Home Analisa Planu Realojamentu Ba Komunidade Afetadu Inundasaun Governu Presiza Halo Tuir Lei...

Planu Realojamentu Ba Komunidade Afetadu Inundasaun Governu Presiza Halo Tuir Lei Espropriasaun

1246
0
Jemicarte Moniz dos Reis, Membru Rede ba Rai. [Foto: Doc. privadu | 23.07.2021]

Hakerek nain membru RbR, Jemicarte Moniz dos Reis

Inundasaun ne’ebé akontese iha Timor-Leste iha loron 4 Abril 2021 rezulta ema mate aleinde mós uma no infrastrutura barak mak estraga. tanba kauza husi natural no sosial, kauza husi natural mak hanesan intensidade  udan-been ne’ebé makas iha oras ida nia laran ka liu no kauza husi sosial mak hanesan sentimentu industrial ne’ebé konsiste barak liu husi ho pabimentasaun ne’ebé hamenus kualidade infiltrasaun udan-been bá rai okos halo velosidade bee aumenta hodi halo drainajen sira la sufisinte atu evakua udan been ba iha tasi nune’e ikus mai hodi hamosu inundasaun. Nune’e mós impaktu husi sosial umanu nian hanesan komunidade harii uma blokeia bee-dalan no mota nia sulin, soe foer arbiru.

Inundasaun ne’ebé mak akonetse hetan estragus uma no infrastrutura, tanba dezastre ne’e governu Timor-Leste agora hasoru hela dezafiu barak oinsa atu bele hadia, harii fali uma no infrastrtutura hirak ne’e no mós halo realojamentu bá komuniadade afetadu sira. Tanba komunidade hetan impaku ne’ebé la hanesan, governu ninia politika atu responde ba krize mós tenke adapta ba kontextu oin hirak ne’e. Uma kain balun bele fila ba sira nia hela fatin atu hadia fali sira nia uma maibé uma kain seluk labele. Bá komunidade sira ne’ebé labele fila bá sira nia uma tanba hetan estragus total ka hela iha fatin risku bo’ot governu presiza hanoin atu fornese uma adekuadu iha fatin alternative inklui mós oinsa implemnta prosesu realojamentu ho diak bainhira prosesu realojamentu ne’ebé lidera husi komunidade ho dalan konsultativa hodi responde bá nesesidade komunidade sira nian ho diak, tenke trasparante, direitu ne’ebé mak seguru, la ho diskriminasaun no asegura benifisiu ba ema nia standar moris no seguransa  direitu ba rai no uma.

Lei espropriasun Nú 8/2017 sei ajuda tebes estadu bainhira atu estabelse prosedimentu no mekanizmu klaru atu foti rai no muda komunidade sira ba hela iha fatin foun. Inkliu Rejime Espesial Definisaun Titularidade  Nain ba Rai Lei Nú 13/2017, Lei Sistema Nasional Area Protejida Nú 5/2016 nomos Lei Protesaun Sivil Nú 12/2020. Kolia kona ba Risku hanesan fenomena natureza ne’ebé akontese bele mai husi atividade ema nian inkliu atividade natureza nian ne’ebé  mai husi prosesu natureza nian. Iha ne’ebé akontesimentu hirak ne’e iha relasaun ho ambiente no sociedade hodi hamosu estragus ruma. Risku mak hanesan, Inundasaun, Tsunami, Rai halai, Rai nakdodko, Vulkaum nakfera, no selu seluk tan ne’ebé hamsou estragus ruma. Maibé to’o agora seidauk iha Lei ida ne’ebé halo klasifikasaun ba area risku sira. Agora dadaun klasifikasaun ne’ebé mak Estadu halo hanesan prosesu informal ne’ebé laos estabelese iha lei.

Komunidade afetadu husi espropriasaun hetan impaktu oi-oin komunidade balun hetan impaktu tanba lakon sira nia rai, komunidade sira seluk mos lakon asesu ba vida moris ka fasilidade sira ka dalaruma mos lakon asesu ba fatin kultural ka fatin spiritual. Komunidade sira iha direitu atu hetan kompensasaun adekuadu. Kompensasaun adekuadu ne’ebé bazeia ba negosiasaun no prosesu tranasparante bele reduz posibilidade konflitu. Lei espropriasaun klaru tebes katak kompensasaun tenke inklui montante nato’on atu troka ka hola fila fali rai no uma sira ne’ebé maka lakon, gasta sira seluk liga ho prosesu realojamentu, rendimentu ne’ebé lakon tanba esproriasaun no gasta seluk ne’ebé kona komunidade afetadu tanba prosesu realojamentu.

