Reportajen Agustinha Amaral
Festeza loron boot natal no tinan foun, Ministériu Komersiu no Industria (MKI) iha planu sei loke bazar baratu iha tempu badak.
Ministru Komersiu no Industria (MKI), Filipus Nino Perreira “Prego”, afirma katak, iha ona planu iha tempu badak sei loke bazar baratu hodi festeza ba loron natal ho Tinan foun no sei koopera ho emprezáriu nasional sira.
“Ita iha bazar baratu, agora ita koopera ho asosiasaun emprezáriu nasional nian ne’ebé hato’o ona mai ami atu organiza bazar baratu ne’e,” afirma MKI Filipus Nino Pereira ba jornalista sira iha Salaun MKI Bebora tersa, 17/12.
Governante ne’e dehan, bazar baratu parese sei loke iha loron 20 Dezembru ne’e, tanba ne’e sei organiza hela, maibé kona-ba fatin seidauk desidi.
“Sasan sira ne’ebé mak sei faan iha bazar baratu ne’e mak hanesan nesesidade bázika, presu sasán la’o normal, maibé sei fa’an baratu oi-toan, atu nune’e komunidade sira bele mai sosa”, dehan nia.
Nia dehan, liu husi bazar baratu konserteza fo benifisiu ba komunidade la’os hotu-hotu, maibé balun ne’ebé kbiit la to’o bele aproveita bazar baratu ne’e hodi sosa sasan.
Entretantu bazar baratu ne’e sei akontese iha tempu badak ne’ebé mak sei organiza husi emprezáriu nasionál sira ne’ebé mak koopera ona ho MKI.
