Home Memoria Lansamentu Livro ‘Unmarked Graves’, Stratejia no Tatika Oho PKI Aplika mos iha...

Lansamentu Livro ‘Unmarked Graves’, Stratejia no Tatika Oho PKI Aplika mos iha Timor-Leste

89
0
Livro Vannessa Hearman, Unmarked Graves (Foto: NewsMix Channel)

Ideolojia eskerda nian mak dala barak sai baze ba idea hodi luta kontra opresaun. Maibe bainhira situasaun politik la favorese ideolojia eskerda atu buras, ka bainhira kontra revolusaun mosu, sira ne’ebe fiar iha sosializmu sai vitima ba sira nia idealizmu. Tanba sosializmu no komunizmu ema barak hetan oho iha Argentina, El Salvador, Alemanha, Guatemala, Cina, Korea, Tailandia, Indonesia, no Timor-Leste.

Livro Unmarked Graves: Death and Survival in the Anti-Communist Violence in East Java, Indonesia, hatudu Similiaridade Violasaun Dereitus Umanus iha Indonesia no iha Timor-Leste no mos rai sira seluk. Livro ne’e hakerek hosi ativista pro-ukun rasik an Timor-Leste nian, no Dosente estudu Indonesia nian iha Charles Darwin University, Australia, Dotora Vannessa Hearman. Livro ne’e fo sai kona ba aktu violensia kontra dereitus umanus mak halo hosi militar Indonesia iha Java Leste (Jawa Timur), liliu iha Blitar, hosi tinan 1965 – 1966. Ema rihun-atus-ba-atus mak mate tanba fiar iha idea sosializmu no komunizmu.

Vannessa lansa ninia livro iha Timor-Leste tanba haree ba importansia hosi istoria violasaun dereitus umanus no mos razaun invazaun militar Indonesia nian mai Timor-Leste ne’ebe mak halo tinan 10 hafoin oho membru komunista ho ninia asosiadu sira hamutuk 500,000 resin, iha Indonesia.

Lansamentu ne’ebe halo iha Auditorium UNTL, loron hirak liuba (25/10), Vannessa hateten, Timor-Leste fatin ne’ebe uniku no espesial, okupasaun militar Indonesia iha Timor-Leste importante, hodi hatene no buka tuir lalaos violensia ne’ebe sira halo.

“Hau hakerek livru laos konaba Timor-Leste, livru ne’e mai husi hau nia Skripsi S3, iha universidade iha Melbourne, Australia. Maibe wainhira militar Indonesia invade Timor-Leste iha 1975, sira uza estratejia no tatiku hodi kontra opozisaun politika iha Indonesia, ne’e loke hau nia matan no eduka hau, liu-liu masakre iha Santa Cruz. Eventu ida ne’e, halo hau ativu liutan hodi apoio luta ukun rasik an Timor-Leste nian. Hosi ne’eba mak hau haree oinsa militar Indonesia halo ba Timor-an sira.”

Vannessa mos haktuir katak peskiza ne’e halo iha Blitar no kobre istoria violensia hosi tinan 1965. Iha tinan 1965, militar Indonesia halo operasaun hodi oho ema komunista, sosialista, ema ne’ebe fo apoio ba militantes Prezidente Soekarno nian. Momentu ida ne’e mos mak Jeneral Soeharto halo kudeta, foti poder no autoridade iha Indonesia. Ema 500.000 mill resin mak mate, ema barak mos tama ba prizaun.

“Hau hakerek istoria hosi tinan 1965 – 1968 iha Java Leste. Iha tinan 1968, militar Indonesia halo operasaun boot kontra ema iha baze rural Partidu Komunista Indonesia (PKI) nian iha Blitar. Ema barak mate durante operasaun ho naran Trisula, hosi Junhu to’o Septembru 1968. Komunidade iha Blitar sai vitima hosi operasaun kontra militar Indonesia.  Lider komunista sira hetan kaer no  tribunal fo kastigu mate ka hela tinan naruk iha prizaun iha Java”, tenik Vanesa, ne’ebe uluk mos fo solidaridade ba Timor, hodi hetan independensia.

Vannessa mos hateten katak hanesan esperiensia timor oan  sira nian, militar Indonesia hatudu forsa ba populasaun iha Blitar, buka tuir povu sira nia hela fatin tanba militar no lider lokal hakarak kontrola no observa, hodi hatauk no halo intimidasaun kontra populasaun. Hanesan  mos esperiensia Indonesia halo iha Timor, governu no militar Indonesia sira foti labarik sira hosi Blitar, hodi prevene ka hapara posibilidade labarik sira atu halo vingansa konaba asasinu sira nia inan ho aman.

Tuir Vanesa katak iha tempu reformasaun nian, Indonesia, ne’ebe agora dadauk lidera hosi Prezidente Joko Widodo, sobrevivente sira, no familia sobrevivente, ezije hela justisa no mudansa maibe governu Prezidente Jokowi nian, halo oituan deit ba asumtu direitus umanus nian.

Iha fatin hanesan, orador Timor-oan ida hosi hosi Australian National University, Ivo Mateus Goncalves, hateten  tanba sa diskusaun konaba komunista iha Indonesia mai halo fali diskusaun iha Timor-Leste?  Mateus Gonsalves esplika katak Timor labele haluha katak bainhira Indonesia invade Timor-Leste, ne’e tinan 10 depois de masakre ba PKI sira iha Indonesia, ne’e akontese iha tinan 1965. Depois iha 7 Dezembru 1975 Indonesia tama mai Timor-Leste, ne’e hatudu katak iha ligasaun ida ne’ebe forte.

