Home Analisa Oinsa TL Bele Sukat Oportunidade Hosi Sosa Asoens Conoco Philips Nian iha...

Oinsa TL Bele Sukat Oportunidade Hosi Sosa Asoens Conoco Philips Nian iha JV Sunrise?

296
0
Juvinal Dias comanda Movimento Okupasaun Tasi Timor

By Juvinal Dias* 

Analiza ida ne’e nudár kontribuisaun idea balu ba publiku kona-ba planu Governu nian hodi sosa asoens Conoco Philips nian iha Joint Venture Sunrise nian hamutuk 30%. No espera katak opiniaun ne’e bele ajuda públiku hodi bele iha koñesimentu kona-ba oportunidade no risku sira hosi planu ida ne’e ba interese Timor-Leste nian. 

Atu alkansa objetivu ida ne’e, foin dadauk ne’e Parlamentu Nasional aprova ona primeira alterasaun ba Lei das Atividades Petroliferas, espesialmente artigu 22 kona-ba partisipasaun estadu nian iha atividade petroliferas ruma, hodi inklui “outras pessas coletivas publicas” nudar mos benefisiariu hosi Artigu 22 ida ne’e. Maske ita hatene katak partisipasaun estadu liu hosi sosa asoens Conoco Philips nian iha Joint Venture Sunrise ne’e buat ketak ida direitu estadu nian hodi sai nain ba asoens 20% depois kompañia operador deklara kampu ruma komersiál ona. 

Aleinde alterasaun ba lei, Governu mos hatama ona montante $350 miloens atu sosa asoens ne’e iha ona proposta Orsamentu Jeral Estadu 2019 nian iha kategoria transferénsia publika iha Ministeriu Petroleu no Rekursu Minerais. 

Nune’e, ho planu ida ne’e, Core Group Transparensia-Timor-Leste (CGT-TL) hakarak fahe perspetiva sira balu kona-ba planu sosa asones ne’e hanesan tuir mai ne’e:

Pasu ba Timor-Leste hodi involve ba foti desizaun ba futuru Sunrise

Ita hotu hatene katak dezde tinan barak nia laran Timor-Leste prefere atu prosesa kampu gas Greater Sunrise nian iha rai maran Timor-Leste nian. Dezde tinan balu liu ba, Timor-Leste aloka ona osan lubuk ona atu harii supply base iha Suai, auto-estrada hodi liga Suai-Beaco, kompensasaun ba rai komunidade lubuk iha Suai, Betano no fatin balu tan atu viabiliza projetu Tasi Mane ida ne’ebé sei uza ba gas no kondensadu hosi Greater Sunrise. 

Maske nune’e, preferénsia ba konseitu dezenvolvimentu ne’e la’os ida de’it, maibé iha tolu kedas. Ida mak dada mai Timor-Leste no rua seluk mak atu dada kadoras Greater Sunrise nian ba junta ho kadoras Bayu Undan nian hodi lori ba iha Planta LNG iha Darwin ne’ebé kompañia sira hare katak baratu liu tanba la presiza kustu kapitál no investimentu atu dada kadoras ida ne’e foun no la presiza atu harii tan planta LNG ida ne’ebé foun. Conoco Philips iha nia interese tanba iha nia asoens iha Planta LNG Darwin no mós nudár operador iha kampu Bayu Undan. 

Opsaun segundu mak LNG ida ne’ebé namlele iha tasi leten ne’ebé sei presiza planta LNG ida ne’ebé foun liu maibé la presiza kadoras ida ne’ebé naruk no bele hatuur besik liu iha kampu ne’e nia leten. 

Dezde tinan hat nulu liu ba, autór indústria hahú ona halo estudu kona-ba oinsá inísia planta LNG namlele ida. Iha tinan sira atu besik remata noventa, mundu konsege iha fasilidade ba planta produsaun ba LNG ida namlele. 

No iha tinan noventa nia klaran kompañia Royal Dutch Shell ne’ebé kaer mós asoens 27% iha Joint Venture Sunrise nian dezenvolve ona nia teknolojia rasik ba LNG namlele ida ho funsaun multi-tipu ba nia projetu sira ne’ebé iha inklui iha Timor-Leste. 

Dezde iha tinan 2010, Shell nia teknolojia ba LNG planta ida ne’ebé namlele mak sai tiha JV Sunrise nia opsaun atu uza ba Greater Sunrise. Shell nia interese ida ne’e mós sei sai obstákulu ida ba Timor-Leste atu alkansa ita nia objetivu. 

