Home Notisia RENETIL Propoin Kuadru Juridiku Ficha Limpa ba PR Lú-Olo

RENETIL Propoin Kuadru Juridiku Ficha Limpa ba PR Lú-Olo

349
0

Lideres RENETIL hasoru malu ho Presidente da Republika (PR) Lú-Olo hodi koalia kona ba impasse politiku mak lao dadaun no propoin atu establese kuadru juridiku ba ficha limpa. Iha hasoru malu ne’e lideres RENETIL expressa apoio ba PR Lú-Olo nia esforsu hodi apoio governo ida kredibel.

Iha RENETIL nia Komunikadu Imprensa ne’ebe publika ohin (26/07), hatete katak, “Atu garante esforsu atu harii Governu ho kredibilidade no atu promove báze ida-ne’ebé previzível, RENETIL propoin atu, iha futuru, estabelese kuadru juridíku ida, ne’ebé sei determina kritériu espesífiku ida, aleinde kritériu seluseluk, katak indivíduu sira atu okupa pozisaun públiku ida, hanesan membru Governu ka deputadu, sei labele iha rejistu kriminál ho krime relevante, ka iha ficha limpa.”

RENETIL hato’o proposta ida ne’e tanba nota katak ohin loron, iha ona lei ne’ebé ezije funsionáriu públiku no profisaun seluk atu la iha sentensa kriminál, maibé regra hanesan la iha ba sira-ne’ebé kaer ukun. RENETIL nia ideia ida-ne’e hetan reasaun pozitivu tebes hosi Presidente da República. RENETIL fiar-metin katak forsa polítika sira seluk sei mós apoiu inisiativa ida-ne’e.

Hamutuk ho proposta ida-ne’e, RENETIL mós fahe hanoin ho Xefe Estadu kona-ba preokupasaun katak interpretasaun no implementasaun atuál ba regra konstitusionál kona-ba imunidade hosi titulár órgaun públiku sira sei permite ofisiál públiku atu subar iha imunidade nia kotuk hodi sees hosi responsabilizasaun kriminál. RENETIL sente katak importante atu hakotu interpretasaun hanesan ne’e, ne’ebé viola espíritu Konstituisaun, atu fó dalan ba sistema judisiáriu sira hala’o ninia knaar lolos tuir Konstituisaun no lei sira.

Enkontru ne’ebe halao iha Palacio Presidente horiseik ne’e (25/07) partisipa hosi Vice Secrátario Geral I, Fransico ‘Lire’ Belo, Vice Secretário Geral II, Natalina ‘Rara’ Aparício, Presidente Conselho Central, Carlos FR ‘Saky’ no Membru Conselho Central, José AMX ‘Siac’ Gonçalves. Secretário Geral RENETIL, Joaquim ‘Russuo’ da Fonseca, la partisipa iha audiensia ne’e tamba fila hikas ona ba Inglatera hodi hala’o nia knaar seluk.

 

LEAVE A REPLY

Please enter your comment!
Please enter your name here