Reportajen Joselina dos Santos
Primeiru-Ministru, Taur Matan Ruak hasoru malu ho Embaixadór Singapura iha Timor-Leste, hodi ko’alia kona-ba kontribuisaun pasadu sira, ne’ebe Singapura kontribui ba Timor-Leste nia independénsia, no mós kona-ba apoiu governu Singapura nian hodi prepara Timor-Leste tama ba ASEAN tuir kriteria no timeline ba Timor-Leste ninia adezaun ba ASEAN.
Hafoin enkontru, Embaixadór Singapura Iha Timor-Leste Robin Hu Yee Cheng hateten Primeiru Ministru ho nia halo diskusaun ne’ebe di’ak, ida ne’e hanesan vizita dahuluk nian mai Timor Leste, no hanesan embaixadór foun husi Singapura mai Timor-Leste. Horisehik nia mós iha enkontru ho lider emprezáriu sira, membru governu no mós membru husi NGO no komunidade international sira, hetan mós oportunidade hasoru sidadaun Singapura oan ne’ebe hela iha Timor Leste .
“Iha hau nia enkontru ohin ho primeiru ministru ne’e, ami diskute kona-ba kontribuisaun pasadu sira ne’ebe singapura kontribui ba iha Timor-Leste nia independensia, dezde Timor-Leste restaura nia independensia Singapura haruka ona ninia militar no Polísia liu rihun resin mai Timor-Leste hodi suporta servisu peace keeping fors husi UN”, dehan, Embaixadór Singapura Robin Hu Yee Cheng, hafoin enkontru ho PM Taur iha Palasiu Governu, kinta 02/02.
Nune’e mos iha tinan 20 nia laran liu ba governu Singapura mós ajuda Timor-Leste iha área treinamentu ba funsionariu públiku. Singapura mós ajuda kria programa hodi suporta funsionáriu governu Timor-Leste nian liliu prepara servisu sira ba Timor-Leste nia adezaun ba ASEAN nian.
“Ita Hotu hatene katak Road Map dezenvolve ona husi ASEAN hodi dezeñu kriteria no timeline ba Timor-Leste ninia adezaun ba ASEAN. No Ami haree ba oin atu ajuda Timor-Leste hodi hetan esperensia no espertu nesesariu sira hodi kontribui ba Timor-Leste bele hola parte kompletamente no tama iha ASEAN”, nia esplika.
Nia hatutan, koalia Kona-ba Timor-Leste atu tama ba membru ASEAN ne’e, tenke to’o ona nivel konsensu hamutuk ne’ebe anunsia ona Cambodia tinan kotuk, ne’e duni, espera katak, Timor-Leste nia esforsu sei prenxe kritériu ne’ebe estabelese ona iha road Map, nune’e ba oin nia hakarak haree Timor-Leste ninia adezaun nu’udar membru ASEAN.
