Home Feature Parabens Timor! Parabens ba Solidariedade!

Parabens Timor! Parabens ba Solidariedade!

973
0
Asaun Solidariedade Membru Organizasaun Artes Marsiais (Foto: SEJD)

By Gil Lamukan

Semana ida ona hafoin Siklone Seroja nebe ataka ita hosi lidun hotu-hotu rai Timor nian. Ha’u temi Timor, tanba ha’u refere ba ilha Timor tomak, hosi ilheu Jaco, parte Timor-Leste nian to’o ilha Roti, parte Timor-Ocidental (Indonesia) nian. Ba ita iha Timor-Leste, kalamidade nebe ataka Kapital Dili iha kalan Vijília Paskal to’o Domingo Ressureição ne’e, nudar kalamidade boot liu hafoin tinan 48. Istoria resente rejista katak sidade Dili hasoru mos kalamidade hanesan iha tinan 1973, bainhira Timor-Leste sei nudar provinsia ultramar Portugal nian.  Molok to’o Kapital Dili, iha munisipiu balun iha parte tasi-mane sofre tiha ona Siklone ne’e nia si’ak.

Domingo dader, 4 abril, Kapital Dili haksumik-an hanesan tiha ho laloran tasi hosi Atauro. Mota Komoro, Maloa, Bekussi no Bekora iha oras balun nia laran nakfilak sai ita nia solin (inimigu). Mota sira nebe baibain nia hitin haraik moris ba ita balun, teki-teki sira nia si’ak hadau-malu ho rai-lakan nia tarutu. Sira nia sulin, lian hadau-malu halakon tiha Dili nia emar nia lian haklalak. Sira sobu muru, sukit rai inur, fokit ai-hun, sasurut hotu ba tasi. Sira nia ninin liki bandeira mate nian. Sira nia bee la lori perdaun, mos la hikis matak-malirin, hanesan ita nia beiala sira baibain halo iha ita nia uma-lulik sira, ka fatin hamulak nian.

Iha oras balun nia laran, ita hotu lian-laek. Nonook no folin-laek. Iha momentu balun, ita sente ita nia an molik. Ita nia loko-an teki-teki monu ba rai, nabeen suli tuir mota. Ita sai folin-laek tiha iha mota sira ne’e nia oin. Mota nebe lorloron ita hakur ba-mai husi laran, ka hakat liu hosi ponte-leten. La’os de’it ita nia fuan, ita nia esperansa mos lakon, nakfilak sai anin nebe hu nakdulas, hafanun laloran tasi atu loke ibun tolan sa ida mak mota sira ne’e lalin.

Ita kbit-laek buka liafuan atu homan ita nia hamulak, tan fatin atu tuku-tuur naksobu rata-bak ho bee nebe suli hosi kdadalak foho nian. Ita nia uma nebe baibain satan ita hosi loron nia manas no kalan nia nakukun, nakfilak sai infernu. Sai limbu ba ita barak. Ita nia barani asswa’in nian haksumik-an iha ita nia nonook rohan-laek. Sai ai-sanak atu tara kohe ho surik funu-nian mos ita la soi. Ita nia titi, ita nia baba lakon nia lian. Ita haluha tiha ita nia babadok ho dadili nia tara-fatin. Ita moe atu hateke ahu-ruin nakrakat iha tasi-ibun.

Kalamidade 4 abril, halo dadolin na’in sira ta’uk tiha atu sani knananuk ‘Kdadalak Suli-mutu’ nebe poeta boot Borja da Costa hakerek hela. Tan ita hotu sai sasin oin sa “we-inan taa-malu” iha sidade Dili nia laran. Hakerek-na’in sira haluha atu hakerek, tan la hatene tiha oinsa atu hakerek. Ha’u mos baruk tiha atu resita Borja nia poema Um Minuto de Silêncio. Tan ita nia silêncio la’os iha minutu ida nia laran, maibe oras, loron, no dalaruma tinan. Tan Montes e vales la iha ita nia oin, regatos e ribeiros la iha ona ita nia sorin, Canas e bambus la hamaluk ita ona. Palmeiras e capim hetan ona fim seluk. La’os ona na verdura sem fim, maibe no alto mar sem ter fundo. Pássaros do ar lakon nia knuuk iha árvores e ai-rus nia sanak-leten. La iha tan praias que sobram. Sidade Dili sai duni terras de ninguém. Sidade Dili sai sidade Orphalese, Khalil Gibran nia sidade imajinaria iha nia livro O Profeta/Sang Nabi. Ita barak alivia ita nia-an hodi hein salvasaun ka akomodasaun, hanesan profeta Al-Mustafa hein saserdote-feto Almitra atu simu no akomoda nia hodi ko’alia konaba domin.

