Reportazen Ricky Samlelo
Universidade de Dili (UNDIL) distrbui ona fós saka 574 ba estudante sira ne’ebe hela iha kost, hodi responde ba estudante sira nia nesesida durante iha situasuan serka sanitaria.
Tuir Senadu Fakuldade de Direitu Universidade de Dili (UNDIL), Marito Ximenes ba jornalista Neon Metin hatoo agradese ba governu liu husi Ministeiru Solidariedade Sosial no Inkluzaun (MSSI) bele fo tulun ona estudante sira, maibe estudante Fakuldade Direitu Universidade refere sei la simu ho razaun fós a’at , metan no nakonu ho ular.
“Subsidiu ka apoiu fós ne’ebe governu fo’o ne’e ohin ami ho kolega sira loke fós a’at, metan no nakonu ho ular oan deit, ne mak ami hatete hanesan ne’e fós ne’e atu fo ba ema ka animal, se fós ne’e fo ba ema entaun fo fós ne’ebe diak ita nia saude. Fós iha ne’e kuaze a’at no metan hotu tamba ohin ami loke ona ba hare, tamba ne’e mak ami nain hira la konkorda ho apoiu ne’e, maske governu apoiu ona kada ema ida simu fós karon ida”, dehan Marito Ximenes iha kampus UNDIL, 22/03.
Nia hatutan Fakuldade Direitu iha fós karon 34 maibe nain hira la simu ho kestaun fós metan hotu no iha ular iha laran. Maluk balun husi fakuldade seluk balun simu no balun mos la simu
Entertantu, Jornalista Neon Metin mos konfirma kedas ho reitor Universidade de Dili (UNDIL), José Belo Pereira iha fatin refere nia hatete, ida ne’e hanesan apoiu ida husi parte governu nian ba estudante sira, maske estudante sira kestiona ho fós , maibe nia parte sei hato’o ba Ministeiru Solidariedade Sosial no Inkluzaun atu hare’e ba kestoens hirak ne’e.
“Ohin sira Ministeiru Solidariedade Sosial no Inkluzaun hamutuk ho Diretor Jeral Ensino superior mos mai lori fós saka 574 ba estudante sira tuir lista ne’ebe mak iha, ne’e hanesan apoiu husi ita nia governu ka estadu ba pandemia COVID-19, ida ne’e fós laos maioria mak a’at, kala iha balun mak metan maibe se estudante sira hato’o mai ita hato’o ba Ministeiru Solidariedade Sosial no Inkluzaun, para rezolve buat sira ne’e, balun ne’ebe foti ona no balun mak seidauk foti tamba dehan fós metan,” dehan José Belo Pereira.
Tuir dadus ne’ebe reitor ne’e relata katak fós saka 574, distribui ba estudante Universidade de Dili (UNDIL) ne’ebe hela iha kost tuir lista sira rekolla, maibe karik iha faze tuir mai sei iha fo fali ba sira ne’ebe mak seidauk regista.
To’o nutisia ne’e sae Neon Metin sedauk halo konfirmasaun ho MSSI konaba fos ne’ebe mak sira distribui ona.
