Arcebispo Matropolitana de Dili, Dom Virgilio do Carmo da Silva hasai komunikadu imprensa horiseik, 22/07, hodi husu Padre sira, Relijioza/Relijiozu sira, Diakonu, Fraters no Agente Pastoral sira atu la halo tan komentariu ba kazu violasaun sexual hosi arguido Richard Dascbach nian, fo apoio tomak ba Ministeriu Publik (MP) atu halo loloos prosesu justsia hodi apoio vitima sira.
Relasiona ho deklarasaun Amo balun iha Arquidiocese kona ba prosesu investigasaun kazu Topu Honis, Arquibispo hakarak fo hanoin dala ida tan ba Padre, Relijioza/Relijiozu sira, Diakonu, Fraters no Agente Pastoral atu la halo komentariu tan.
Komunikadu ne’e mos hatete katak Sr. Richard Dascbach hetan tiha ona nia sentensa hosi Doutrina da Fe, 6 Novembro 2018, hosi Amu Papa Francisco katak nia laos padre ona. Ba desizaun ida ne’e mak Arcebispo Dom Virgilio husu atu Padre sira, Relijioza/Relijiozu sira, Diakonu, Fraters no Agente Pastoral sira atu la koalia tan no la intervene prosesu justisa ne’ebe Ministeriu Publik halo hela.
Komunikadu ne’e mos husu atu Padre sira, Relijioza/Relijiozu sira, Diakonu, Fraters no Agente Pastoral sira atu fo apoio tomak ba Ministeriu Publik atu halo loloos prosesu justisa hodi apoio ba vitima sira.
Antes komunikadu ne’e publika Neon Metin mos rona informasaun katak Amo ida iha Oecusse halo komentariu hodi soran lia iha publiku kona ba prosesu justisa mak lao hela. Fontes kredible ne’ebe rona informasaun ne’e konfirma duni katak Amo ida koalia duni maibe nia lakoi temi amo ne’e nia naran no husu atu la temi nia naran iha notisia laran.
Kazu Topu Honis mak nudar kazu pedofilia ne’ebe mosu ba publik dahuluk iha Timor-Leste no kazu ne’e involve arguido Richard Dascbach hosi kongregasaun SVD nian. Ho rezultadu investigasaun klean hosi Kongregasaun Doutrina da Fe nian iha Vatikanu, Richard Daschbach konfesa tiha ona, no Amo Papa Francisco hasai tiha ona Richard Dascbach nudar padre iha tinan 2018. Richard Daschbach agora dadaun tuir hela prosesu justisa ho kondenasaun kazu pedofilia, pornografia labarik no violensia domestika.
Maski iha prosesu justisa nian laran, iha kedas aredores Tribunal Oecusse nian, arguido Richard Dascbach, loron 13 Julho, Tersa semana kotuk, ameasa advogado sasin sira nian, Barbara Oliveira, ho lian Ingles dehan “You Know We Are Going To Kill You” (O Hatene Ami Sei Oho O). Barbara Oliveira hato’o keisa ona ba Ministeriu Publik relasiona ho ameasa mak arguido ne’e halo.