Dadolin na’in buka imajina konaba fatin moris seluk, rai seluk ka ilha fuik seluk nebe bele soi ita. Hanoin konaba José Saramago nia Ilha Desconhecida. Ita sai falur liras-tohar, dala ida tan ho espresaun Gibran nian Asas Partidas/Sayap-sayap patah.

Sira nebe kaer ukun no bandu, soe sira nia tali-futu, subar sira nia ai-baku. Neon atu ukun namlele tiha, beran atu bandu namlaik tiha. Lian naksalak-malu nebe meik no kroat, tuuk liu tiha buat hotu-hotu nia tuuk. Ulun sira atu hanoin, nakfilak sai fatin atu tutur liman sira nebe kaan atu tuku. Matenek-na’in sira beik malorek, beik sira tebe-retek, kari matenek namkari.

Loron hitu liu ona. Loron loke matan, kalan haksumik-an. Maski neon-namlaik, ita hahuu sura. Sura loron, sura kalan. Loron hitu liu tiha, kalan hitu ba tiha. Foho iha nia fatin, tasi toba hakmatek iha nia fatin. Mota sira haklolo-an iha sira ida-idak nia kadunan. Kalohan metan ta’uk-nian buka fatin subar. Roman asswa’in nian hader hosi nia mehi. Manu kokorek hikas, asu-mos hatenu fali.

Sidade Dili nia emar, ida-idak ka iha klibur, neneik maibe bebeik, hahuu hateke-malu. Hahuu husu-malu. Balun hanoin hetan nia kbaz, seluk fihir hetan fali nia ain-tuban. Barak hatun liman hosi ulun. Ulun sira hahu hanoin katak iha kbaz atu hulan, kbaz kebit ulun atu tutur, ain-tuban mos rekere atu tuba.

Husi lidun ida-idak, lian halerik no haklalak halai hatetek. Sasin-malu beran, sadik laloran sira mota nian, tane-malu kbaz hasoru sasidi sira nebe anin-aat no udan-moruk husik hela iha uma tatiis sira. Feto-ran no mane-klosan, katuas no ferik, labarik sira, dada-iis hamutuk hakilar dadolin beiala nian “Hori Otas Hori Wa’in, Oan Timor Asswa’in.”

Asswa’in la’os tanba manan-funu, maibe asswa’in tanba ita lakohi foti liman liki bandeira mutin. Lakohi rende no labele rende!

Parabens Timor!

Parabens ba ita nia aten-barani. Barani atu labele ta’uk ba sa ida de’it mak hata’uk ita. Barani atu labele ta’uk lakon, labele tauk terus no labele ta’uk mate. Barani atu buka tuir sira nebe laloran lori. Barani atu hahii sira nudar asswa’in. Asswa’in ba moris, ita hotu nia moris. Sira ita hotu nia asswa’in. Karik balun ita buka la hetan, rai no tasi lulik Timor sei sai sira nia rate. Anin lorosa’e no loromonu sei la halakon sira naran iha ita nia memoria. Laloran tasi-mane no tasi-feto sei la halakon sira nia ain-fatin hosi ita nia historia.

Parabens Timor-Leste!

Parabens ba Povo Maubere nia oan sira nebe hatene lolo-liman ba malu. Parabens ba ema-kiik sira nebe matenek tane-kbaz ba malu iha susar laran.  Iha Kapital Dili, munisipiu, iha tasi-balu. Distansia sai tiha ona grasa (rahun-di’ak), besik sai nudar sorte. Rahun-di’ak atu hakman mutun sira nia terus, sorte atu hanaruk ita hotu nia moris. Moris nudar Povo ida, moris nudar nasaun ida.

Parabens ba solidariedade emar nian. Parabens maluk sira hosi Australia, Amerika, Portugal, Inglaterra, Irlandia no emar rai seluk tan, nebe lolo-liman atu tulun emar Timor-Leste iha situasaun difisil ida ne’e. Parabens ba sosiedade sivil, ba igreja no konfisaun relijioza sira seluk.

Ita nia hahalok karidade, ita nia sentidu solidariedade sai nudar lian hakilar hasoru mota sira nia sulin nebe sasurut ita nia uma, hasoru udan nia fakar-rahun ita nia tatiis, hasoru anin nebe fokit ita nia esperansa. Katak, sira nia lian bele halakon ita nian ka ita nia beiala sira nia lian hakilar, maibe sei nunka halo-nonook ita nia neon. Ita nia karidade sai a voz do nosso silêncio, ita nia nonook nia lian.

