Reportajen Santina Lucia da Costa
Forum Komunikasaun ba Feto Timorense (FOKUPERS) hamutuk ho Sekretariu Estadu Igualdade no Inkluzaun (SEII) ,no Rede Feto realiza marsa hodi Komemora loron Lei Kontra Violensia Domestika (LKVD) No 7/2010 ne’ebé publika iha Jornal Republika iha 7 Jullu 2010, ohin loron implementasaun tama ona ba tinan 12 mak Fokupers. Tema ba Marsa ne’e mak, “Familia Saudavél Promove Igualdade Jeneru.”
Objetivu husi Marsa ne’e, Atu hasa’e sosiedade nia koñesementu no sensibilidade kona-ba LKVD no Violensia Bazeia ba Jeneru (VBJ), haforsa koordenasaun servisu liu-liu ho Instituisaun xavé estadu nian hodi hNakonu no assegura estadu nia komprimisu ba Igualdade Jéneru liuhusi planu, alokasaun orsamentu no mekanizmu koordenasaun ne’ebé diak hodi implementa LKVD no enkuadramentu legal seluk.
“Marsa ne’e nia objetivu atu fó hanoin ita oinsa signifikadu husi loron importante ida ne’e tanba loron ida ne’e mak determina oinsa maluk feto sira bele sai forte liu tan, ida ne’e hanesan mekanizmu ida , dalan ida ne’ebé prepara, lei ida ne’e proteje duni ita.” Hateten, Diretóra Ezekutiva Fokupers, Maria Fátima P. Guterres iha Abertura Marsa husi Jardin 5 de Maiu, Kolmera, 8/7.
Nia dehan, Alende hasa’e komunidade ninia konsiensia LKVD ho ninia implementasaun, oinsa organizasaun hotu presija servisu maka’as liu tan, ida ne’e la’os ema ida de’it ninia problema, la’os organizasaun ninia problema, maibé ema ida-idak no hotu-hotu oinsa ita hamutuk atu luta ba pontus ida ne’e.
“LKVD Numeru 7/2010 mai husi data importante ne’ebé kuaze tinan barak ona halo data ne’e hanesan baibain, entaun ita hanoin katak, importante atu komemora data ida ne’e, la’os de’it atu komemora atu halo festa, maibé liuliu atu hasa’e ema nia konsiensia, atu bolu ema hodi hapara violensia Bazeia ba Jeneru (VBJ) inklui Violensia Domestika (VD).” Nia afirma.
Nia Subliña, Marsa ida ne’e parte ida konsolizasaun atu bele fó mensajen ba ema katak, Violensia lolos la’os ita nia kultura Timor ninian, ita presija atu hakribi ida ne’e.
Enkuantu, Mensajen importante sira ne’ebé hodi la’o iha marsa mak hanesan, Hadomi Familia Hapara Violensia Domestika. Violensia Laos Arte no Laos Kultura Timor Nian. Rona no Fiar Vitima sira nia Lian.
Atividade Marsa ne’e, hahú husi Jardin 5 de Maiu to’o Palasiu Prezidensial, Nicolau Lobato, Bairu-Pite, ne’ebé hetan Partisipasaun husi, Organizasaun Sosiedade Sivil, Organizasaun Internasional, Governu, Estudantes Universitarius no seluk tan.
