Home Notisia PR Dekreta EE Ba Dala 11, Lockdown Akontese Deit Ba Municipio Covalima

PR Dekreta EE Ba Dala 11, Lockdown Akontese Deit Ba Municipio Covalima

5632
0
Prezidente Republika, Dr. Francisco Guterres Lu Olo. [Foto: Media PR | 28.08.2020]

Reportazen Zevonia Vieira

Prezidente Republika, Dr. Franciso Guterres Lu Olo dekreta Estadu Emerjensia ba dala 11, durante loron 30, ne’ebe hahu hosi tuku 00:0) iha 4 Marsu 2021 (Kinta-feira) no remata iha tuku 23:59 Abril 2021 (Sesta-feira).

Liu hosi komunikadu imprensa ne’ebe distribui hosi media palacio prezidensia, relata katak Prezidente Repúblika dekreta Estadu Emerjénsia hafoin pedidu estensaun aprova iha Parlamentu Nasionál ho votus-a favor 53 no 12 abstensoins.

Molok ne’e, iha loron 24 Fevereiru, Prezidente Repúblika rona uluk Konsellu Superior Defeza no Seguransa no Konsellu Estadu molok haruka pedidu autorizasaun ba Parlamentu Nasionál, hodi deklara estensaun estadu emerjénsia ba dala 11.

Iha komunikadu imprensa governu hato’o pedidu estensaun ba estadu emerjénsia ba Prezidente Repúblika, tanba haree númeru kazu rejistadu COVID-19 aumenta iha nível rejionál no nível mundiál.

Tuir dadus husi Organizasaun Mundiál Saúde (OMS), iha loron 17 Fevereiru 2021, infesaun husi virus COVID nian, SARs-Cov-2 iha mundu rejista kazu konfirmadu hamutuk 109 217 366 no hamate ema hamutuk 2. 413 912 . Iha Indonézia rejista kazu infesaun SARs-CoV-2 hamutuk 1.233 959 no hamate ona 33 596 iha provinsia 34, inkluindu Nusa Tenggara Timur (NTT) ne’ebé nia kazu konfirmadu aumenta ba 7517.

Dekretu hosi Prezidente Repúblika, hanesan mós sira seluk, hasai parsialmente to’o agora, hodi deklara estadu emerjénsia, fó kbiit ba governu bele foti medidas, hodi suspende direitu konstitusional balun sidadaun sira-nian, inklui ba sirkulasaun internasional, sirkulasaun iha rai-laran, direitu ba reuniaun no manifestasaun no seluk tan.

Kona-ba direitu edukasaun, purezemplu entidade responsável ba saúde públika bele foti medida suspensaun temporária ba prosesu atividade ensinu, ho rejime prezensiál hodi hamenus risku kontájiu iha eskola sira.

Medida sira ne’e foti foti nu’udar medidas prevensaun no kombate moras COVID-19 atu labele hadaet hosi ema ba ema. Haree ba númeru kazu pozitivu ho COVID-19 ne’ebé aumenta ba beibeik iha rai vziñu Indonézia, no tanba detekta kazu pozitivu iha aldeia Klau-Halec, suku Bee Lulik Leten, husi sidadaun sira ne’ebé halo pasajen ilegál husi fronteira-rai, Governu dekreta serka sanitária iha 15 Fevereiru 2021 ba munisípiu Covalima no Bobonaro.

Liuhosi Dekretu Prezidensial ba estadu emerjénsia ba dala 11, Prezidente Repúblika husu atu Forsas Armadas bele haforsa Polísia Nasionál Timor-Leste (PNTL) no Departamentu governamentál ne’ebé responsável ba saúde públika, hodi hala’o atividade sira ne’ebé presiza ba fiskalizasaun no ezekusaun estadu emerjénsia hahú hosi 4 Marsu.

Bazeia ba Dekretu Prezidente Repúblika, publika horseik iha Jornal Repúblika no hahú bainrua, loron 4 Marsu, zero oras, governu mak sei define medidas implementasaun estadu emerjénsia ba dala 11

“Renovasaun ba estadu emerjénsia halo nafatin, tanba ita sei hasoru nafatin kalamidade públika. Husi fulan Marsu 2020, bainhira rejista kazu pozitivu ida ho COVID-19, Timor-Leste implementa kedas estadu emerjénsia. Implementasaun estadu emerjénsia ho medida oioin, hanesan medida preventiva no kontrolu COVID-19, labele daet ba populasaun mak permite ita seidauk iha transmisaun komunitária”, deklara Prezidente Republika, 02/03.

Prezidente Lu Olo dehan sidadaun sira ne’ebé hakaat fronteira liuhosi dalan ilegál lori tama mai COVID -19 no tanba hetan kazu pozitivu ho transmisaun lokal (Komunidade) iha aldeia iha Fatumea no Tilomar-Covalima, governu hasai rezolusaun hodi implementa serka sanitária ba munisípiu Covalima no Bobonaro.

Ministériu Saúde halao teste massal iha munisípiu Bobobaro no Cova Lima hodi buka hatene grau ka nível transmisaun komunidade ba moras corona virus iha zonas fronteirisas.

Ohinloron Timor-Leste rejista kazu pozitivu na’in-23, hosi Marsu 2020 to’o ohin loron, iha ema na’in-113 hetan infesaun husi SARs-CoV-2, sira seluk rekuperadu no seidauk rejista ema mate.

Ohin Konsellu Ministrus deside mantein serka sanitária ba de’it munisípiu Covalima. Serka Sanitária signifika katak komunidade Covalima labele tama-sai ho liberdade hanesan hori uluk. Ba munisípiu sira seluk no RAEOA, sei la iha lockdown.

“Ita presiza tuir nafatin medida prevensaun uza máskara, fase liman ho sabaun no halo distansiamentu sosiál”, Prezidente Republika konklui

Print Friendly, PDF & Email

LEAVE A REPLY

Please enter your comment!
Please enter your name here