Reportajen David da Costa Gusmao
Governu liuhosi reuniaun Konsellu-Ministru ohin aprova ona projetu Dekretu-Lei ne’ebé aprezenta husi Primeiru-Ministru, Taur Matan Ruak, kona-ba estabelese Programa apoiu ba plantasaun Ai Parapa sira iha tasi ninin.
Prota Voz Governu, Ministru Prezidénsia Konsellu Ministru, Fidelis Manuel Leite Magalhães dehan, objetivu sira husi Dekretu-Lei ida-ne’e maka estimula kriasaun viveiru “ai-parapa”.
“Haluan área plantasaun ba ai parapa, Kombate erozaun iha tasi ninin, Hadi’a pozisaun Timor-Leste iha merkadu internasionál karbonu nia, Kontribui ba afirmasaun Timor-Leste nian nu’udár destinu turístiku”, hateten Ministru Prezidénsia Konsellu Ministru, Fidelis Manuel Leite Magalhães iha Palásiu Governu, Tersa 17/05.
Nune’e apoiu ne’e sei konkretiza liuhusi atribuisaun subvensaun públika ida ho valór hamutuk US$ 0,50 (sentavu limanulu) ba ao parapa ida-idak ne’ebé kria viveiru ka kuda.
