Reportazen Bernarda da Costa
Ministerio Saude (MS) ho Organizasaun Mundial Saude (OMS) halo avaliasaun ba programa pakote esensial husi moras la hadaet ba parte saude sira husi Dili, Ermera no Liquisa ne’ebe komesa ona iha tinan 2017.
Diretora Nasional Kontrolu de Doensas, Josefina Clarinha Joao hateten enkontru avaliasaun ida ho parte saude sira husi Dili,Ermera no Liquisa hodi evalua programa hirak ne’ebe mak implementa ona.
“Ohin loron ami halibur maluk sira ne’ebe implementa programa ne’e, hodi haré sira nia atinjementu. Karik iha problema ruma no solusaun saida mak sira presija no maneira saida deit mak presija ita aumenta, para bele hadia liutan atinjimentu programa nian too ohin loron”, dehan Diretora Nasional Kontrolu Doensan iha JL Vila Aimutin ,01/10.
Diretora ne’e hatutan pontus de avaliasaun mak hare presentanen ba moras la hadaet husi munisipio tolu.
“Oinsa ho lalaok ba sira nia tratamentu, nune mos ba atividade prevensaun ba moras la hadaet sira, atu hatene lalaok husi tratamentu ba hirak ne’ebe simu ona tratamentu no nafatin ho atividade balun ne’ebe mak bele ajuda liu tan, para bele hetan detesaun ba iha kazu moras la hadaet nia barak liu iha komunidade “, tenik Diretora Nasional Kontrolude Doensas.
