Reportajen Calisto dos Santos Oqui
Kandidatu Prezidente Republika, Virgilio da Silva Guterres ‘Lamukan’ halao nia kampaña ho tipu diálogu iha Aldeia Punu, Suku Pairara munisipiu Lautem, hodi koalia konaba importansia setór agrikultura iha Timor-Leste.
Ba komunidade sira ne’ebe partisipa iha diálogu ne’e Lamukan hateten sekarik sai Prezidente, Virgilio sei halo komunikasaun permanente ho governu, liu-liu Primeiru Ministru atu fo atensaun makaas ba setór agrikultura, tanba maioria populasaun 80% moris no depende ba agrikultura.
Lamukan dehan estadu tenke garante katak iha alokasaun Orsamentu Jeral Estadu ne’ebe razoavel, hodi dezenvolve setór importante sira, inklui setór agrikultura tanba agrikultura nu’udar setór nao petrolíferu, katak setór ida ne’ebe bele poupa osan mina nian
“Sei ita nia osan mak uza hanesan agora dadaun ne’e, tinan 10 ou 20 ita bele osan laiha entaun setor ida ne’e ita tenke produtivu, tenke sai duni atensaun ba estadu. Buat ne’ebé mak hau bele halo mak diskuti ho guverno liliu iha prossesu elaborasaun planu guvernu ninian, atu aprezenta ba Parlamentu atu nune’e planu konkretu ba dezemvolvimentu agrikultora nian, oinsa mak hadia ita nia irigasaun,barajen e tamba mudansa klimatika, oinsa mak governu bele halo aktividade atu utiliza udan, atu udan been mai lalika sulin arbiru deit, pelumenus iha tanki, atu uza fali produsaun agrikola nian”, dehan Lamukan hateten iha aldeia Ponu, 07/03.
Lamukan hatutan universidade nasional ninia fakuldade ne’e tenke iha departamentu, relasiona ho situasaun real ne’ebé Timor hasoru ,oinsa ita bele dezenvolve kafe iha Ermera, no oinsa atu dezenvolve pekuaria iha Lospalos, no oinsa mak dezenvolve iha Costa Sul.
Nia hateten dezenvolvimentu universidade sira liliu fakuldade agrikultura ne’e importante, buat boot no ki’ik ita sei bolu konsultores husi rai liur, maibe ita nia universidade tinan 20 ona, tenke produs enjeneiru Agrikultura, agrikola, agro-ekonomai no floresta
.
