Reportajen Santina Lucia da Costa
Delegasaun Fact Finding Mission (FFM) Pilar Socio-Cultural Community (SOCA) vizita Organizasaun Naun-Governamental Forum Komuniksaun ba Feto Timorense (Fokupers), hodi hare asuntu oinsa halo Kooperasaun ho FOKUPERS ba ASEAN.
Tuir Diretóra Ezekutiva FOKUPERS, Maria Fátima P. Guterres, hateten, Vizita ida ne’e husi Socio Cultural Community (SOCA) Lider ba liu ekipa ne’ebé haree asuntu sosiál ninia, sira nia vizita ida ne’e atu rona liu kona-ba FOKUPERS ninia serbisu, Misaun sira ne’ebé durante ne’e FOKUPERS halo, no atividade real sira, atividade sosiais sira ne’ebé Fokupers halo hodi bele responde ba situasaun liuliu ba maluk feto sira ne’ebé sai vitima ba Violensia Bazeia ba Jeneru (VBJ).
“Vizita ida ne’e importante tebes tanba, oinsa bele fahe ita ninia informasaun sira ba iha ekipa boot husi ASEAN ninian, liuliu espesifiku ba iha SOCA lider sira, ekipa ne’ebé haree liu ba asuntu sosiais ninian, entaun FOKUPERS mós halo servisu sosiais sira ne’ebé presija ita atu fahe ba sira, nune’e oinsa sira bele liga fali organizasaun sosiedade sivil sira nia servisu iha Timor-Leste, inklui Fokupers ba iha sira nia organizasaun sosiedade Sivil sira ka iha sira nia nasaun ASEAN nian, ida ne’e importante tebes, no oinsa kria kolaborasaun di’ak liu tan iha rejional.” Informa, Diretóra Ezekutiva FOKUPERS, Maria Fátima P. Guterres ba Jornalista sira iha Edifisiu Fokupers, Farol, 8/7.
Diretóra Ezekutiva FOKUPERS, realsa tan katak, Maske ita seidauk tama iha membru ASEAN maibé ita nia serbisu durante halo hela, kolaborasaun FOKUPERS ninian ho parte organizasaun sosiedade sivil iha ASEAN la’o hela, sé karik Sekretariadu ASEAN nian iha Rejional sira nia vizita mai tan ida ne’e forte liutan oinsa bele haforsa liu tan FOKUPERS ninia relasaun sira ho organizasaun sira iha parte rejional ninian.
Iha Enkontru ne’e, Delegasaun mós husu saida mak Sekretariu ASEAN bele tulun Fokupers liuliu liga ho misaun FOKUPERS nian ne’ebé iha hanesan kontribuisaun Sosiedade Sivil ba iha Dezenvolvimentu Estadu ninian liuliu iha area igualdade jeneru no mós hapara violensia Bazeia ba Jeneru.
Maria Fátima P. Guterres, akresenta, buat ne’ebé ita presija mak, primeriu oinsa mak atu bele liga Fokupers ho tan Organizasaun sira seluk, ne’e FOKUPERS koñese iha rejional depois mós oinsa atu bele liga FOKUPERS ho tan Sekretariu sira, liuliu Governu nian iha ASEAN ne’e, liga ho vitima sira tanba Vitima sira durante ita simu ne’e la’os de’it vitima domestika, vitima Nasional, maibé mós Vitima Internasional no Rejional ita simu.
Aleinde Fokupers fahe informasaun, FOKUPERS mós husu atu oinsa bele hadia liu tan kooperasaun serbisu sira entre sosiedade sivil Timor-Leste ho Sosiedade Sivil sira iha nasaun seluk ASEAN ninian.
“Hau hanoin FOKUPERS hola parte ona ba iha Rede Servisu advokasia iha rejional no molok Governu ho Governu halo ligasaun ka molok ita nia prepasaun ba ASEAN.” Dehan, Maria Fátima P. Guterres.
Delegasaun Fact Finding Mission (FFM) Pilar Socio-Cultural Community (SOCA) ASEAN ne’e, lidera husi Funcionariu Señor Dy Khamboly, husi Camboja. Membru delegasaun ne’ebé halo misaun iha Timor-Leste hamutuk na’in 60, kompostu husi nasaun 10 mak hanesan, Cambodia, Indonesia, Laos, Vietname, Brunei Darusalam, Singapura, Myanmar, Filipina no Thailandia.
