Home EduTek MEJD Sei Apoiu Pulsa Internet Ba Estudante Ensinu Baziku no Sekundaria Tinan...

MEJD Sei Apoiu Pulsa Internet Ba Estudante Ensinu Baziku no Sekundaria Tinan 1

1741
0

Reportajen David da Costa Gusmao

Governu liu husi Ministériu Edukasaun Juventude no Desportu (MEJD) fó apoiu pulsa internet ba estudante Ensinu Báziku no Ensinu Sekundária Jerál (ESG) no daudaun ne’e  iha hela prosesu nia laran.

Ministru Edukasaun Juventude no Desportu, Armindo Maia hatete pulsa internet ba estudante EB no ESG sei  iha prosesu nia laran, no MEJD sei halo hela koordenasaun ho kompaña telekomunikasaun 3 ne’ebé mak sei fó liña internet.

“Iha kompañia  ida mak atu oferese liña internet gratuita to’o tinan ida,” dehan Armindo Maia ba jornalista sira iha salaun Ian Martin Infordepe Balide Dili, kinta 22/07.

Nia haktuir pulsa ne’ebé mak MEJD atu fó apoiu ba estudante sira ne’e, sira foti osan husi orsamentu retifikativu ho montante $3,2 milliaun ne’ebé mak aloka ba MEJD, ho ida ne’e sira sei ezekuta ho diak atu nune’e fó apoiu internet ba estudante sira.

Nune’e tuir dadus ne’ebé MEJD iha estudante ne’ebé simu apoiu pulsa internet  hamutuk 21,551,  atu nune’e bele akompaña programa eskola ba uma ou aula distánsia ka aula online, tanba ne’e orsamentu ne’e sei bele ezekuta iha tempu besik, no orsamentu ne’e hetan ona promulgasaun husi Prezidente Repúblika.

Nia dehan espera katak iha fulan Jullu nia laran MEJD bele ezekuta ona programa ne’e, atu nune’e estudante sira bele asesu material online nian, maski kleur maibé sei nafatin realiza.

Iha Fatin hanesan Koordenadór do Kurríkulu Nasionál, Pedro Ribeiro Gonçalves hateten programa eskola ba uma ne’e sei implementa liu husi Radiu, Telivizaun, Online no youtube atu nune’e fasilita estudante sira hodi estuda iha uma.

“Iha tinan kotuk MEJD lansa ona programa eskola ba uma, ho ida ne’e prosesu aprendijazen ba dahuluk  iha Timor-Leste liu husi televizaun no radiu, maibe haree kazu covid-19 sa’e ba beibeik,  ho ida ne’e posibilidade MEJD sei suspende nafatin atividade prezensial iha eskola iha tempu naruk,” nia esplika.

Print Friendly, PDF & Email

LEAVE A REPLY

Please enter your comment!
Please enter your name here