Ita nia solidariedade ba mutun sira sai nudar lian-hataan ba ita nia domin nia lian-bolu. Ita nia domin bolu ita hotu atu hahuu buka tuir ita nia fuan sira nebe mota lori tiha ba tasi. Domin bolu ita atu hili fali ita nia esperansa sira nebe mout iha praias que sobram, iha ahu-ruin nia leet.

Karik iha loron hitu liuba ita lakon tiha ita sorin-baluk ka pedasuk ruma hosi ita nia an nudar ema, nudar humanu, ohin ita hamutuk buka tuir fali pedasuk sira. Tan buka buat ida ka buat ruma atu hakonu ita nia an nudar ema, ne’e mak esensia hosi domin. Hanesan filozofu grego Plato dehan o amor é a busca daquilo que falta para ser completo como ser humano. O amor é resultado da derrota de certas debilidades, certos defeitos, e a conquista de territórios novos: de capacidade de fraternidade, de compreensão de profundidade. A melhor coisa que você pode fazer pelas pessoas que ama é crescer como ser humano.  Liafuan sira ne’e ha’u hetan hosi ha’u nia vadiagem virtual iha media social. La’os hetan iha “banku kuliah” filozofia nian.

Loron hitu liutiha, hamutuk ita konkista ona ‘territorio foun’: ita nia kbit fraternidade nian, ita nia beran atu komprende ita nia relasaun ho humildade, ho simplisidade. Ita nia relasaun ba malu nudar ema, no ita ema nia relasaun ho natureza ka universu. Mos ita nia relasaun ho forsa Divina. Ita hahu kompreende katak perante natureza, ita la’os super homem ka super human.

Afinal, iha natureza nia oin, liliu iha situasaun kalamidade, ita hanesan mos ho ai-hun nebe mota fokit, ita hanesan mos ho balada fuik sira nebe lakon knuuk iha ai-sanak leten, ita hanesan mos rai nebe halai, hanesan mos fatuk sira nebe nakduir hosi foho tutun.

Ita mos hahuu entende katak, ita nia frakeza no ita nia mukit la’os defeitu/buat aat, maibe rekursu osan-mean nebe nesesariu duni iha ita nia moris hodi reafirma ita nia-an iha natureza nia oin, iha Maromak nia futar oin, ita la’os anjo ka arkanju, maibe ema humanu. Ita ‘homem’, la’os ‘super homem!’ Liafuan ‘homem’ la refere ba seksu, refere ba kategoria kriasaun nebe iha lian inglez, ita dehan ‘human’ hodi difere ita hosi kriatura seluk iha mundu rai-klaran. Iha ne’e Saramago ko’alia los: ita tenki sai hosi ita nia ilha, atu bele hatene ita nia ilha ne’e nia dimensaun, boot ka kiik, naruk, ka badak. Ka kabuar. Dalaruma, poeta portugez, Fernando Pessoa mos loos: …É preciso ser de vez enquando infeliz, para se poder ser natural… (dalaruma ita tenki sente susar (infeliz), atu ita bele sai natural (baibain).

Parabens ba ita hotu. Parabens ba ita nia hahalok karidade no sentidu solidariedade nebe hahuu nakfilak-an nudar contra-corrente ka arus balik hasoru corrente de sofrimento nebe kalamidade ne’e lori mai ita iha loron 4 abril liu ba. Parabens ema kiik no mukit sira. Bee hotu-hotu nebe suli tun iha mota sira iha loron kalamidade para iha fatin ida: Tasi. Tan ne’e, ita nia karidade no solidariedade tenki iha kbit atu suli sa’e. Ba leten, ba fatin nebe ita nia domin hakarak lori ita ba: UNIDADE. Hahalok sira nebe ita halo tenki sai prosesu rekuperasaun ida. La’os rekuperasaun ekonomika nebe kle’ur ona sai polemika politika, maibe rekuperasaun ba ita ida-idak nia an nudar unidade (unit) ida hosi unidade barak: unidade iha multiplisidade. Ita nia karidade tenki fo liras ba seluk atu semo. Semo hamutuk ba fatin nebe ita nia domin koletivu hatudu.

