Reportazen Zevonia Vieira
Ministeriu Saude (MS) ohin loron 11 Abril deteta tan kazu konfirmadu foun COVID-19 hamutuk 38. Liu hosi komunikadu imprensa hosi Sala de Situasaun Centro Integradu Jestaun Krize (CIJK) ne’ebe Neon Metin asesu katak evolusaun surtu COVID-19 iha municipio Dili iha loron 10 Abril deteta kazu foun 27, nune’e, kazu detetadu ka pozitivu iha munisipiu Dili husi loron 7 Marsu 2021, hahu deteta kazu iha cluster BTN II,Terra Santa no Madohi, to’o ohin, 11 loron Abril 2021, hamutuk hotu 823.
Ho baze ba informasaun ne’ebé disponível, ekipa konjunta saúde halo fali revizaun ba foku propagasaun/cluster iha Municipiu Dili. Suku sai nu’udar area geográfika ne’ebé uza hanesan baze atu haree ligasaun entre kazu, no ligasaun ho expozisaun ba fonte infesaun.
Iha Baucau deteta kazu foun nain 1, kazu ida ne’e halo viajen husi Dili, hamutuk hotu iha Baucau iha 36 kazus detetadus.
Iha Bobonaro deteta kazu foun nain 1, kazu ida ne’e halo viajen hosi Dili. Iha Ainaro deteta kazu foun nain 2, kazu ne’e mos halo viajen hosi Dili. Iha Ermera deteta kazu pozitivu foun nain 7, sira mos halo viajen hosi Dili
Dadus jeral ba loron ohin 11 Abril, kazu detetadu foun total 38 (27 iha Dili, 11 iha municipio sira seluk), kazu rekuperadu nain 33, total kazu ativu hamutuk 536. Hosi total kazu detetadu foun ohin mane 15, feto 23, husi total kazu detetadu foun ohin 100% asintomátiku.
Husi horiseik mai ohin ema hamutuk 1120 mak halo testes PCR, ho detallus hanesan tuir mai vijilánsia sentinela nain 50, rastreiu ba kontaktu (contact tracing) nain 53, Rastreiu Aleatoriu (Random Screening): 216. Viajen sai husi serka sanitária Munisipiu Dili nain 531, Viajen internasionál nain 225.
