Reportajen Silvino Freitas
Ministeriu Asuntu Kombatente Libertasaun Nasionál (MAKLN) hahu halo ona pagamentu ba veteranu no martir 15,697 neebe rejista iha tinan 2009 nunee pagamentu nee laos halo deit iha Banco do Nosso Futuro (BNF) maibe halo mos iha banku komersial seluk neebe veteranu sira rejista ona konta bankaria, tanba nee husu veteranu sira kontinua mentein disiplina no pasensia atu bele hetan billete resivu hodi foti osan iha banku neebe rejista konta bankaria.
MAKLN Gil da Costa ‘Oan Soru’ dehan, pagamentu ba veteranu sira nee laos ba loron ida ohin deit maibe pagamentu nee hahu oin no sei halo too hotu ba ema 15,697 ba sira neebe dokumentu loos ona sei halo hotu pagamentu too hotu, nunee iha fulan dezembru nia laran sira sei halo esforsu masimu tanba husi diresaun baze dadus preparadu atu atende ema 700 iha loron ida nia laran.
“atu fo hatene ba kombatente veteranu familia martir sira neebe iha direitu ba pensaun sobrevivensia, especial reforma, subsistensia hotu hotu atu ita barak ona mantein disiplina nafatin labele koalia la rona malu tanba asuntu veteranu nia situasaun mak ida nee mais prinsipiu nunee ministeriu ho CCLN disponibel atu fasilita too hotu” dehan MAKLN Gil da Costa ‘Oan Soru’ iha CCLN Comoro, (15/12).
Nia dehan tan, mekanizmu atendimentu nee sei hadia tanba prosesu sira hahu sempre kria konfuzaun maibe ministeriu hamutuk ho diresaun sira hotu halo oinsa hodi fo solusaun ba problema nee, nunee husu mos ba veteranu sira nia kontribuisaun atu mantein disiplina ba prosesu sira nee, tanba veteranu sira maka hahu prosesu disiplina iha funu ukun rasik an nian maibe tanba sira iha emosaun uituan.
“veteranu sira neebe ninia dadus seidauk aprovadu ka difinitivu iha dadus neebe taka sai iha publiku nee laos mai resolve iha nee maibe resolve tuir lei, ida ohin ministeriu atu halo pagamentu nee sira neebe aprovadu dokumentu kompleta ona ka lista fo sai aprovadu” dehan MAKLN Gil.
Nia dehan, pagamentu ba veteranu sira nee sei la halo iha CCLN Comoro maibe atu foti dokumentu konaba ba pagamentu iha nee mos eziste banku foun nee mos halo pagamentu maibe ema 15,000 fahe ba banku komersial sira iha timor laran tomak, nunee hamosu egrafamentu iha area komoro nian tanba hahu primeiru pagamentu no sira hotu mai iha nee hodi hetan karimbu iha baze de dadus nunee ba iha banku bele ba iha banku kondiz.
“maibé mai oin fali pagamentu nee lao normal dadus hotu lao loos ona ida idak sei lao ba banku iha munisipiu neebe tau konta bankaria ba nia ba deit iha neeba uza ATM foti rasik, nunee banku iha komersial iha timor nee BNCTL, BNU, BRI, Mandiri agora mosu tan BNF neebe sira liu rihun 15 ho sira antes nee iha ona pensaun nanis nee namkari iha banku hotu hotu”esplika Oan Soru.
Entretantu veteranu Lorenco da Costa husi munisipiu Lautem dehan, nia la satifaz husi atendimentu husi MAKLM nian atu fahe billete ba veteranu rejistradu 2009 neebe naran taka sai nunee ohin sira hahu atu simu pagamentu maibe nia husu atu atendimentu nee tenke too iha munisipiu atu sira bele simu ho diak.
“hau mai husi uma tuku neen maibe too mai iha nee maibe ema sena malu barak liu” dehan Veteranu Lorenco da Costa husi munisipiu Lautem iha CCLM Comoro, (15/12).
Entretantu, totál benefisiáriu sira ne’ebé atu hetan pagamentu iha faze da-huluk fulan-Dezembru tinan ne’e nian iha rihun sanulu-resin lima, atus-neen, sia-nulu resin-hitu (15.697), husi númeru ne’e, kada loron MAKLN liuhosi Diresaun Nasionál bá Pensaun no Subvensaun (DNPS) sei atende de’it ema na’in-700.
Nune’e, husu públiku tomak atu haree didi’ak oráriu iha kraik ne’e;
1. Aileu ema hamutuk 612, atende iha loron 15/12/2025.
2. Ainaro ema hamutuk 1.000, atende iha loron 16/12/2025.
3. Baucau ema hamutuk 851, atende iha loron 18/12/2025.
4. Bobonaro ema hamutuk 1.145, atende iha loron 19/12/2025.
5. Covalima ema hamutuk 1.121, atende iha loron 23/12/2025.
6. Dili ema hamutuk 3.906, atende iha loron 29/12/2025.
7. Ermera ema hamutuk 935, atende iha loron 9/1/2026.
8. Lautem ema hamutuk 2.940, atende iha loron 12/1/2026.
9. Liquiça ema hamutuk 1.281, atende iha loron 19/1/2026.
10. Manatuto ema hamutuk 682, atende iha loron 21/1/2026.
11. Manufahi ema hamutuk 486, atende iha loron 22/1/2026.
12. Oecusse ema hamutuk 50, atende iha loron 23/01/2026.
13. Viqueque ema hamutuk 634, atende iha loron 26/01/2026.
14. Fora hosi Timor ema hamutuk 54.
