Home Analisa Kuandu Orsamentu Estadu 2019 Fó Ameasa ba Ekonomia Timor-Leste

Kuandu Orsamentu Estadu 2019 Fó Ameasa ba Ekonomia Timor-Leste

275
0
Juvinal Dias comanda Movimento Okupasaun Tasi Timor

By Juvinal Dias*

Artigu ida ne’e nudár rezumu hosi submisaun Core Group Transparency-Timor-Leste  (CGT-TL) ba Parlamentu Nasional kona-ba orsamentu jerál estadu 2019 ho objetivu atu ajuda públiku hodi komprende oinsá orsamentu ne’e fó implikasaun ba ekonomia Timor-Leste.

Fundu Petrolíferu la aumenta sae tanba levantamentu sempre boot liu fali RSE

Dezde estabelesidu iha 2005, Fundu Petrolíferu sai tiha fontes prinsipál iha ita nia orsamentu annual. Maske preambulu Fundu Petrolíferu rasik mensiona katak rendimentu petrolíferu sira ne’ebé hetan ne’e atu harii  “reservas financeiras obrigatórias” ne’ebé bele uza ba benefísiu jerasaun ohin no futuru, maibé polítika orsamentál tinan-tinan ne’ebé aprezenta hosi Governu fó ameasa ba prinsipiu kriasaun rezerva ida ne’e.

Kada tinan Governu besik sempre foti liu Rendimentu Sustentável Estimativa (RSE). Iha proposta Orsamentu 2019 ida ne’e, Governu hakarak atu halo levantamentu millaun $1.541.4 hosi Fundu Petrolíferu, montante  ida ne’ebé boot liu besik dala tolu kompara ho nivel RSE ne’ebé determina tiha iha nivel millaun $529 ba tinan 2019. Konsekuénsia hosi ne’e sei lori hela Timor-Leste hodi enfrakeza nia Fundu Petrolíferu rasik iha futuru, liu-liu kuandu kampu mina-rai ne’ebé fó hela osan mai ita agora ne’e maran ona, no laiha kampu mina-rai seluk ne’ebé bele fó reseita mai Timor-Leste. Tuir loloos Governu rasik hare ona konsekuénsia ne’e, hanesan projeta hela katak Fundu Petrolíferu sei tun ba iha Biliaun $15.9 iha fin de tinan 2019, maske to iha fin de Setembru 2018, ita nia Fundu iha hela biliaun $17.155. Infelizmente ita la aumenta maibé diminui tiha.

Hosi 2019 to iha 2023, Governu planeia hela atu halo despeza orsamentál hamutuk biliaun $9.565, no entre montante ida ne’e Billaun $8.323.30 sei mai hosi Fundu Petrolíferu rasik. Enkuantu reseita hosi fan mina-rai nian ne’ebé Timor-Leste atu hetan iha periodu ida ne’ebé hanesan ne’e iha de’it biliaun $1.223.60, no investimentu Fundu Petrolíferu sei hetan de’it biliaun $2.778.70. Karik laiha setór ekonomia seluk mak dezenvolve hodi prodús reseita ba substituisaun rendimentu petrolíferu iha futuru, Timor-Leste sei enfrenta defisit fiskál ida ne’ebé boot liu iha futuru, espesialmente karik Greater Sunrise seidauk bele dezenvolve. Ita hotu imajina tok karik Timor-Leste la’o sem Fundu Petrolíferu?

Sosa asoens partisipasaun iha JV Sunrise sei krexe Orsamentu 2019

Maske Proposta orsamentu ne’e deside ona montante iha biliaun $1.827, maibé montante ne’e sei aumenta tan ba biliaun rua resin dolar Amerika, hafoin planu ambisiozu Governu nian hodi sosa tan asoens partisipasaun kompañia SHELL iha Joint Venture (JV) Sunrise ho valor millaun $300 foin daudauk hafoin Governu aprezenta tiha ona nia proposta orsamentál ba Parlamentu Nasional. Planu foun ida ne’e sei halo levantamentu hosi Fundu Petrolíferu nian mós bele sae to iha nivel biliaun $1.841.4.

Planu sosa asoens partisipasaun kompañia Conoco Philips no SHELL nian sei halo Timor-Leste nudár na’in maioritariu iha konsorsiu Sunrise nian ne’ebé sei halo Timor-Leste hodi bele goza mós “company take” hosi lukru fan nia mina-rai no gas Sunrise ne’ebé Joint Venture sei halo. No karik JV sira ne’e halo lukru, entaun Timor-Leste nia Fundu Petrolíferu sei hetan aumenta osan hosi dividend ne’ebé TimorGAP,EP sei selu, inklui mós lori TimorGAP,EP iha esperiénsia boot ida iha indústria petrolíferu (karik nia mak sei reprezenta Timor-Leste nia parte iha Joint Venture).

