Home Notisia Lao Hamutuk: To’o Ohin Loron Seidauk iha Avaliasaun Independente ba Projetu Tasi...

Lao Hamutuk: To’o Ohin Loron Seidauk iha Avaliasaun Independente ba Projetu Tasi Mane

292
0
Parlamentu Nasional. [Foto: Francisco JDA | 15.06.2020]

Reportajen Neonmetin Team

OGE 2020 governo aloka orsamentu kiik ba Projetu Tasi Mane. Inserteza kona ba vida projetu ne’e kontinua mosu. Maski tinan ida liu ba governo selu ona estudu oioin mak relevante ba projetu ne’e maibe Lao Hamutuk kontinua hatete katak to’o ohin loron seidauk iha avaliasaun independente ba Projetu Tasi Mane hodi hatene kustu, benefisiu no risku.

“To’o ohin loron seidauk iha avaliasaun independente ba projetu ida ne’e, dala barak peritu sira fó sai katak projetu ida ne’e tenke hetan avaliasaun kompletu hodi bele hatudu analiza ba kustu no benefísiu sira inklui mós nia risku sira iha futuru oin mai. Ho nune’e, ami apresia mós ba vontade di’ak husi Ministru MPM no Prezidente TimorGap ne’ebé sempre fó sai ba média katak iha inisiativa hahú halo revizaun ba estudu hotu-hotu relasiona ho projetu boot sira mina no gas nian inklui projetu Tasi Mane”, Lao Hamutuk hatete iha nia Submisaun ba Parlamentu Nasional kona ba Orsamentu Jeral Estadu 2020 nian, horiseik, 1/10.

Tanba ne’e, Lao Hamutuk enkoraja atu Governu bele avansa ho estudu independente hodi fornese analiza ka estudu kredivel kona-ba kustu, benefísiu no risku sira husi Projetu Tasi Mane no Greater Sunrise, hodi bele asegura maxima benefísiu ba povu Timor-Leste no redús risku sira ne’ebé bele prejudika nasaun nia integridade sósiu ekonómiku.

Kuaze tinan sanulu nia laran Governu gasta ona tokon atus barak ba iha Projetu Tasi Mane ne’ebé mak sei nafatin iha inserteza no seidauk iha prova katak projetu ida ne’e bele fó duni benefísiu ba povu Timor-Leste nia moris ba iha tempu naruk. Ba tinan ida ne’e, ami apresia VIII Governu tanba redús ona alokasaun orsamentu ba Projetu Tasi Mane. Tokon $17 direta no indireta aloka ki’ik liu kuaze 73% kompara ho despeza iha tinan 2019 no tuun 85% kompara ho tinan 2018.

Lao Hamutuk fiar katak Governu sei muda nia investimentu ba setór importante sira ne’ebé sei fó benefisia direta ba komunidade sira nia moris di’ak. Iha Lao Hamutuk nia Submisaun hatete katak setor produtivu seidauk dezenvolve ho diak. 

“Situasaun produsaun agrikultura rai laran to’o 2020 hatudu katak ita nia setór produtivu seidauk dezenvolve didi’ak hodi hamenus ita nia dependénsia ba Fundu Petrolíferu ne’ebé limitadu tebes. Iha setór agrikultura, produsaun ai-han nafatin laiha mudansa signifikante kompara ho tinan sanulu liu ba no laiha diversifikasaun ai-han atu hamenus ita nia dependénsia ba importasaun foos”, Lao Hamutuk hatete iha nia submisaun.

Iha tinan 2019 Timor-Leste nia produsaun foos nasional mak tonelada 47,822 de’it, kuaze hanesan kompara ho produsaun nasionál iha tinan 2008 ho tonelada 48,154. Produsaun batar iha 2019 tuun ba tonelada 75,690, ki’ik liu kompara ho produsaun iha 2015 ho tonelada 95,433.

LEAVE A REPLY

Please enter your comment!
Please enter your name here