Home Notisia RENETIL Enkontru ho PNTL, Fo Apoio ba Esforsu Reforma iha PNTL

RENETIL Enkontru ho PNTL, Fo Apoio ba Esforsu Reforma iha PNTL

110
0
Saudoso Lasama ho Bandeira RENETIL (foto: RENETIL)

RENETIL halo vizita enkontru ba PNTL hodi fo hanoin kona ba Trajedia Kuluhun, no halo diskusaun kona ba esforsu reforma servisu polisia nian hodi kontribui ba hametin liu tan seguransa. Iha enkontru ne’e, RENETIL mos hetan esplikasaun kona ba esforsu sira ne’ebe PNTL halo hafoin akontesementu iha Kuluhun.

Sekretariu Jeral RENETIL, Joaquim da Fonseca “Russuo”, hamutuk ho nia ekipa ba halo audiensia ho Komandante Jeral PNTL, Julio Hornay, hodi koalia kona ba RENETIL nia hanoin relasiona ho Trajedia Kuluhun.

Russuo expresa katak hahalok ne’ebe individu polisia halo ona RENETIL kondena nafatin. Maibe RENETIL konsidera nafatin importansia PNTL nudar instituisaun seguransa estadu nian, no RENETIL preokupa bainhira PNTL nia naran monu no sosiedade mos la iha konfiansa ba PNTL. RENETIL mos husu PNTL konsidera importansia hosi efeitu funu pasadu nian ba dezenvolvimentu ema, inklui efeitu ba membru PNTL no mos sosiedade tomak. Tanba ne’e husu PNTL atu haree efeitu psikolojiku ne’ebe akontese ona no buka mekanizmu oinsa mak bele tulun membru PNTL sira.

Bainhira RENETIL husu kona ba prosesu saida mak PNTL halo tiha ona no halo dadaun relasiona ho Trajedia Kuluhun, Komandante PNTL, Julio Hornay esplika katak, PNTL hahu halo kedas asaun bainhira Trajedia ne’e akontese.

“Dadersan deit hau husu hodi halo kapturasaun ba membru ne’ebe tiru joven sira. Husi loron ne’e kedas investigasaun ba sira hahu no hau akompanna nafatin. Agora dadaun sira tama on aba prizaun preventiva,” Julio esplika.

Komandante PNTL ne’e mos hatete katak esforsu ba reforma hahu lao dadaun. Nia hatete katak PNTL foin premeiraves hasoru situasaun hanesan ne’e no hakarak PNTL sai defensor ba povo.

“Relasiona ho reforma PNTL establese ona ekipa e’ebe involve reprezentante Ministeriu Interior, Parlementu Nasional, PDHJ no Governo hodi halo auditoria ba regras sira mak iha PNTL laran. Orden mos sai ona hodi halo investigasaun ba komandante sira hosi suspeitu sira iha Trajedia Kuluhun. Investigasaun lao hela dadaun,” Julio hatutan.

Membru Ekipa RENETIL mak ba enkontru ne’e mos husu atu PNTL uza opurtunidade hosi presaun ba reforma ne’ebe mai hosi entidade oin-oin ho didiak. No expresa mos katak RENETIL prontu fo asistensia ba PNTL tuir kbi’it RENETIL nian. Ba ida ne’e PNTL simu no husu RENETIL atu kontribui hametin liutan instituisaun PNTL nudar estadu nia instituisaun.

RENETIL mos husu atu PNTL haree hikas Rekomendasaun CHEGA!, liliu parte ida ne’ebe koalia kona ba dezenvolvimentu polisia nian. Fo mos hanoin ba PNTL katak Relatoriu CHEGA! husu atu dezenvolve PNTL nudar instituisaun ida mak la repete tan saida mak polisia no militar Indonesia nian halo ona iha Timor-Leste iha tempu okupasaun. Ba asuntu ida ne’e, Komandante Jeral PNTL koalia ona ho Diretur CNC hodi tau matan.

Enkontru ne’ebe halao ohin dader (27/11), iha sala enkontru Komandante Jeral nian ne’e, partisipa hosi Komandante Jeral PNTL, Julio Hornay ho ninia ekipa. Hosi RENETIL partisipa hosi Sekretariu Jeral RENETIL, Joaquim da Fonseca “Russuo”, Vice Sekretariu Jeral, Fransisco da Costa Belo “Lires’, Prezidente Konsellu Central RENETIL no Fundador RENETIL, Carlos da Silva “Saky”, Membru RENETIL, Fernando da Costa “Lekinawa”.

LEAVE A REPLY

Please enter your comment!
Please enter your name here