Alternativu ba realojamentu hanesan prosesu ida ne’ebé komplexu no fo todan ba komunidade sira no iha impaktu tempu naruk ba sira nia relasaun sosial, vida moris no standar moris. Bainhira la implementa ho diak realojamentu bele ruzulta iha konflitu. Tanba ne’e realojamentu nudar opsaun ikus ba estadu no so implementa bainhira la iha alteranativu seluk. Iha duni situasaun balun ne’ebé merese atu halo realojamentu hanesan bainbira komunidade hela iha area nebe perigu liu. Maske nune bainhira posivel diak liu estadu buka meius atu rezolve situasaun sem muda komunidade sira estadu bele uza meius oi-oin atu asegura katak komunidade sir abele fila fali ba sira nia hela fatin inkui; fo asiatensia atu harii ka hadia fali uma no harii infrastrutura atu reduz risku dezastre. Realojamentu hanesan opsaun ikus bainhira la iha ona alternative. Avaliasaun ba kustu no benifisiu ne’ebé los sai hanesan fator save ba governu bainhira hili opsaun ne’ebé apropriadu no sustentavel. Dalaruma ita bele hanoin katak asistensia finansial ka subsidiu ne’ebé boot sai hanesan gastu boot ba estadu no iha impaktu negativu ba orsamentu jeral estadu, maibe realidade hatudu katak komunidade vulveravel no kiak fo todan makas liu ekonomia nasaun nian duke komunidade ne’ebé reseliante no hases an husi kiak. Tanba nune dalaruma efetivu no sustentavel liu ba estadu atu fo asiatensia agora hodi nune komunidade sira bele harii uma kualidade diak nune evita problema no hamosu kustu ne’ebé boot iha future.

Estadu presiza halo tuir prosedimentu sira ne’ebé mak hakerek iha lei espropriasaun ho komprensivu no fo protesaun makas. Prosesu ho ninia etapa oi-oin, inklui planeamentu projetu, konsultasaun publiku, inspesaun rai, negosiasaun, no abritrajen. Maske prosesu ne’ebé estabelese naruk oituan, prosesu ne’ebé fó protesaun makas ba estadu rasik nomos ba komunidade afetadu sira. Bainhira governu tuir duni prosedimentu hirak ne’e Ministeriu no Instituisaun sira seluk sente seguru katak sira foti rai ho dalan ne’ebé legal no seguru. Ida ne’e sei ajuda governu atu evita kazu iha tribunal, hamenus konflitu, evita demonstrasaun ka dezsatisfasaun husi komunidade afetadu no ajuda estadu atu estabelse no haklean estadu de direitu. Bainhira tuir duni prosedimentu hirak ne’e estadu no parseiru setor privadu sira bele fiar an katak dezenvolvimentu ne’ebé mak atu harii seguru no respeitu ema nian direitu.

Aleinde ne’e mos lei espropriasaun ajuda governu atu dezenvolve solusaun ne’ebé sustentavel. Bainhira la halo konsultasaun, negosiasaun no selu kompensasaun nato’on entaun komunidade afetadu sira dala barak lakon rai no hela fatin no la iha kibit atu hola rai foun, nune’e sira sei hola rai iha area risku ba dezastre natural ka susar atu estabelese fali sira nia vida moris. Problema hirak ne’e mos sai problema estadu tanba hasoru bebeik problema ho komunidade hirak ne’e no dalaruma tenke muda komunidade dala rua ka dala tolu. Se karik governu tuir duni lei espropriasaun ne’ebé mak iha, estabelese fatin realojamentu no selu kompensasaun adekuadu entaun entidade governu rasik bele sente seguru katak sira sei rezolve problema ne’e ba tempu naruk, salva osan no evita todan ba governu, alende ne’e  mos reduz kiak ba komunidade efetadu sira.

Implementasaun ba Estadu nia Obrigasaun sira

Estadu sira tenke garante katak despezu so bele hala’o iha sirkunstansia exasional. Despezu ejijejustifikasaun tomak tanba impaktu adverse ba direitus umanus bar-barak ne’ebé rekoñese internasionalmente. Kualker despezu tenke:

  1. Halo tuir lei haruka;
  2. Hala’o tuir lei internasional direitus umanus nian;
  3. Hala’o ba deit finalidade hodi promove moris diak jeral;
  4. Razoavel no Proporsional;
  5. Regula hodi garante kompensasaun tomak no justu no reabilitasaun;
  6. Halo tuir mata dalan ida ne’e. Protesaun ne’ebé fornese hosi rekezitu prosesual hirak ne’e aplika ba ema vulneravel no grupu afetadu hotu-hotu, la haree ba karik sira kaer titulu ba uma no propriedade tuir lejislasaun nasional nian.

Respeita Direitus Umanus

Respeita Direitus Umanus  iha kontestu nasaun Timor-Leste ukun rasik a’an (Independensia) sai nafatin nudar preukupasaun husi entidade sira iha rai laran nomos komunidade internasional sira, iha prosesu konstrusaun nasaun Timor-Leste hodi dezenvolve instituisaun estadu hamutuk ho ninian enkuadramentu legal sira ne’ebé respeita prinsipiu demokrasia no valor sira direitus umanus nian. Tuir prinsipiu direitus umanus nomos enkuadramentu legal nian indika katak estadu mak iha kompotensia atu garante, respeita, protégé no hakonu direitus fundamental sidadaun sira nian, mak bainhira entidades la halo sira nia obrigasaun tuir lei konsidera nudar violasaun kontra direitus umanus povu nian, iha aspeitu direitu sivil politika nomos direitu ekonomia, sosial no kultura.