Parabens la ba politik-na’in sira. Tan hanesan Papa Francisco dehan “halo politik ne’e hahalok karidade ida, liliu ba politik-na’in sira nebe kristaun.” Se karidade hanesan duni virtude humana ida nudar padre no katekista sira hanorin, la iha nesesidade atu ejiji rekompensa. Mos, parabens la ba sira nebe kaer ukun-bandu. Tan karidade nebe ukun-na’in no politik-na’in sira halo, karidade nebe nakloke ba interpretasaun oinoin. Interpretasaun politik, ekonomika, sosial no kultural.

Historia humanidade nian hakerek, katak dalabarak, razaun baze ba ukun-na’in no politik-na’in sira atu halo karidade ka solidariedade, la’os tanba sira hadomi ema, maibe tanba hakarak ukun. Tanba ne’e, sira ba templu, igreja ka meskita, la’os atu buka domin ka buka Maromak, maibe buka-oin. Sira nia acto de caridade no sentido de solidariedade la’os atu manan nia emar ka nia reinu nia fuan, maibe atu manan votos iha eleisaun. Sira nia karidade la’os atu fo-han ema nebe presiza hahan, maibe fo-han sira nia egoismu, perpetua sira nia vaidade pessoal. Barak nune’e, maski la’os hotu-hotu nune’e.

Ba ukun-na’in no politik-na’in Timor-Leste nian, ha’u la iha kbiit moral atu hanorin ka akonselha sira. La’os tanba ha’u la iha direito ka dever siviku atu halo, maibe tanba historia no bagagem politik nebe belit no da’et iha politik-na’in sira ne’e todan liu ba ha’u atu hasee sira. Ba sira, ha’u husik hela de’it pensador, estadista romano Marco Túlio Cícero nia konselhu. Konsellu ne’e ha’u sani iha lian portugez, lian nebe politik-na’in jerasaun 75 sira uza hodi hakerek sira nia primeira carta de amor ka primeira poesia de solidão. Lian nebe halo sira sente orgulhozu liu iha jerasaun foun sira nia oin. Cícero dehan nune’e: Se amas e te tornas mais altruista, mais nobre, mais bondoso, mais voltados sobre a dor da humanidade, realmente amas. (Mas) Se amas e te tornas mais egoista, mais isolado, mais voltado apenas para os teus interesses, não amas, e nem amas a ninguém que assim o faça.

Atu taka, ha’u rasik haluha tiha sa ida mak atu hakerek. Ha’u mos la hatene tiha sa ida mak ha’u hakerek ona. Ba buat hotu, nia bele sala. Ba ema balun ka ba ema hotu, nia bele la loos. Maibe nudar “lian hakilar hosi fuan”, la iha sasukat politik, ka paradigm sientifika atu tetu ka dasi. Nia la sala, no tenki loos duni. Nia loos ba nia-an rasik, la’os ba buat seluk. Hanesan ho karidade no solidariedade. La’os sinu iha torre-tutun, la’os gong ka baba iha uma-lulik. Lian ba ema seluk, tarutu ba buat seluk.

Ba imi hotu, ema kiik no mukit sira, ha’u hamutuk ho Mary Elizabeth Haskel, sei husu empresta Maromak nia fuan atu hadomi imi.  Haskel, professora norte-amerikana nebe tulun finansialmente Khalil Gibran no hadomi ho fuan-laran, hosi bainhira Gibran sei kiik to’o mate, maski nunka hasoru. Pura caridade por um amor eterno (karidade loloos ba domin rohan-laek:

O meu amor com você não cabia no meu coração, então tive que esprestado o coração de Deus p’ra amar você através dele (Ha’u fuan kiik demais atu tau ha’u nia domin ba ó, tan ne’e ha’u tenki husu empresta Maromak Nia fuan atu bele hadomi ó liuhosi nia).

Atu enkoraja ita nia haka’as iha moris, liliu iha ita nia servisu sira atu tulun, maluk sira nebe presiza, iha biban ita dada-iis ka deskansa, ita bele halo reflesaun bazeia ba matenek India nian Sri Ram tuir mai ne’e:

Você deve perder todos os dias o seu coração e passar todos os dias em busca do seu coração. E ao fazê-lo descobrirá que o teu coração é o coração de todas as coisas. (Ó bele lakon ó nia fuan loro-loron no lakon tempu loro-loron atu buka tuir ó nia fuan. Ho halo ida ne’e ó sei deskobre katak ó nia fuan iha buat hotu-hotu nia fuan).

A LUTA CONTINUA EM TODAS AS FRENTES!

Mota Komoro nia ninin, 11 abril 2021

Print Friendly, PDF & Email

LEAVE A REPLY

Please enter your comment!
Please enter your name here