Reportajen David da Costa Gusmao
Ministeriu Saude (MS) liu husi Sala Situasaun Centru Integradu Jestaun Krize (SS-CIJK) ohin rejista tan timoroan nain 5 mate iha izolamentu Vera Cruz, matebian nain 5 ne’e adultu ema nain 2 no bebe nain 3.
Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Dr. Rui Maria de Araujo informa, óbitu ne’ebé relataohin loron 17 Agostu tinan ne’e ema nain 5, adultu nain 2, mate iha inan nia kanotak nain 3.
“Mane idade tinan 41, timoroan hela iha Ermera, diagnostikadu iha 9 Agostu 2021, ho sindroma insufisiénsia respiratória aguda (SIRA) tanbá Covid-19 (Teste PCR nia rezultadu pozitivu, Cycle Threshold: E gene 31,7). Matebian iha istória anemia krónika tanbá Multiple Mieloma (tipu ida husi leusemia)”, Dr. Rui esplika liu hosi komunikadu imprensa ne’ebe Neon Metin asesu iha loron, Tersa 17/08.
Matebian ne’e transfere ba Vera Cruz iha loron ne’e kedas, no halo tratamentu, tuir protokolu tratamentu ba Covid-19. Matebian hakotu iis mais menus iha oras 17:00 loron 16 Agostu.
Nia Salienta iha mos Matebian Feto, idade 37 timoroan, enkamiña husi HNGV, iha 12 Agostu 2021, ho diagnóstiku G2P1A0 (isin-rua daruak, tuur-ahi dala ida, la iha istória abortu), matebian isin-rua semana 40 ona, ho mós diagnostiku Covid-19 (CT 27), ho sintomas respiratóriu.
“Iha loron 16 Agostu kalan, hahu prosesu tuur-ahi, maibé tuku 01”00 dader, loron 17 Agostu, inan iis-kotu tanbá amnion liquid embolia no oan iha inan nia kanotak mós la salva,” nia esplika.
Alende ne’e iha bebe nain rua mos mate iha inan nia kanotak,husi inan isin-rua G3P1A1, ho semana 28. inan iha kondisaun estável, maibé ho diagnostiku Covid-19. Bebe ida seluk mos mate iha inan nia kanotak, husi inan isin-rua G4P2A1, semana 33. Inan sintomatiku ho diagnostiku Covid-19, agora kondisaun estável, hahú dia 12 Agostu 2021.
Nia haktuir familia matebian nain 5 ne’e, koordena ona ho ekipa saúde atu halo funeral tuir protokolu ne’ebé adopta iha Timor-Leste.
Entertantu dados jeral ba COVID-19 ohin loron 17 Agostu tinan ne’e, kazu foun 247, kazu rekuperadu 37, kazu ativu baixa 2,349, kazu óbitu ohin nain 5 no total óbitu hamutuk 38 no total kazu konfirmadu kumulativu sura husi Marsu 21 2020 to’o mai ohin loron 17 Agostu 2021 hamutuk 12,929.