Opsaun LNG mai iha rai maran Timor-Leste ne’e sei sai diskusaun iha Joint venture nia laran, espesialmente tanba interese negósiu hosi parseiru sira seluk nian. Timor-Leste tenke konvense sira seluk, no “konvense” iha pratika negósiu ne’e la’os ho ibun mamuk, maibé bele ka lae Timor-Leste asegura parseiru sira seluk nia lakon? Ka Timor-Leste bele selu kustu investimentu sira seluk ne’ebé halo sira halo osan barak. 

Risku ida ne’ebé Timor-Leste bele konsidera mak kuandu ita bele kobre hotu kustu sira ne’ebé loloos membru Joint Venture seluk bele kobre mós, ne’e sei hamenus Timor-Leste nia benefísiu, maibé aumenta parte seluk nia lukru. 

Dalan atu evita mak, presiza kalkula loloos kapitál investimentu hira mak Timor-Leste sei gasta kuandu dada kadoras mai iha Timor-Leste, refining margin hira mak Timor-Leste sei hetan hosi kada barríl kompara ho lukru petrolíferu karik mina-rai ho gas ne’e fan tuir Upstream de’it, inklui kompara ho konseitu dezenvolvimentu seluk. 

TimorGAP, EP, mak reprezenta estadu no selu de’it dividen no taxa ba estadu.

Kuandu Timor-Leste konsege duni sosa asoens ne’e, kompañia mina-rai Timor-Leste, TimorGAP,EP bele ka sei representa duni estadu Timor-Leste kuandu hetan ona aprovasaun hosi Konsellu Administrasaun TimorGAP, EP nian hanesan haktuir iha Artigu 9 hosi DECRETO-LEI N.º 31 /2011 de 27 de Julho kona-ba TIMOR GAP – TIMOR GÁS & PETRÓLEO, E.P.

Maske partisipasaun sira ne’e nudár parte hosi lori TimorGAP,EP ba esperiénsia ida ne’ebé boot hamutuk ho kompañia mina-rai sira ne’ebé iha esperiénsia naruk iha indústria petrolíferu nian, maibé buat importante liu ba Timor-Leste atu konsidera mak kapasidade finanseiru no mós teknolojia no esperiénsia Timor GAP, EP nian iha indústria ekstrativa, espesialmente iha atividade “Offshore-tasi laran” ne’ebé kompleksu. TimorGAP,EP nia esperiénsia envolvimentu iha atividade Offshore liu hosi nia subsidiariu TIMOR GAP PSC 11-106, Unipessoal, Lda ne’ebé mak sai parte ida hosi Joint Venture iha JPDA 11-106 ne’ebé ENI mak sai operador ho INPEX. 

Dezde 2012 to 2017, TimorGAP, EP, simu ona millaun $39 hosi Orsamentu Jerál Estadu atu finansia nia atividade. Pelu kontráriu, rendimentu ne’ebé TimorGAP hetan hosi nia investimentu ida ne’e seidauk bele rekopera despeza estadu ida ne’e. Figura sira ne’e reprezenta hela katak Timor GAP presiza hadi’ak nia planu negósiu nian kuandu envolve ona diretamente iha Joint Venture nian nune’e bele aumenta valor. 

Kuandu TimorGAP, EP reprezenta ona estadu iha Joint Venture Sunrise nian, TimorGAP sei selu dividen no taxa hosi nia lukru mai iha estadu. Montante dividen no taxa ne’ebé mak TimorGAP sei selu mai iha estadu Timor-Leste ne’e depende ba rendimentu netto ne’ebé kompañia ne’e sei halo. Dividen sei boot liu kuandu osan investimentu ne’e ki’ik no retornu as. Maibé kuandu kustu investimentu nian as tebes, dividen mós sei menus, inklui taxa ne’ebé sei selu mai iha estadu mós menus tanba lukru menus. Dividen katak porsaun hosi lukru ne’ebé kompañia ida selu ba estadu Timor-Leste 

Iha kazu sosa asoens ConocoPhillips nian ne’e, maske ne’e nudár pasu di’ak ida, maibé Timor-Leste tenke kuidadu hodi sura nia kapitál investimentu nian ba projetu Sunrise nian, espesialmente kuandu prefere atu hili opsaun ida entre opsaun tolu ne’ebé iha ona hanesan dada kadoras mai Timor-Leste, dada kadoras ba Darwin no halo planta LNG ida namlele. 