Maske nune’e, Timor-Leste mós sei leva responsabilidade maioritaria ba risku no kustu investimentu sira ne’ebé sei halo. Dividend ne’ebé TIMORGAP, EP sei selu ne’e depende ba kustu investimentu no kustu operasionál ne’ebé sei halo durante periodu produsaun kampu Greater Sunrise nian. Keta haluha, katak Dezde 2012 to 2017, TimorGAP, EP, simu ona millaun $39 hosi Orsamentu Jerál Estadu atu finansia nia atividade, nee seidauk inklui millaun balu tan ne’ebé aloka hosi Orsamentu 2018. Pelu kontráriu, rendimentu ne’ebé TimorGAP,EP hetan hosi nia investimentu ida ne’e seidauk bele rekopera despeza estadu hirak ne’e. Figura hanesan ne’e reprezenta hela katak TimorGAP, EP, presiza hadi’ak nia planu negósiu kuandu envolve ona diretamente iha Joint Venture nian nune’e bele aumenta valor.[1]

Buat sosa no fan asoens partisipasaun ne’e nudár buat pratika negósiu baibain ida ne’ebé akontese iha merkadu indústria ekstrativa nian. Buat sosa no fan asoens ne’e depende ba oportunidade no valor sira ne’ebé parte ruma ekspeta atu hetan iha futuru, katak bainhira kampu ida labele ona fó serteza ba nia asionista atu halo osan, asionista ne’e sei fan nia asoens atu evita hodi labele lakon nia valor osan, basa valor real osan ohin loron ne’e sei di’ak liu ho valor osan iha futuru. Ba kazu Sunrise, Conoco Philips no Shell hakarak fan sira nia asoens partisipasaun nian tanba sira la fiar katak konseitu dezenvolvimentu ida ne’ebé Timor-Leste defende durante ne’e sei halo sira halo osan kompara ho sira nia preferénsia rasik atu lori kadoras ba Darwin ka LNG ida ne’ebé namlele.

La’ós buat segredu ida katak indústria petrolíferu ne’e nudár indústria ho karákter teknolojia karun no sufistikadu, mai ho risku ida ne’ebé as ba nia finansiamentu no ambientál nian, no mós nia retornu ida ne’ebé mós volatile tanba depende ba iha inserteza hosi merkadu petróleu nian ne’ebé laiha ema ida mak bele halo prediksaun.

Tanba Governu inklui ona planu sosa asoens ne’e iha Proposta Orsamentu Estadu 2019, espesialmente asoens partisipasaun Conoco Philips nian ne’e, entaun dalan ida ne’ebé di’ak liu tan atu bele asegura katak planu ida ne’e sei fó vantajen ba iha Timor-Leste mak Parlamentu Nasional tenke ezije ba Governu hodi aprezenta “Supporting Document” ne’ebé tenke esplisitamente esplika sai planu negósiu sira iha relasaun ho sosa asoens partisipasaun Conoco Philips no SHELL nian iha Join Venture Sunrise. Ladún furak bainhira Parlamentu Nasional aprova montante boot ida ba investimentu ida ne’ebé boot maibé seidauk hatene informasaun sira ne’e ho detailladu.

Reseita doméstika seidauk bele sae atu substitui Rendimentu Petroliferas

Buat krusial seluk ba Timor-Leste nia futuru mak ita nia rendimentu doméstika besik la sae maka’as tinan-tinan. Dezde restorasaun independénsia nian to ohin loron, reseita doméstika nunka mais ultrapasa nivel millaun $200 kada tinan no projesaun ba tinan lima oin mai mós sei la ultrapasa millaun $240 kada tinan maske despeza sira iha tinan lima oin mai sei sa’e maka’as no kampu Bayu Undan sei maran.

Setór eletrisidade nudár ezemplu ida hosi investimentu doméstika ho kustu as ne’ebé hala’o hosi Governu dezde tinan 2009. Durante ne’e, setór ne’e kontribui liu metade hosi total rendimentu doméstiku ne’ebé Timor-Leste koleta hosi “taxas no Enkargus” maizumenus $30 miloens kada tinan. Maske nune’e, ita labele haluha katak montante ba kapitál despeza ba setór ne’e maizumenus iha biliaun $1.2 no kustu operasionál iha nivel $100 miloens por anó, ne’ebé halo hela setór ne’e kontinua moris iha defisit nia laran.

