Reportajen Santina Lusia da Costa
Ativista Foinsa’e Timor-Leste hasoru malu ho Prezidente Repúblika, Dr. Francisco Guterres Lú Olo, hodi aprezenta problema ne’ebé mak joven sira hasoru durante ne’e, liuliu kampu serbisu, tanba joven barak gradua maibé aumenta dezempregu iha Timor-Leste.
Prezidente Ativista Foinsa’e Timor-Leste, Apolinario Mendonça hateten dalabarak joven mak sai vitima durante tinan barak, entaun husu ba Prezidente Republika, atu haree liu ba joven nia sofrementu ne’ebé mak joven sira hasoru durante ne’e.
“Sofrementu durante ami haree mak Aborsiu, tanba aborsiu aas tebes iha Timor, entaun instala formasaun ida ne’e tun ba iha baze, no ami menus ba kampu de trabalho, ami barak gradua iha fatin-fatin, ba buka serbisu, ami lakohi sai bainaka ba ami nia rai, ami husu ba aman ba nasaun tau ida ne’e prioridade liu.” Hateten, Prezidente Ativista Foinsa’e Timor-Leste, Apolinario Mendonça, iha Palasiu Prezidensial Nicolau Lobato, Biaru-Pite, 7/2.
Maske planu hahú hala’o tiha ona, joven barak hetan ona serbisu, maibé balun mós seidauk hetan serbisu to’o agora.
“Ami husu nafatin ba Prezidente atu dehan ba ita nia governante sira liuliu atu haree ba kampu serbisu ne’ebé ami joven sente sei menus hela mai ami.” informa Apolinario.
Nia haktuir, Prezidente fó mensajen ba joven sira mak tenki prepara-an labele haree liu kona-ba saida maka joven senti hanesan dalan ida ne’ebé mak fó ba joven durante iha, joven tenki haree familia, hatudu-an hanesan joven ida, respeita moris, respeita liberdade ne’ebé mak heroi sira rai hela.
Iha fatin hanesan, Koordenadóra Ativista Foinsa’e Timor-Leste, Alda Salsinha realsa katak ativista Foinsa’e Timor-Leste nu’udar feto, aktus krime ne’ebé mak durante boot iha Timor, liuliu feto maluk sira ne’ebé mak aborsiu, husi aborsiu ne’e rasik fó impaktu ne’ebé mak aas tebes ba maluk feto sira, ho ida ne’e mak husu ba aman nasaun atu fó motivasaun di’ak ida ba joven para oinsa joven sira labele komete iha aktu kriminozu sira hanesan aborsi
“Ohin loron ita hatene, joventude barak nakonu ho aktus sira hanesan ne’e, entaun durante ne’e ami fó formasaun hamutuk ho madre sira no fó motivasaun ba ami nia maluk feto sira oinsa mak bele asegura feto sira hases-an husi risku aktus aborsiu nian.” hateten Alda Salsinha.
Alda husu ba joven sira seluk katak hanesan joven ne’ebé mak di’ak la tempu ona atu kria konflitus ba ita nia rai, ita presija estuda prepara nafatin ita nia-an tanba futuru iha ita nia liman, ita kria paz estabilidade iha ita nia rain rasik, estuda nafatin hodi dezenvolve nasaun ida ne’e.
