Reportajen David da Costa
Governu, apela ba komunidade ne’ebe afetadu husi projetu alargamentu Aeroportu Internasionál Presidente Nicolau Lobato, liuliu ba komunidade uma-kain 50 itál ne’ebe maka sei hela iha ne’eba, atu kontinua koopera ho Governu hodi fasilita implementasaun prosedimentu legál no tuir desizaun ne’ebe justo no tuir lei.
Ministru Justisa (MJ) Sérgio de Jesus Fernandes da Costa Hornai, hateten, Kona-ba komunidade uma-kain 50 itál ne’ebe afetadu husi projetu alargamentu aeroportu, komunidade atu kontinua koopera ho Governu atu fasilita implementasaun prosedimentu legál no toma desizaun ne’ebe justo no tuir lei.
“Konsertesa ba maun alin sira ne’ebe porvolta 50 itál uma kain ne’ebe maka afetadu, hakarak ka lakoi ita nafatin atu bele kopera, para atu nune’e ita mos bele halo dezisaun ida apropriadu konforme ita nia transmitu legais sira regulariza, para atu nune’e ema hotu-hotu tenke komprimentu,” dehan Ministru Justisa (MJ) Sérgio Hornai ba jornalista sira iha Palásiu Prezidensial Bairo-Pite, Segunda 6/07.
Maski nune’e, Ministru Justisa Sérgio Hornai reafirma projetu alargamentu Aeroportu Internasionál Presidente Nicolau Lobato sei kontinua, tanba sai hanesan nesesidade estratéjika ba dezenvolvimentu nasaun.
“Maibé ha’u hakarak hateten katak hakarak ho lakoi, alargamentu ba iha airoportu tenke la’o. Tanba ita ninia ezijensia no prekupasaun boot ida maka presiza iha airoportu ida ne’ebe naton para atu nune’e ho ita ninia adezaun ba iha ASEAN ho ita ninia movimentu loron ba loron,”nia subliña.
Tanba Timor-Leste presiza aeroportu ida ne’ebe boot, modernu no seguru atu responde ba kresimentu movimentu aviasaun no prepara nasaun ba adezaun plena iha ASEAN, inklui objetivu atu sai hanesan membru tomak iha tinan 2029.
“Entaun presiza alargamentu ba iha airoportu atu nune’e fó espasu ida naton no seguru liu, atu nune’e bele faselita ita ninia atividade movimentu aviaun sira tama iha ita nia teritoriu nasional. Aumesmu tempu ita nia espetativa boot ida ba iha planu 2029 hanesan uma nain ba iha ASEAN,” nia afirma.
Nune’e mos, nia hateten kona-ba estatutu rai iha área Aeroportu Internasionál Presidente Nicolau Lobato ne’ebe komunidade balun hela ba, tenke tuir prosesu legál no desizaun final husi Tribunal.
Tanba antes Tribunal fó desizaun, Diresaun Jerál Terras, Propriedade no Servisu Kadastrais realiza uluk levantamentu, rejistu, rekoinesimentu no simu reklamasaun husi parte sira ne’ebe iha interese ba rai refere. Karik iha kontestasaun, kazu sei haruka ba Komisaun Terras no Propriedade atu halo verifikasaun no analiza impugnasaun sira.
Se parte ida seidauk satisfás ho desizaun Komisaun Terras no Propriedade, lei fó dalan atu submete impugnasaun judisiál ba Tribunal. Tanba ne’e, Ministru dehan desizaun final kona-ba propriedade rai tenke mai husi Tribunal.
“Se Tribunal deside katak rai ne’e tama ba domíniu privadu Estadu, entaun instituisaun no ita hotu-hotu tenke respeita no submete ba desizaun ne’e. Laiha instituisaun seluk ne’ebe bele muda ka hasai desizaun ida ne’ebe kontra desizaun Tribunal,” dehan Sérgio.
Nia mos refere ba Artigu 119 Konstituisaun Republika Demokratika Timor-Leste ne’ebe hatuur katak desizaun Tribunal iha forsa legál aas liu no tenke prevalese ba desizaun hotu-hotu iha Estadu.
Relasiona ho grupu traballu ne’ebe Ministériu Justisa estabelese liu husi Diresaun Jerál Terras no Propriedade, Ministru hateten katak objetivu prinsipal mak atu buka solusaun ne’ebe garante interese públiku no bem-estar komunidade.