Setór agrikultura no indústria prosesamentu ai han ne’ebé loloos iha poténsia boot iha Timor-Leste seidauk bele hetan atensaun hosi Governu atu bele sai nudár setór ida hodi substitui rendimentu petrolíferu nian. Alokasaun orsamentál ne’ebé tinan-tinan sempre la liu 2% halo tiha setór importante ne’e abandonadu tiha. Iha parte seluk peskas, pequaria mós labele fó kontribuisaun maka’as ba rendimentu doméstika maske merkadu no poténsia rai laran fó apoiu tebes. Ho neglijensia ida ne’e, Timor-Leste tenke depende ba ai han sira hosi rai li’ur no halo tiha Timor-Leste nia dependénsia ba importasaun, inklui hamenus tiha rendimentu doméstika rasik.

Aleinde ne’e, setór Turizmu mós seidauk bele kontribui maka’as maske Timor-Leste iha fatin turistiku sira ne’ebé bele mós atrai ema atu mai hare. Anualmente, taxa hosi visa enjeral kontribui de’it $3 miloens no ida ne’e bele aumenta kuandu Timor-Leste bele hadi’ak nia setór turizmu ho di’ak liu tan, inklui aplika tarefa ba vizitante sira iha area turistika. Maibé infrastrutura hanesan dalan, hariis fatin, bee mós, fatin deskansa no seluk tan atu hafasil asesu mak bele determina kontribuisaun setór ida ne’e ba ekonomia doméstika.

Presiza Inkéritu Parlamentár no investigasaun ba projetu Annex 12 no 13

Iha proposta OJE 2019 ida ne’e, iha Annex 12 no 13 Livru 3 A kona-ba Fundu Infrastrutura nian, Governu propoin atu aloka millaun $27.654 hodi selu dívida ba projetu 135 ne’ebé ajudika hosi Komisaun Administrasaun Fundu Infrastrutura (CAFI) iha 2017 ba reabilita estrada sira no mós millaun $3.150 atu selu ba reabilitasaun ponte 8. Espesialmente ba projetu estrada nian ne’e, Governu sei aloka millaun $231.73 iha 2020 no millaun $37.2 iha tinan 2021 atu bele selu hotu valor projetu ne’e ne’ebé nia valor hamutuk millaun $331.741.

Iha Agostu 2018, kuandu Governu aprezenta proposta Orsamentu 2018 nian ba Parlamentu, CGT-TL husu atu Parlamentu Nasional inísia inkéritu Parlamentár no investigasaun ba projetu emerjénsia sira ne’ebé ajudika tiha iha tinan sira anterior. Valor total projetu sira ne’e besik to iha montante $400 miloens. Ideia hosi ejijénsia ida ne’e mak hakarak atu Parlamentu Nasional hala’o nia funsaun hodi fiskaliza tiha planu ne’e hodi nune’e bele evita korrupsaun no mós salva tiha despeza estadu nian.

“Bainhira Governu labele kontrola ona nia despeza sira ne’e tuir regra loloos ba kategoria sira ne’ebé iha, Timor-Leste sei lakon valor osan barak tan, tanba gasta osan sem iha avaliasaun sira ne’ebé transparente no kontavel” no “dalan ida ne’ebé prudente liu ba Parlamentu atu halo molok aprova osan ba selu projetu sira ne’e mak, tenke halo verifikasaun ba projetu sira ne’e hodi hatene merese ka lae projetu ne’ebé implementa ona ne’e tama kategoria necessidades urgentes e imprevistaska lae, hodi nune’e ita bele salva osan povu nian ka uza osan povu nian atu fó benefísiu duni ba povu sira duke benefisia ema elite ka kompañia na’in sira de’it, inklui ajuda tiha ema riku sira hodi evita an hosi kontabilidade no responsabilidade kompañia sira hodi la kumpre regra no lei aprovizionamentu sira ne’ebé prevaleze iha Timor-Leste. ……..

Infelizmente Parlamentu Nasional la konsege hala’o inkéritu parlamentár ida ne’e, karik tanba tempu mak menus, maibé ba orsamentu 2019, ami kontinua enkoraja ba Parlamentu Nasional atu halo fiskalizasaun ida ne’ebé di’ak liu, karik rekursu Parlamentu nian menus, ita boot sira bele husu apoiu hosi investigadór Komisaun Anti Korrupsaun nian ka investigadór sira hosi Ministériu Públiku nian.

[1]https://neonmetin.info/buletin/2018/11/20/oinsa-tl-bele-sukat-oportunidade-hosi-sosa-asoens-conoco-philips-nian-iha-jv-sunrise/

*Ativista RENETIL no Analista Orsamentál ba CGT-TL, Membru Concelho Consultativo do Fundo Petrolifero (CCFP)

LEAVE A REPLY

Please enter your comment!
Please enter your name here