“Tipu de violensia ne’ebe mak akontese iha Indonesia no akontese iha Timor-Leste depois de militar Indonesia invade. Bainhira militar Indonesia halo operasaun militar Blitar Selatan,.Sira mos aplika operasi Pagar Betis, operasi Kikis no operasi Trisula iha Timor-Leste tempu ne’eba, sira tau rai naran Trisula iha parte Lospalos nian. Uluk iha Indonesia nia tempu dala barak ita konfundi tortura ne’ebe militar Indonesia aplika iha Timor, karik sira aprende hosi Estadu Unidus, oinsa kaer ema, halo tortura para hetan informasaun, kaer populasaun iha fatin ida no kontrola populasaun sira”, hateten Mateus.

Eiz Prizoneiru Politiku iha Cipinang Jakarta, David Dias Ximenes mos hatoo nia esperiensia iha eventu lansamentu livru refere. David koinese lider PKI balun mak kastigu hamutuk iha Komarka Cipinang no nia hanoin hikas momentu ne’eba nudar fatin eskola politika ida ba ema politiku sira. David mos hatutan dehan, bainhira  baze apoio iha Matebian rahun iha 1979, Timor oan barak tan laiha asistensia, laiha logistika, balun moras entaun tenke tun mai no iha tempu ne’eba militar Indonesia halo ‘Pembersihan’ ka hamoos tiha element sira mak kontra Indonesia ka kontra ideolojia colonial nian.

“Hau sei lembra naran balun no sira ne’e oho dor ema maibe ita nia boot sira dehan rekonsiliasaun, entaun ami mos nonok deit. Kuandu ita nia maluk sira evakua ba ai laran, forsa Indonesia halo kedas serku hosi kotuk, entaun ita halo kedas asitensia logistika liu hosi Frente Clandestina. Tanba saida mak Frente Clandestina komesa mosu hodi apoia logistika, iha tempu ne’eba ita mos komesa ona mobiliza joven sira hodi bele haforsa ita nia gerilia. Kuandu ita nia baze apoio monu, militar Indonesia sira hakilar katak sira manan tiha ona. Iha tempu ida ne’eba ita la iha meius komunikasaun ka media laiha”, hateten David.

Esperiensia ne’ebe PKI halo iha Indonesia hodi luta kontra sira nia militar Indonesia nia asaun violensia fo konsequensia bot ba ema nia moris. Militar ho ninia ema mak suporta sira halo tortura, intimida, oho ema sivil barak, inklui feto, mak iha ideolojia diferente. Situasaun hanesan mos mak akontese iha Timor-Leste, rejime militar ida hanesan mak halo ba ema resistensia Timor-oan sira. Istoria mak hanesan konta hosi  Atual Deputadu Parlamentu Nasional, David Dias Ximenes. Nia informa katak iha tinan 1980 premeiru levantamentu iha Maribia marka prezensa  rezistensia nian, ema barak mate, no tortura ne’ebe militar Indonesi sira halo.

“Inan feton sira ne’ebe hetan torturasaun military Indonesia sira halo at liu, dala ruma ami la sadar hatete tiha ba militar sira ne’e, memangnya bapak tidak punya ibu?Sira halo torturasaun ne’ebe la serve sira halo ba feto maluk sira. Violasaun sexual no violensia ba feto maluk sira ne’e todan no hetan sofrementu boot liu. Bainhira soldadu Indonesia sira oho jovens sira, soldadu sira ne’e kontente. Kapitaun ida naran Bunjo, kalan ida koalia ho hau dehan “Pak David ini saatnya kau mau jadi pahlawan atau penghianat, kalo mau jadi pahlawan resikonya mati, kalo mau jadi penghianat kamu hidup, tetapi tidak pernah ada di dunia yang berjuang untuk kemerdekaan menjadi kalah. Saat Kamu di aniaya, kau sebut satu nama saja yang berkerja dalam organisasi, kau sudah menjadi penghianat.” Iha tinan 1984 ami komesa sidang deit no lori ami ba komarka deit, no labele oho, lia fuan ne’e hatoo hosi Mario Carascalao iha tempu ne’eba, tanba se oho sira ne’e parte direitus umanus sei tau matan.”

Relatorio Chega! temi momoos konaba razaun invasaun Indonesia nian. Relatoriu ne’e dehan katak Indonesia nia funu iha Timor-Leste ne’e nudar funu sagradu no heroiku kontra komunizmu. Invazaun no okupasaun Indonesia nian ne’e ema 200,000 resin mak hetan oho, kastigu, lori lakon, husik mate hamlaha no barak mak sai refujiadu no deskloka hosi sira nia hela fatin.

Relatoriu Chega! mos sita katak politisida (oho ema tanba iha ideolojia diferente) ne’ebe akontese iha Indonesia, oho ema entre 250,000 to’o 1 milaun. Oho ne’ebe akontese, tuir Jenderal Soeharto nian nia razaun katak atu, “Memulihkan keamanan dan ketertiban sebagai akibat pemberontakan G30S/PKI serta kegiatan-kegiatan ekstremis dan subversif lainnya (halo rekuperasaun seguransa no orden tanba rebeliaun hosi G30S/PKI no mos atividade extremizmu no subersivu sira seluk).”

Livro Vannessa nian fo sai informasaun importante kona ba sofrementu hosi vitima violasaun dereitus umanus mak akontese iha Indonesia no livro ne’e kapta istoria mak hanesan, akontese iha Timor-Leste. Timor-Leste konsege ona halo rekonsiliasaun ho nia pasadu maibe Indonesia to’o agora seidauk bele loke ninia memoria pasadu, liliu violasaun mak halo ba ema PKI sira.

LEAVE A REPLY

Please enter your comment!
Please enter your name here