferénsia imprensa ba prémiu foun Max Stahl, ne’ebé hala’o iha edifísiu KI, Kintal Boot, 21/06.

Nia hatete, Max Stahl nia kontribuisaun la’os de’it iha luta ba okupasaun nia laran, maibé depois de ukun aan tiha kontribui nafatin ho nia obra sira i nia mate mos nia hakarak hela iha Timor, “nia konsidera hanesan ema Timoroan, Timor-Leste hanesan nia uma, hanesan nia rai, entaun ne’e orgullu boot ba ita hotu,” dehan Prezidente Gregorio.

Komite 12 Novembru sente orgullu no agradese ba CI, tanba foti Max Stahl hodi naran ba prémiu foun ne’e. Gregorio dehan, nia merese hetan prémiu ida ne’e hanesan mos ita nia maluk Timoroan sira hanesan, Borja da Costa, saudozu Bernadino, inklui jornalista estranjeiru sira seluk.

Iha parte sorin, Prezidente KI, Virgílio da Silva Guterres “Lamukan” hatete, “Prémiu Max Stahl ne’e atu onra jornalista Max Stahl ne’ebé mos sai hanesan figura nasional, eroi ba povu Timor. Ba prémiu jornalizmu Max Stalh ne’e, nia kategoria ba dokumentáriu ne’ebé ke jornalista ou ka kaza produsaun ou organizasaun sira ne’ebé produs, nia konteúdu konabá Direitus Umanus, konabá asuntu sira ne’ebé ke eleva dignidade ema ni-nian ne’ebé publika ona iha órgaun meiu komunikasaun sosial iha Televizaun ou ka iha Rádiu,” dehan Prezidente CI, Virgílio ba jornalista sira iha konferénsia imprensa, iha edifísiu CI, Kintal Boot, Tersa-feira, 21/06.

Print Friendly, PDF & Email

LEAVE A REPLY

Please enter your comment!
Please enter your name here