Net Present Value (NPV) no Internal Rate of Return (IRR) mak bele determina presu asoens ne’e baratu ka karun

Maske iha peritu no polítiku balu iha rai laran hateten katak valor $350 miloens ne’ebé Timor-Leste selu atu sosa asoens partisipasaun Conoco Philips nian iha Joint Venture Sunrise nian, maibé sedu liu atu dehan ne’e baratu ka karun. 

Normálmente presu asoens ne’e sura hosi Net Present Value (NPV) ba osan sira ne’ebé gasta no ekspeta atu hetan iha futuru. Kapitál investimentu hosi Conoco Philips no cash flow ka osan sira ne’ebé ekspeta atu bele hetan mak bele determina valor ida ne’e karun ka baratu liu.

Infelizmente, informasaun sira kona-ba kálkulu ida ne’e la publika sai, no montante ida ne’e besik atu hanesan rezultadu ida hosi negosiasaun ida ne’ebé hala’o entre ekipa negosiasaun Timor-Leste ho Conoco Philips ne’ebé fasilita hosi James Rhe, na’in ba kompañia TL Cement Lda ne’ebé iha besik tempu ne’ebé hanesan hetan kapitalizasaun millaun $50 hosi Orsamentu Jerál Estadu 2018 ne’ebé esplika nudár parte ida hosi partisipasaun estadu nian iha projetu Simentu iha Baucau.

Iha lidun seluk, ofisiál senior ida iha Conoco Philips hateten ba CGT-TLkatak Conoco Philips hakarak fan nia asoens iha JV Sunrise tanba razaun ekonómiku. Conoco Philips komprende katak desizaun Governu Timor-Leste nian atu dada kadoras mai iha Timor-Leste nudár desizaun polítika ida ne’ebé afeta tebes ba valor komersiál ne’ebé kompañia ne’e hetan. 

Conoco Philips hare katak kuandu dada kadoras mai iha Timor-Leste, maizumenus retornu ne’ebé ekspeta atu hetan ne’e maizumenus 7% hosi kapitál investimentu biliaun $15.621 sei labele halo sira halo lukru tanba normálmente Conoco Philips sei ba empresta osan atu halo investimentu ho nia funan maizumenus 8 ka 9%. 

Nune’e, hosi perspetiva ekonómiku Conoco Philips prefere hodi bele ba fan nia asoens duke mantén iha konsorsiu. Karik Conoco Philips mak hasa’e tiha valor ne’e liu fali millaun $350, Timor-Leste sei sosa tanba obsesaun boot ba dada kadoras mai Timor-Leste. 

Woodside nia pozisaun 

To ohin loron Woodside ho nia parseiru seluk hanesan Shell no Osaka Gas seidauk foti desizaun ida formal kona-ba tranzasaun ida ne’e. Maske iha kualkér Joint Venture ida, iha regra ida kona-ba direitu de preferénsia atu sosa asoens parseiru ida kuandu membru Joint Venture ida deside atu fan nia asoens partisipasaun nian. 

Iha Outubru nia klaran, Chefe Woodside, Peter Coleman hateten katak maske Timor-Leste sosa ona asoens hosi partisipasaun Conoco Philips nian iha Joint Venture Sunrise, maibé Woodside sei prefere dezenvolvimentu kampu Greater Sunrise nian ba Upstream ida ne’ebé ketak hosi Downstream. Deklarasaun operador ne’ebé ladún fiar ba valor ekonómiku hosi dezenvolvimentu Sunrise tuir preferénsia Timor-Leste nian ba dada kadoras Sunrise nian mai iha rai maran kosta súl Timor-Leste nian. 

Deklarasaun Woodside nian ne’e sei sai obstákulu boot ida ba Timor-Leste hodi asegura valor ekonómiku Sunrise nian ba benefísiu Timor-Leste. Parlamentu Nasional no órgaun soberania sira seluk presiza husu ba TimorGAP,EP atu justifika valor ekonómiku sira ne’e liu hosi analiza ba kustu no benefísiu sira nian ida ne’ebé profundu no kle’an. 

*Ativista RENETIL no Analista Orsamentál ba CGT-TL, Membru Concelho Consultativo do Fundo Petrolifero (CCFP)

LEAVE A REPLY

Please enter your comment!
Please enter your name here