Direitun Asesu ba Rai no Uma

Husu ba governu kria programa nasional ida kona ba uma adekuadu husi propriu instituisaun nasional ida ne’ebé iha kompotensia atu dezenvolve uma adekuadu no halo kontrolu ne’ebé efetivu, inkliu kria fundus ne’ebé apropriadu hodi hari konstrusaun foun ba residensia komunidade ka populasaun kbit laek sir abele asesu. Prevene eviksaun ne’ebé uza forsa no kria lei hodi regula kona ba prosedimentu propriu ba eviksaun, kompensasaun no realokasaun ne’ebé prevene violasaun direitus umanus labele akontese antes, durante no depois eviksaun. Haforsa servisu entre liña ministerial sira ne’ebé relevante atu asegura intervensaun integradu ba planu eviksaun tuir lei no padraun estandar internasonal, hodi garante asesu ba informasaun relasiona ho prosesu tomak ba planu eviksaun nian.

Tuir Konvensaun Internasional Direitu ekonommia sosoial no kultura, (KIDESK) ne’ebé governu Timor leste ratifika iha tinan 2003 iha konvensaun ida ne’e komite bá komvensaun fó komentariu jeral iha No.7 temi katak: “Hasai ema ida husi uma ka rai ne’ebé nia hela labele halo ema ne’e sai fali ema ida uma laek ka sai vulneravel violasaun direitus humanus sira seluk. Bainhira ema afetadu ida labele tau matan bá nia an rasik, Estadu partisipante tenke foti medidas hotu-hotu to’o iha ne’ebé nia rekursu bele husik, hodi asegura uma/abrigu alternativu no adekuadu bá ema ne’e nia bele hetan asesu bá rai ne’ebé nia bele hetan asesu bá rai ne’ebé bele produs ai han, se ida ne’e mak situasaun ne’e envolve.

Konkluzaun

Planu realojamentu ba komunidade afetadu inundasaun  governu presiza halo tuir lei espropriasaun ba utilidade publiku  Lei Numeru 8/2017 nu’udar lei ne’ebé  importante hodi estabeselese mekanizmu espropriasaun ne’ebé util tebes ga governu atu foti rai husi sidadaun sira ne’ebé mak hela iha area risku no mós atu foti rai atu dezenvolve uma no infrastrutura iha area foun sira.

Rekomendasaun

  1. Bainhira posivel, prioritiza opsaun sir aba hela fatin no reabilitasaun uma duke realojamentu liu husi asistensia sosial ne’ebé nato’on. Realojamentu hanesan opsaun ikus liu bainhira la iha ona laternativa seluk.
  2. Tetu didiak kustu no benifisiu husi kriteria nebe sei halo limitasaun ba asitensia sosial bazeia ba estatutu rai. Iha posibilidade boot katak fasil liu ba  estadu atu selu asistensia sosial tanba prosesu atu prova katak rai espesifiku ida hanesan rai estadu ne’e sei han tempu no gasta estadu nia rekursu barak.
  3. Bainhira la iha ona opsaun seluk no tenke halo realojamentu uza prosesu sira ne’ebé estabelse iha lei espropriasaun numeru 8/2017.
  4. Husu ba governu kria programa nasional ida kona ba uma adekuadu husi propriu instituisaun nasional ida ne’ebé iha kompotensia atu dezenvolve uma adekuadu no halo kontrolu ne’ebé efetivu, inkliu kria fundus ne’ebé apropriadu hodi hari konstrusaun foun ba residensia komunidade ka populasaun kbit laek sir abele asesu.
  5. Prevene eviksaun ne’ebé uza forsa no kria lei hodi regula kona ba prosedimentu propriu ba eviksaun, kompensasaun no realokasaun ne’ebé prevene violasaun direitus umanus labele akontese antes, durante no depois eviksaun.
  6. Haforsa servisu entre liña ministerial sira ne’ebé relevante atu asegura intervensaun integradu ba planu eviksaun tuir lei no padraun estandar internasonal, hodi garante asesu ba informasaun relasiona ho prosesu tomak ba planu eviksaun nian.

Referensia:

Konstituisau Repúblika Demokrátika de Timor-Leste Vigora iha 20 de Maio 2002.

Lei No.8/2017 kona ba Lei Espropriasaun tanba Utilidade Públiku Versaun-Tetum, Ministériu da Justisa, 2014.

Regime Espesial ba Definisaun Titularidade Bein Imovel , Lei No 13/2017 De 5 de Junho.

Konvensaun Internasional Direitu ekonommia sosoial no kultura Lei Nu 1/2003 de 10 de Dezembru.

Print Friendly, PDF & Email

LEAVE A REPLY

Please enter your comment!
Please enter your name here